Aakumi Miriyan mendek inooreegwaarak wone
1It aakumi Eparayim mendek nen aap Nggireyon yogo logonet, “Kat aap Miriyan mendek kinom wim namburi nage logonet, nit yo'niroolik nonggop nduk eekendak? Kat nonggop nduk nit togop ee'ninake agandik?” yinuk, it inoone maluk yiiwu yoreegwaarak.
2-3 Yogo mbareegwa, at Nggireyon nen it yorage logonet, “Kit eekotak ti kokwak, an ngge eekirak me yinuk, yogo ogotik? O Eparayim paga anggur anggen lek me warak me mbanggo logonet, mbuuluk mbanggwi, ndi, o Abiyetet paga anggur iyaalok mbanggo logonet, ambik aret mbanggwi, eeko menggaarak mbakop? Kit Eparayim mendek lek me warak me kwaakwi kiigak, at Ala nen aap Miriyan mendek inendagembogut Orep Teep imbirak kineenggime wokkiragaarak ti, Meek me, yinuk, yogo ogotik? Kit iya eekotak togop kwak, an ambi eerulik kagak nonggop nduk yo'nogo ogotik?” Yorage mbareegi, it inanini ombakwi nogo lek aret agagerak.
4Aap Nggireyon inom, awuri ineebe tiga ratus nogo inom, inowak lek agagerak kagak, inawim mendek nogo muguren niyo Yoraran aa'nggi paga ari nanuk, ene paga wundogogwaarak. 5Wunda nogo nogogwaarik, at Nggireyon nen it aap Tukot mendek nogo yorage, “An nawuri ninom wogwe yi, it aap Miriyan mendek inendagembogut Teba inom, Talumuna inom, muguren wogo logonet, it inowak lobak yegerak me, mbi ambi wogoraanip o.”
6Yoragagerak kwe, it aap Tukot mendek inoweewi nogo nen Nggireyon yogo logonet, “It aap Teba inom, Talumuna inom, imbirak ineenggi mbanak titik niraga'lek logonet, Nawuri yi mbi wogoroorak, yagandak nogo ti, nano eekaarak paga mbi wogoroorak ari agandik?”
7Yogo mbareegwa, at Nggireyon nen it yorage logonet, “Togop kenok, at Aliku ALA nen it aap Teba Talumuna imbirak an neenggime panemenggerak inooko logomonggoorik kenok, an nen mbiligit owak nombok-kombok eerak karume wonage nogo paga inom, poondo alok paga inom, kinagabolo nibinik-ndelenak eerogo kinoori woraagin o.”
8Yorage nagagerik, at Nggireyon awuri nogo inom o Punuwen ari nanuk, awuri inake mbi ngginooragagerak kwe, it aakumi o Tukot mendek nen yereegwaarak togo'nogo aret yoreegwaarak. 9Yogo mbareegwa, at Nggireyon nen aakumi Punuwen mendek nogo yorage logonet, “An wim eeppunuk, obeelom aret niyokan wage logonet, o yerek-nggorek wurik yi, minogo pinagi woraagin o,” yinuk, yoragagerak.
10Ndi, it aap wim eeka oonegen wundi wage menggim pa'nggwe mendek wim namburuwak nduk, wogogwaarak ineebe seratus dua puluh ribu inookwi iigak, aap lima belas ribu peberagangge aago mbaganeegwaarak nogo aap Teba Talumuna imbirak inom o Karokot time aret wonogogwaarak. 11Time ugun wonogwe me, at Nggireyon nogo nen tu it aakumi inawooliya yawukak-ndawukak nogo menggam o Noba Yogebeka imbirak oonegen wundi wage menggim pa'nggwe nogo paga nanuk, it inawim Teba Talumuna imbirak inawuri inom ugun kobak wonogwe me, inoba kwi'nari unggwogogwaarak. 12Kwi'nari unggwogo mbareegwa, it Miriyan mendek inendagembogut Teba Talumuna imbirak mbaganit nogo mbareegwa, aap Nggireyon awuri inom nen it ineegin warak nogo mugogo mappiigo logonet, it aap inendagembogut mbere nogo muguren-magaren eerit piginabeegwaarak.
13Ti'nuk, at Nggireyon awuri inom wim nambuppunuk, tu aanenggen endage Keret ti paga wambi wogo logonet, 14aap tawe o Tukot mendek ambi pigaganggo nogogwaarik, eegwa'me waganggo mbareegwa, at aap tawe nogo nen it aap o Tukot mendek inoweewi nagawan-nagawan ineebe 77 aret inendage liiru mbaneegerak. 15Mbanogo Nggireyon wogoge mbareegi, at Nggireyon nogo o Tukot unggwi wage nagagerik, it aap Tukot mendek yorage logonet, “Mbi wo'ninip o, yokkiragarak kwe, kit nen miyuk-meya eerogo panugo logonet, It aap Teba Talumuna imbirak ineenggi mbanak titik niraga'lek logonet, Nawuri inowak lobak yegerak yi, mbi wogoroorak, yagandak nogo ti, nano eekaarak paga mbi wogoroorak, yo'nogotak nogo ineebe yi kaanip o.”
16Yorage nagagerik, it aap Tukot mendek inoweewi nogo wone liirogon yogo logorak mamunggologo logowak nduk, mbiligit owak nombok-kombok eerak karume wonage nogo paga inom, poondo alok paga inom, inagabolo nibinik-ndelenak eerogo inooke, 17ndi, kota Punuwen o yerek-nggorek wurik nogo minogo punuk, it aakumi o kota time menggaarak inooke, eereegerak.
18Eeke nagagerik, aap Teba Talumuna imbirak yorage logonet, “Kit o Tabot nogome logonet, aap inookotak nogo ineebe nonggop me inookotak?”
Yorage mbareegi, it nen yogo logonet, “It ineebe ti, kat pogom aret o. Ndi, inobaabut ti, aap endagembogut apuri pogom aret o,” yinuk, yoreegwaarak.
19Yogo mbareegwa, at Nggireyon nen ari logonet, “It aap ti, ninagalo ambit nawurilogwe aret inookotak me, an nen Aliku ALA eenik menggerak endage paga abet aret yokkira o. Kit inoorulik ineenik teppiyaanetak en, an nen kit kunduk, kineenik teppinaganetak kwe, inookotak me, kinooruwi o.” 20Yorage nagagerik, at aput manggu ndarak endage Yetet nogo yoge logonet, “Aap yi, inooru o,” yoreegerak kwe, wulaga mbuuluk me, agabiti nen inoorulik puk agagerak.
21Puk age mbareegi, Teba Talumuna imbirak nen Nggireyon yogo logonet, “Kat kwe lek aap aret kenok, kat nen aret ninooru,” yinuk, yogo mbareegwa, at Nggireyon nogo mi'nage nagagerik, Teba Talumuna imbirak inooreegerak. Inooppunuk, inaanggumi unta inenggaanok paga inobaanggi-inobaangge aago wonage nogo nggoorogo waganeegerak.
Nggireyon nen yum agale warak epod nogo ogobakkigireegerak wone
22Ti'nuk, it aakumi Iterali nogo nen Nggireyon yogo logonet, “Kat nen aakumi Miriyan mendek ineenggime nen ninagap ndakendak me, kat aret ninarum logomenggendik, lek age keegak, kapuluk nen mi'nage, ti'nuk, kombooluk nen mi'nage, eeko logogun o.”
23Yoreegwaarak kwe, at Nggireyon nen it yorage logonet, “Lek o. An inom, napuluk inom, kinarum logogun lek o. Ata, at Aliku ALA nen aret kinarum logogin o,” yinuk, ari nagagerik, 24ambinom yorage logonet, “Togop aret kwe, an ambi nggino yokkira o. Kit nen wim eeko logonet, inaruk ayo inagugun mbuti emas waganggotak nogo kinalitak ambitak mban wo'ninip o,” yoragagerak. It Miriyan mendek nogo ti, aakumi Itamayen mendek me, inaruk ayo mbuti emas paga ogobakkigirik yiriko nogogwaarak me, yoragagerak.
25Yorage mbareegi, it nen yogo logonet, “Op aret me, niniki ale'nggen paga kuwak eerogo wokkiruwok o,” yinuk, mbogoyum nggween paga ndoombogo nogogwaarik, it abok nen inaruk ayo inagugun waganeegwaarak inalitak lombok wonok yum ndoonak nogo paga pi wogogwaarak. 26Mbuti emas inaruk ayo Nggireyon iri woraawak nduk, nggino yoragagerak wogori wogogwaarak nogo wakkogo logonet, aaninggin 20 aret agagerak. Ndi, inobaanggi-inobaangge eeko nogogwaarak mendek inom, meeli negen inenggaanok paga yiriko nogogwaarak inom, yum nggorek enete maa'ngga warak it aap Miriyan inendagembogut yiriko nogogwaarak nogo inom, mbuti keele yiluk-yiluk aago unta inenggaanok paga tugunogo pogo nogogwaarak nogo inom, wonok pi wogogwaarak nogo ti, apit aret me, inaruk ayo nogo inom lambumbunuk, ineenggi lingginulik.
27Pi wogo mbareegwa, at Nggireyon nen mbuti emas nogo paga yum agale warak epod eerogo ko'no negen mendaarogo punuk, at awi kota Opara time pereegerak me, kwe ambi ogonggelo mbo punuk, ya wukak menggi kwak, it aakumi Iterali nen Ala mbo punuk, yum agale warak epod nogo aret kugiwak negen eerogo punuk, alut eeri nogo nogogwaarak. Ti eekwi paga, yum epod nogo at Nggireyon inom, at apuri inom, ta'na pugu anggin pogom inoba luurik aret wonagagerak.
28Ndi, it Miriyan mendek nogo nen aakumi Iterali mendek inabu'me tebenak logonet, inuut pilak yuurak meek aret ogogwaarak me, o nogome Nggireyon eenik wonage kagak abolok lek obeelom wonage kagak, tahun 40 eereegerak.
Nggireyon kambeegerak wone
29Yowat apuluk Yeru-Mba'an nogo, wim abu aret eeppunuk, iyok paga ame ari wa'nuk wonagagerak. 30Ndi, at akuwi apit me, apurilogwe aap mban ineebe 70 aret ndaganabeegerak. 31Ndi, at akwe ambi ayeloman wogo o Tikem wonagagerak nogo kunduk, aagaluk aap aret obaane'me ndareegerak me, endage Abimelek tooneegerak. 32Ndi, at Yowat aput Nggireyon nogo abu li a'nuk kangge mbareegi, it aakumi inanebunu Abiyetet menggam, o Opara at ogoba Yowat nggween taambereegwam nogome aret taambereegwaarak.
33Ndi, at Nggireyon nogo awo aret kangge kagak, it aakumi Iterali mendek nogo, kwe ogonggelo mbo punuk, ya wukak menggi kwak, Ala mbo punuk, obaane'me inagugi Lunik nogo, endage Mba'an-Mberit mippunuk, mugurok nogo nogogwaarak. 34It Iterali nogo nen inawim inaagan-ambokan wonogwe ineenggime nen inagap ndareegerak at Aliku inogoba Ala nogo kobak eerogo pugwi, 35ndi, at Yeru-Mba'an, endage ambi Nggireyon nogo nen, it Iterali abu obeelom togon eeppiige nagagerak kwe, apurilogwe nogo, “Wa,” yinuk, obeelom eeppiyoorak op kagak mari eerogo piigwi, eereegwaarak.