ALA nen kani kunik inoba wuppi wagagerak wone
1Ne ambi paga it aakumi Iterali mendek nogo nen, “Nonggop eekkoloobok,” eeginake mbareegi, iniki piirik logonet, at Aliku ALA ineebi-ineeba yogo nogogwaarak. Yogwi nogo Aliku ALA konembunuk, anini mi'nage nagagerik, kani mbogut paga nen it Iterali wonogwe me wuppi wagagerak wunuk agan nage logonet, inawooliya ambet paga taa'nogo kani nenet nagagerak. 2Nenet nage mbareegi, it aakumi Iterali mendek inoone nggwok paga Muta yogo mbareegwa, at Muta nen Aliku ALA yoge mbareegi, kani nogo, noguk yereegerak. 3Ndi, “At Aliku ALA nen kani omoonuk it aakumi Iterali inenggela'me wuppit wagagerak me,” yinuk, o taati endage, Kani Nenggigim o, yinuk, toonogo pereegwaarak.
At Ala nen towe nggimabut wogoragagerak wone
4It aap ndugumbagik-perambagik mendek Iterali inenggela'me inom wonogogwaarak nogo nen wam kinduwak aret me, “Wam enggaanggum kwak nane,” yogwe iinok, it Iterali kunduk le yogo logonet, “Nit ta nen wam enggaanggum wo'niraagin o? 5Nit o Metit time logonet, ikan inom, nggilu-nggiyo inom, bawang engga laka prei inom, bawang putih inom, bawang merah inom, onggo lek we aret nonggo nogogurak kwe, 6yogondak nit abe mendek ambi nengga'lek, mana mban nonggo logonet, kinik lek ee'ninake me, ambinom pekkoorak nineebi o,” yogo nogogwaarak.
7 Mana nogo ti, anggen mbuulogwe kumulinggen kokwak kwe, etenggen kundali longgo warak negen kirik-kerek aago wonagagerak. 8-9 Oonikiya paga mbi mana nogo mbogut paga nen miinanggen wambi wage me enggela'me inawooliya wuppunuk wonogwe me inawoore'nggam taa'nogo wuppit wage kenok, it nen kuwak eerogo yigippunuk a, aambiranogo punuk a, lilom eerogo togolowak ndoonak paga worako nagaatik, tayitun amburu paga worarak ombat kokwak me nonggo nogogwaarak.
10It aakumi Iterali inowe-inawot leenok lombok inawooliya wurik tungga paga wonogo logonet leenggu maakwi at Muta aruk konengge nagagerik, “It aakumi yi, Aliku ALA anini nggwok lombok wundiyak, yogwe yi, ai,” mbareegerak.
11Mbake nagagerik, at Aliku ALA yoge logonet, “Kat nonggop nduk an kayeloman yi, maluk eerogo panege agandik? It Iterali mendek wogoren wage, inawone mbangge, eerit nege minggirak kwe, nabuwa mbaka'lek an nonggop eekirak paga it yogwe ti, Kat kobaalombok koonu o, yinuk, mbo panege agandik? 12It aakumi yi, an ninikime nen logongge, an nen aret ndaganake, eekirak mbaken? It aakumi yi, kat nen nombomini inanggween, Wokkiraagin o, yinuk, wone abuk nggaruk togon yoragagim nogome, elege ngget ndarak inaani yaruguren nugu mengga kwak, Wogoren nak o, yinuk, nonggop nduk yo'negendak? 13It aakumi yi abok aret, Enggaanggum wo'niret o, yinuk, le yogo logonet, nggino yo'nugwi yi, an enggaanggum ngga nen kwaarogo wogora o? 14Aakumi ambik lombok yi, aaninggin ambik me, an nalik nen yaruginaburak meek ee'naki o. 15Aaninggin yogobi mban eeppanege logonet, irip paga maluk noba ariyak neebi me, nggarurogon kambikit nduk yogondak aret nabuwa nen nooru o,” yinuk, yoreegerak.
16Yoge mbareegi, at Aliku ALA nen Muta yoge, “Kat nen it aap Iterali inoweewi iniki warak inenggela'me nen aakumi inarum menggaarak inom, inawot lombok eerak ndegeninaka inom, keenu kero, ineebe 70 paga kuwak eeppiinok, an ninom lambungge minggim nawooliya wurik me tungga paga taati kinom mi'nari woraanip o. 17Mi'nari wogwe kiinok, an kiniya wambi wage logominggirik, nimbirak wone mbangge logonet, Aberiniki koba pagareegirak nogo ndak-ndak it inoba piige neenok, it kinom yeenggwa-yeenggwa eekwi paga kat kalik mban aaninggin kage menggendak nogo lek aret eekkake kaamunggun o.
18It aakumi Iterali wone yoroorak nogo yi o. It nen yogo logonet, Nit o Metit time wonogo logonet, op wonogogurak kwe, yime wogoorak paga enggaanggum lek me, Enggaanggum nawok lak, ao, yinuk, le yogwe nogo Naliku an ALA muk konengge nagarik, it enggaanggum nawak nduk, wogoroorak mbakirak me, o ko'lu wogoraakit nduk, iniki pipuk eeppatinuk logowak o. 19Ndi, enggaanggum noorak nduk wogoraagin nogo ti, we ne ambit iluk, ne mbere iluk, ne 5 iluk, ne 10 iluk, ne 20 iluk, noorak ake wogoraagin lek o. 20Ata, Naliku an ALA it inenggela'me ninom wonage nogo mbo paninuk, yogo logonet, Nonggop nduk nit o Metit nen wo'niren wundi wagagerak, yinuk, le yogwe nogo muk iigirak me, enggaanggum wogoraminggirak nunggwi aret iigak, tut ambit penenigin me, nunggwi iigak, inaanoma'le nen peyak wuriyak eeginake logonet, inogobak me kilu-kilu wambigin, yegerak, yoret o,” yinuk, yoreegerak.
21Yoge mbareegi, at Muta nen, “An nen it Iterali mendek wogoren nege nogo ineebe aap mban lambuk togon enam ratus ribu aret kwe, kat nen ari logonet, Enggaanggum yi wogoraminggirak nunggwi iigak, tut ambit aret warugun yagandak ti nonggop o? 22Ndi, aakumi ineebe ambik lombok yogobi paga kambin-ndomba inom, lembu-tapi inom, warogo punuk, wogorage, ndi, yi yikwe ndi yikwe laut inikime wonage nogo abok aret pigogo wogorage, eeriyak ndak me, yinuk, yagan ya?”
23Yoge mbareegi, at Aliku ALA nen Muta yoge logonet, “Naliku an ALA nen eeriyak nobam lek nomba'nuk yagan ya? An yagarak ti, abet aret eeke neyaamunggun ilik, lek a? kenegen kaamunggun o,” yinuk, yoreegerak.
Aap inoweewi iniki warak ineebe 70 mippiyareegerak wone
24Yoge mbareegi, at Muta nogo endekem wundi nage nagagerik, Aliku ALA nen, “Yogop yo'nigi o,” yinuk, it aakumi Iterali mendek abok aret paganogo yoragagerak. Yorage nagagerik, it Iterali mendek inoweewi iniki warak ineebe 70 wogoren Aliku ALA awooliya wurik me, tungga paga taa'nogo kuwak eeppiinok, inom mi'ndak wonogo mbareegwa, 25at Aliku ALA nogo mbogut paga nen ndugwi enggela'me wambi wage nagagerik, Muta imbirak wone mbaneegerak. Wone mbambunuk, Aberiniki at Muta oba wonage nogo ndak-ndak it aap inoweewi ineebe 70 nogo inoba piige mbareegi, it nen aap Ala wone yaga nen yorogo mengga kwak aret yorogogwaarak kwe, ambinom yoroolik ne ti eyom paga mban aret yorogogwaarak.
26It aap Iterali inoweewi ineebe 70 nogo Ala awooliya wurik me nogwe iigak, aap ineebe mbere inendage Elarat Merat imbirak nogo inom inendage mbanak aret kwe, Ala awooliya wurik me nogome noolik, it inawooliya wurik oore'nggam aret wonogwe me, it nogo kunduk Aberiniki inoba age mbareegi, Ala nen yorage kagak yorogo mengga kwak taati aret yorogogwaarak. 27Yorogo mbareegwa, wulaga tawe ambi nen wone wonok mbet-mbet aret Muta yori wage logonet, “Aap Elarat Merat imbirak nen aap Ala nen yorage kagak yorogo mengga kwak inawooliya oore'nggam nen yorogo agaarik o.”
28Yoge mbareegi, at Nun aput Yotuwa awo tawe paga Muta ayeloman wonagagerak nogo nen Muta yoge logonet, “It aap ti, Kinoone mage, yoret o, nogoba.”
29Yoge mbareegi, at Muta nen yoge logonet, “At nen nban yoraawak, nomba'nuk, ari agandik? An mbake logonet, At Aliku ALA Aberiniki it at apuri abok aret inoba wuppi woramenggerak paga aap Ala nen yorage kagak yorogo mengga kwak yuurak op aret mbake agaarik o.” 30Yoge nagagerik, it aap Iterali inoweewi nogo inom, at Muta inom, inawooliyana nogogwaarak.
Ala nen towe nggimabut nappi wagagerak wone
31At Aliku ALA nen o wiya nggwok ambi nappi wagagerak wage logonet, towe nggimabut nogo niyo laut paga pa'nggwe time nen wogoren it Iterali mendek inawooliya wurik paga inom, inawoore'nggam paga inom, piya wagagerak lenggak-penggak agan nugu nogogwaarak nogo ti teberogon ogu nen agi kuli metet ambit negen age, ndi, ambe kuli pi nagagerak nogo ti, nogwe iigak, nogo mbere yuurak kuli kwak aret age, eereegerak. 32Towe nggimabut nogo lenggak-penggak agan nugwi me, it aakumi Iterali mendek nogo ne ti paga liingge inom, oonikiya inom, ko'lu inom, towe nogo piginako nagaatik, it inalitak lombok kologo logonet, aaninggin seribu agi nggwe kuli inom kuwak eerogo patinuk, inawooliya wurik paga yendok-wandok woloonogo patit nogogwaarak.
33Patit nogo nogogwaarik, towe enggaanggum nogo lunggunogo wuraka'lek awo ineyak laganggwi iigak, at Ala iniki aagi ka'luk negen mi'nage logonet, it aakumi Iterali mendek andi mondok alik mendek inoba kwippiyareegerak. 34It aakumi Iterali mendek towe kinduwak me, wa nanuk nenggak mban eeko nogogwaarak kero kambit nogo mbareegwa, o time nggween taambiigo nogogwaarak me, o nogo endage, Kiborot-Taawa, ti nit ninoone paga, Inaanoma'le Ndenok Yinuk Kambeegwam o, yinuk, tooneegwaarak.
35Ndi, it aakumi nogo o Kiborot-Taawa nogome mbo punuk nogo nogogwaarik, o Katerot time inawooliya wuppatinuk wonogogwaarak.
Tidak ada komentar:
Posting Komentar