OWAK LOONGGA 15:1-20

 Timoton nen Pilitin mendek inooreegerak wone

1Peebi nen gandum anggen mbanggwi eyom paga Timoton nen, “Nakwe pekka na o,” yinuk, nage logonet, kambin aagaluk ambi wonok kwe nogo ame unggwi nage nagagerik, ogoba nogo yoge, “Nakwe akem yime wonage me pekka unggwi o,” yoge mbareegi, kwe ogoba nen, “Ungguurak mage o,” yoge nagagerik, 2“Kolaga yi, abu keebi ombake keege nagarik, koreeluk ambi muk wogogirak me, awuluk ti abu kigirikwe me, obaane'me awuluk ti aret kolet o.”

3Yoge mbareegi, at Timoton nen kwe ogoba nogo yoge, “It Pilitin mendek nen eeppanggaarak paga an onggo aaninggin inoba piige neenok ti, an maluk yo'niriyak mage o. It inobaalombok aret o.” 4Yorage nagagerik, oome nen wundi nanuk, nggeewo mba'ngge tiga ratus piginabi nage nagagerik, ineebe mbere'ndak lombok inage imbirak te'muluk eerogo piinok, ndi wuninggak inage paga keele maarogo piige nagagerik, 5kani wuninogo punuk, aap Pilitin mendek ineyabu gandum yarak me time teppiige mbareegi, gandum warak logonak inom, awo mbangga'lek aro paga wonage inom, kani nenet nage logonet, anggur awi yarak inom, eyo tayitun awi yarak inom, abok aret kani nenggegerak.

6Nengge mbareegi, it aap Pilitin mendek it mban-mban yogo logonet, “A puk! Yi ta nen eeki mbakop?” Yogo mbareegwa, it ambi nen yogo logonet, “Aap Timana mendek Timoton aru nogo nen Timoton akwe waganogo at oreeluk ambi wogogerak me, aap Timoton nen aret eekerak o.”

Yogo mbareegwa, it Pilitin mendek apit aret nogo nogogwaarik, kwe nogo ogoba imbirak ineenik ngge-ngge kani kumbiyareegwaarak. 7Kani kumbiigo mbareegwa, at Timoton nogo nen yorage logonet, “Kit togop eekotak me, an nen inane'me wagangga'lek logonet, an puk arigin mondok lek mbako logonip o.” 8Yinuk, anini ambik age nagagerik, kumili negen a'nuk, it ambik aret inoorogo piinok, puut lunik Etam ndoome time ari nanuk, wonagagerak.

9Wonage kagak, aakumi Pilitin mendek apit aret wogo nogogwarik, inawooliya o Yekura paga wuppatinuk logonet, o Leki onda mbanuwok nduk, eeko mbareegwa, 10it aap Yekura mendek nen it yorogwe, “Kit nonggop nduk ninooriyak nduk wogotak?”

Yorogo mbareegwa, it nen yorogo logonet, “At Timoton nen nit eeppinanegerak kwak nit kunduk, at togop aret eeppuwok nduk, keele maari wogo o.”

11Yorogo mbareegwa, it aap Yekura mendek ineebe tiga ribu puut lunik Etam ndoome time nogo nogogwaarik, Timoton yogo logonet, “It aap Pilitin mendek inabu'me tebembinanogo wonogwe kat keenggo'lek a? Kat nen nonggop eerogo pinaniyak nduk eeke agandik?”

Yogo mbareegwa, at Timoton nen, “It nen an ee'nakaarak nogo onggo aret eeppiigirak me tit yogwe.”

12Yorage mbareegi, it nen at yogo logonet, “Kat keebe keele maarogo it Pilitin mendek ineenggime pagi nawok nduk, wokkabi wogo o.”

Yogo mbareegwa, at Timoton nen it yorage logonet, “Kit nen aret, Kat koorugun lek o, yinuk, kumbuk mbanogo an yo'ninip o.”

13Yorage mbareegi, it nen, “Op aret yagandak me, nit koorugun lek o. We keele maakkabunuk, it ineenggime pagi nagun aret o.” Yogo nogogwaarik, puut lunik nogome nen keele mbere ngget mendek paga eenggi keele maa'nuk wonok nogogwaarak. 14Wonok, o Leki ari nogo mbareegwa, it aap Pilitin inale'nggen nen keekok agan wundi wogwe iigak, abera'lek me taa'nogo aret Aliku ALA Aberiniki omaawi at oba ari wage logonet, eenggi keele maarak nogo kani nen ligi awut ne ambit liingge nengge menggerak togo'nogo aret nggaru-nggaru ma'nagagerak. 15Ma'nage mbareegi, keledai eegwak nenenak ngget mendek taati wonage kage nagagerik, eenggime woppunuk, aap ineebe seribu aret inoorogo piyareegerak.

16Inoorogo piige nagagerik, Timoton nogo nen ari logonet,

“Keledai eegwak nenenak paga

Aap ineebe seribu aret inoorogo piige,

Keledai eegwak paga aap inoorak nogo

Obaga luk-luk eerogo piige,

Eekirak o,”

yinuk, yereegerak. 17Ari nagagerik, keledai eegwak nogo eenggime nen mbo pereegerak me, o taati nogo endage, Eegwak Nenenak o, yogo nogogwaarak.

18Ndi, at Timoton nogo niyo abu eeke mbareegi, at oone nggwok paga Aliku ALA yoge logonet, “Kat komaawi an kayeloman wo'negendak paga aap apit aret inookirak kwe, yogondak an yi abu nen kangge neenok, it aakumi inagabolo mbana'lek mendek ineenggime arigin ti op mbaken?” 19Yoge mbareegi, Ala nen o Eegwak Nenenak time yugum eno pelengge mbareegi, niyo eneeri time nen wundeegerak. Wungge mbareegi, niyo nogo at Timoton nengge nagagerik, omaawi age, iniki linggolage, eereegerak. Ti eereegerak paga yi eneeri nogo endage, Ala Yoge Kenok, Yi Wogoreegim o, yinuk, yogo nogogwaarak me, niyo ti, o Eegwak Nenenak time yogondak wonage aret o.

20Ndi, it aap Pilitin mendek nen Iterali mendek inabu'me tebembiirogo wonogwe ti eyom paga Timoton nogo aakumi Iterali inarum logonet, inowak loongge kagak, tahun 20 aret eereegerak.

OWAK LOONGGA 14:1-20

 Timoton nen kwe Timana mendek kolaakit nduk eereegerak wone

1Ne ambi paga at Timoton nogo o endage Timana nage nagagerik, kwe tawe Pilitin mendek ambi enegen kagagerak. 2Enegen kenok, ame wage nagagerik, agalo-ogoba yorage logonet, “O Timana time, kwe tawe Pilitin mendek ambi nenegen kagarak me, nakwe aret kolaakit nduk wa nanip o.”

3Yorage mbareegi, agalo-ogoba nen at yogo logonet, “Kat koreewi mendek inapuri komologwe ilik, aakumi nit mendek inapurilogwe komologwe a, kat koloorak ndak-ndak abu lek iinok, it inagabolo mbana'lek aakumi Pilitin mendek inapuri koloorak wokkiri noorak nduk, yo'nirage agandik?”

Yoreegwaarak kwe, at Timoton nen ogoba yoge logonet, “Kolaga ti, an koloorak ndak-ndak aret kagarak me, wo'niri nak o,” yoreegerak. 4Timoton akwe ti mendek koloorak nogo ti, it aakumi Pilitin mendek nen Iterali mendek inabu'me tebembiirogo wonogwe iinok, at Aliku ALA nen ti paga, “Yilimbunuk, inoorikit,” mba'nuk, eeke kagak, agalo-ogoba ineenggo'lek me, yoreegwaarak.

5Ti'nuk, at Timoton nogo agalo-ogoba inom o Timana aret nogogwaarak. O Timana yabu anggur yarak me, wok yi nogo mbareegwa, abera'lek me nggeewo anini warak singa awooluk nen Timoton nibinikit nduk, ngguk irit wage mbareegi, 6at Aliku ALA Aberiniki omaawi oba age kagak, kambin aagaluk ineenggi paga nibinik-ndelenak eerogo wako mengga kwak, at we eenggi paga singa nogo nibinik-ndelenak eerogo warogo pereegerak. Eerogo pege nagagerik, “Yogop eekirak o,” yinuk, agalo-ogoba yoroolik puk a'nuk, 7nok-nok kolaga wonage me nage nagagerik, imbirak wone mbangge logonet, inikilom lombok mbareegerak.

8Ti'nuk, peebi nen kwe nogo abu kolaakit nduk, pekka nage logonet, agalo-ogoba inaa'nduk nogwe iigak, at Timoton nogo tu oolo time yobo yinuk, nggeewo anini warak singa eebe warak nogo pekka nage nagagerik, inikime nggiin pugunik iyagalo inom ninggirik wonage kagagerak. 9Kage nagagerik, nggiin ta'mbanak nogo eenggime waganogo nenet agalo-ogoba inowagam iya nage nagagerik, nggiin ta'mbanak eegu nogo agalo-ogoba wogoragagerak nunggugwaarak kwe, “Nggeewo singa warak paga nggiin kunik me waganggirak o,” yinuk, agalo-ogoba yoroolik puk agagerak.

10Ti'nuk, at Timoton ogoba nogo kwe tawe nogo pekka nage mbareegi, aap tawe nen kumi kologo logonet, laago lako menggaarak me, at Timoton nogo nen akwe koloorak nduk, laago lake me, 11it aakumi time mendek inigen kogo nogogwaarik, oreewi eekko'nok inom nege logowak nduk, aap ineebe 30 leenogo wogoreegwaarak.

12Wogogo mbareegwa, Timoton nen wone it yorage logonet, “An wone ambi eegu larogo negen yokkira o. Laago yi lako logonet, ne 7 eerugun me, ne 7 age yoboni naga'lek kagak wone yokkiraminggirak nogo, Alom ndogop nduk yagandak o, yo'nugwi kiinok, an nen yum nggorek yawenak amuni mbanak penggaarak 30 inom, ndi, yum agi-ogu yirika 30 inom, wokkiraagin o. 13Ndi, kit nen, Wone alom yi nduk yagandak o, yinuk, kwaarogo yo'nugwi lek kiinok perak, kit nen yum nggorek yawenak amuni mbanak penggaarak 30 inom, yum agi-ogu yirika 30 inom, ti an wo'nirumunggup o.”

Yorage mbareegi, it nen at yogo logonet, “Kat wone eegu laarogo yo'niroorak yagandak nogo konenggo logowok nen yo'niret o.”

14Yogo mbareegwa, at Timoton nen it yorage logonet,

“Nengga mendek inikime nen

Nonggo menggaarak mendek wungge,

Ndi, at alilaakwi mendek inikime nen

Ombat tele mendek wungge,

Eekerak o,”

yinuk, yoragagerak.

Yorage mbareegi, wone eegu laarak alom kwaakwi iigak, ne 3 aret age mbareegi, 15ko'lu paga it nen Timoton akwe nogo yogo logonet, “Wone laarogo kogonggelo nen yo'niragaarak nogo liirogon mbininogo yokkiruwak nduk, yorit unggu o. Yoremenggendak, yo'niraga'lek keenok, Nit ninamendek ndinggolaakit nduk, wiiniragaarak, komba'nuk, kagalo-kogoba inom menggaarak inom, kat inom, abok aret kineenik ngge-ngge kani pinagagun o,” yinuk, yoreegwaarak.

16Yogo mbareegwa, Timoton akwe nogo Timoton panggeppunuk, le ari logonet, Timoton yoge, “Wone eegu laarogo niruwi yoragandak nogo, Alom yi aret, yo'nega'lek me, kat nabuwa mbaka'lek keebi nombake keegi o.”

Yoge mbareegi, at nen, “An nagalo-nogoba kunduk yoroolik me, kat kenok yokkiriyak nduk, ari agandik ya?” 17Yoge mbareegi, laago ne 1 nen nok, ne 6 lakwi iigak, akwe nogo le ari logonet, yogak mban eeke mbareegi, ne 7 lakwi paga at Timoton nogo nen wone eegu laarogo yereegerak alom nogo yoge mbareegi, kwe nogo nen iruwi Pilitin mendek nogo yoragagerak.

18Yorage mbareegi, ne 7 nogo paga oonegen awo kilu yi naga'lek kagak, it aap o kota time mendek nen Timoton yogo logonet,

“Nggiin amburu kwak ombat abe negen ngge mbaken?

Ndi, nggeewo singa mendek alilaakwi kwak, alilaakwi negen ngge mbaken?”

Yogo mbareegwa, at nen it yorage logonet,

“Naanggo lembu kooli paga yabu ee'netak lek en,

Wone eegu laarogo yokkiragarak alom yelok kanetak lek o,”

yinuk, yoragagerak.

19Yorage nagagerik, wonage me, at Aliku ALA Aberiniki omaawi at oba ari wage mbareegi, o Atekelon nage nagagerik, it aap time mendek ineebe 30 inoorogo piinok, inayum nggoorogo wonok it aap wone eegu laarak alom kwaarogo yoreegwaarak nogo wogora wage nagagerik, anini kani kunik negen arit iyokan ogoba ame aret wagagerak. 20Wagagerak wonage kagak, at Timoton akwe nogo waganogo at Timoton lambumbugwi me, oreeluk imbirak wonagagerak nogo aret wogoreegwaarak.