Obagambo nagagerak aberogo laago lako logorak wone
1It aakumi Iterali mendek nogo o Metit nen wundi wa'nuk, tahun ambi eeppunuk, ambi eeke tut aa'nduk penenak paga at Muta nogo puut Tinayi paga wonage me, at Aliku ALA nen Muta yoge logonet, 2-3 “Tanggal 14 tut yi paga o kiyoma age kenok, Obagambo Nagagirak laago lako logorak koonogo pereegirak nogo lako logonet, wone, Yogop ee'nu ndogop ee'nu, yugu inom, wone lengganak inom, mondok liippunuk, ndak-ndak aret inale'nggen paga lako logowak nduk, it aakumi Iterali yoret o.”
4Yoge mbareegi, at Muta nen it aakumi Iterali mendek Obagambo Nagagerak laago nogo inale'nggen paga laruwak nduk, yorage mbareegi, 5tut aa'nduk penenak tanggal 14 o kiyoma paga Aliku ALA nen Muta yoreegerak nogo ndak-ndak, Obagambo Nagagerak laago nogo aret lareegwaarak.
6Lareegwaarak kwe, it aap ando aap kambak mbaaninabeegwaarak paga lu kologo mengga kwak, ineebe maluk agagerak kenok, Obagambo Nagagerak laago lako logonet, “Ne yi paga kit lariyak lek,” yorogo mbareegwa, it nen ne ti eyom paga Muta Karun imbirak inowagam wogo nogogwaarik, yorogo logonet, 7“Nit aap kambak eebe paga lu kologo mengga kwak, nineebe maluk agaarak ti abet aret kwe, Obagambo Nagagerak laago koonogo pugu nogo lako logonet, Aliku ALA ake warogo lariyak nogo, Kit ninom lariyak lek, yo'nirogwe ti, nonggop nduk yo'niraga o?”
8Yogo mbareegwa, at Muta nen it onggo yorage logonet, “Kit nonggop eeriyak nogo, at Aliku ALA nen yo'nege kenok mban yokkiraagin me, puk logonip o.”
9Yorage mbareegi, at Aliku ALA nen Muta yoge logonet, 10“Kat nen it aakumi Iterali mendek yoroorak nogo yi aret. Aap ambi it inenggela'me wonage inom, inapuri-inombowologwe wigannarit nogo logogun nogo mendek inom, nogo nen aap kambemenggerak eebe mbaanggogwe, tu nda nen awo wogwe, eeremenggaarak kwe, Naliku ALA abe'nako logonet, laago Obagambo Nagagirak inale'nggen paga lakwi iinok, it kunduk lako logorak op aret o. 11Ndi, inale'nggen paga lariyak nogo ti, tut ambit penembunuk, ambi penengge tanggal 14 ti paga o kiyoma age kenok mban, laago Obagambo Nagagirak ndomba nogo warogo lako logonet, oroti ragi pugu lek worarak inom, mbiingga ale mendek larak inom, nonggo logowak o. 12 Nonggo logonet, larak eegu ndiinogo pemenggaarak kagak o weege, ndi, owak iluk ambi kalukkogwe, eeriyak mondok mage o. Ata, laago Obagambo Nagagirak inale'nggen paga lako logonet, eeko logorak wone, Yogop ee'nu ndogop ee'nu, lengganogo yoragagirak nogo ndak-ndak aret eeko logowak o.
13Ndi, aap ambi lu kologo mengga kwak, eebe maluk age, tu nda nen awo wage, eerulik kagak, ne laago lako logorak yugu nogo eyom Naliku ALA nake warogo laka'lek kenok, at aap ti, oreewi wonogwe inenggela'me nen enggaawak lek eerogo endekem wumbuwak o. At maluk eeremenggerak nogo ti, aaninggin at obaalombok aret oba logowak o.
14It aap nggiru mendek inenggela'me wonogwe nogo nen Naliku ALA abe'nako logonet, Obagambo Nagagirak laago lakwi me, An kunduk larikit, mbake kenok, lake logonet, eeko logorak wone yugu inom, wone lengganak inom, ti ndak-ndak aret eeke logowak o. Iterali inaworak inom, it aap nggiru inom, abok ndak-ndak wone yugu ambit ti mban aret eeko logowak, yegerak, yoret o,” yinuk, yoreegerak.
O ndugwi abinak paga wogoren nege nagagerak wone
15-16Ala wone yugu aloobut mbanak me yonggolak logorak awooliya nogo abu aret wurogo pogo mbareegwa, ne ti paga aret Aliku ALA awooliya wurik paga ndugwi lenggeni wage logonet, oonikiya nen kuubondendok kuli ti, kani wuninik abinak negen ooliya wurik irimbaga wonage, ndi, liingge ti, ndugwi pogom obaga lenggenak wonage, eeke nagagerak. 17Ndi, ndugwi nogo Ala awooliya wurik paga lenggenak wonagaatik, lagi nanuk wage kenok, it aakumi Iterali mendek ndugwi nogo mugurok wogwe, ndi, puk age kenok, inawooliya time aret wuppunuk wonogwe, eerit nugu logonet, 18at Aliku ALA nen, “Ooliya wu'nip o,” yorage kenok wukwi, ndi, “Nanip o,” yorage kenok nogwe, ndugwi nogo ooliya wurik irimbaga puk age kenok, it inawooliyana time aret puk ogwe, eerit nugwi iigak, 19o ndugwi nogo naga'lek ooliya wurik irimbaga taati mondok aret wonage kenok, it aakumi Iterali nogo kagak aret, “Nawi o,” yogo logolik, ata, “Aliku ALA nen yo'nirage kenok, Nawok o,” yinuk, time aret wonogwe, 20ndi, ne mande negen ta logowak nduk, Ala nen ndugwi nogo awooliya wurik irimbaga, “Taati logot o,” yoge kenok time inawooliya wuppunuk wonogwe, ndi, “Nanip,” yorage kenok nogwe, eerit nugu nogogwaarak.
21Eerit nugwi iigak, ne ambi paga ndugwi nogo o kiyoma nen puk agaatak wonagaatik, o weege paga lagi nanuk nage kenok, it aakumi Iterali mendek nogwe, eerit liingge-oonikiya ndugwi nogo ena koongge kenok, mugurok mban nugu nogogwaarak. 22Ndi, ndugwi nogo ooliya wurik irimbaga naga'lek nogo mbere a, tut ambi a, tahun ambi a, taati wonage kenok, it Iterali mendek nogo, nogo logolik, time aret wonogo nagaatik, ndugwi nogo ooliya wurik me nen lagi nanuk nage kenok perak, nogwe, eerit nugu nogogwaarak. 23At Aliku ALA nen, “Puk a'nip o,” yorage kenok, inawooliya wuppunuk puk ogwe, ndi, “Nanip o,” yorage kenok nogwe, eerit nugu nogogwaarak. Ti eerit nugu nogogwaarak nogo ti, at Aliku ALA nen Muta yoge kagak, it Iterali yorage nogo ndak-ndak aret eerit nugu nogogwaarak.
Tidak ada komentar:
Posting Komentar