Nggireyon eereegerak wone
1It Iterali mendek nogo Aliku ALA enegen kagak, maluk ambinom mban eerit nogo mbareegwa, at Aliku ALA nen ineebe waganogo aakumi Miriyan mendek ineenggime piyareegerak wonogwe iigak, tahun 7 eereegerak. 2Eeke kagak, it Miriyan mendek nen Iterali tebenogo inabu'me piinok, wonogwe mban mbareegwa, aakumi Iterali nogo nen kumaarak logowok nduk, puut nggelok-nggobok paga time o mi-mi wambeegim abu'me inom, ndoome inom, yugum ambe nggaganak me inom, ogobakkigippatinuk, wonogogwaarak.
3Wonogo logonet, it Iterali mendek kulinik-kalinik yabu eeppunuk, yi mendek ndi mendek yakaatak nogo op age kenok, it aap Miriyan mendek inom, Amalek mendek inom, aap ando karume oonegen lagi wage menggim pa'nggwe wonogwe inom, nogo nen o tebenggolaawok nduk, wogo logonet, 4-5ineebe inom, inaanggumi unta inom, ineebe ambik ineenggi lingginiyak abu meek, yibila pogom aago inaanggumi inom, inawooliya wuka inom, ko'nok, it Iterali wonogwe me inawooliya wuppatinuk, Iterali ineyabu yarak yenak-kenak eerogo piinet, o Nggata kuli paga Iterali inamindik-inamendek inaanggumi ndomba-lembu inom, keledai inom, ambit-ambi teppiiga'lek abok aret yelaagani-mbelaagani eerogo piinet nogo nogogwaarak. 6Piinet nogo logonet, aakumi Iterali mendek ineenggi abu lek eerogo piigo mbareegwa, it Iterali mendek nen, “Yeenggwa niret o, ninogoba,” yinuk, inoone nggwok paga Aliku ALA nggino yogo nogogwaarak.
7It Miriyan mendek nen eeppiigwi nogo paga it Iterali nen togop aret inoone nggwok paga Aliku ALA yogo mbareegwa, 8at Aliku ALA nen yorage kagak yoraga mendek ambi inowagam nappi wage mbareegi, at nen it aakumi Iterali nogo yorage logonet, “At Aliku Iterali kinogoba Ala nogo nen yegerak nogo yokkira o. Kit o Metit aakumi inayeloman eeppinagago wonogwe me, wokkiren wundi wage logonet, 9it aakumi o Metit mendek ineenggi omaawi paga tebembinagago wonogwe me, at nen ndinggiren wage, it aakumi o yime menggaarak nen kinooruwok nduk eekwi me, kinagap ndake logonet, at aa'nduk a'nuk, it mugogo wumbiinok, inanggween ti wokkirage, eeke nagagerik, 10yokkirage logonet, Naliku kinogoba Ala an aret me, it aakumi Amori inanggween paga wonogo logonet, nobaane'me inagugi mugurok nogo logobok o, yinuk, liirogon aret yokkiragagerak kwe, kit at oone abu konengga'lek aret monggotak o,” yinuk, yoragagerak.
11Ti'nuk, ne ambi paga aap anebunu Abiyetet mendek endage Yowat apuluk Nggireyon nogo, aap Miriyan mendek inigen kogwe iinok, waganggwi iyo, o Opara at ogoba ageyo teno alome time anggur aambiranggo menggam kiraarak logonet, gandum agabolo leenogo punuk, eebe mban wagangge me, at Aliku ALA ayonggo malayikat nogo wage nagagerik, eyo alome time aret kwi'nagagerak. 12Kwi'nage nagagerik, Aliku ALA ayonggo malayikat nogo at kaawak nduk kin a'nuk, Nggireyon yoge logonet, “Kat aap wim nambuka wakaa'ngget lombok aret me, at Aliku ALA kimbirak wonage o.”
13Yoge mbareegi, aap Nggireyon nen Aliku ALA ayonggo nogo yoge logonet, “Ai, nogoba o. At Aliku ALA ninom abet aret wonage kenok, nonggop nduk aaninggin-paaninggin yi, ninoba age agaarik o? Ninombomini nen nit yo'nirogo logonet, At Aliku ALA o Metit nen wo'niren wundi wage logonet, Eerubok mendek ndogop eerit wage kogogurak o, yinuk, mbininogo yo'nirogogwaarak nogo ngge o? Togop eeppinaniyak op aret kwe, kagak, yogondak nit mbo pinangge logonet, aakumi Miriyan mendek ineenggime pinanggerak wonogo ogoorik o.”
14Yoge mbareegi, at Aliku ALA nen ena koonogo Nggireyon pekkaanuk, yoge logonet, “An nen kat ambi eeriyak nappagakit nduk woroolik mbaken? Ambi eeriyak nappagakit nduk, aret wagarak me, komaawi eeke menggendak ti paga aret aakumi Iterali it Miriyan mendek ineenggime nen inagap ndarenok nduk, pipuk eeke logot o.”
15Yoge mbareegi, at Nggireyon nen ari logonet, “Ai, Kaliku nogoba ALA o. Togop yo'negendak kwe, nowe-nawot iya iigak, an abu mbuuluk aret o. Ndi, nanebunu Manate mendek kunduk, mbuuluk mban aret me, an nonggoti agago aap Iterali mendek inagap ndariyak?”
16Yoge mbareegi, at Aliku ALA nen, “Lek o. An yeenggwa kege neegak, it aakumi Miriyan mendek nogo ti, we negen aret aap ambit wake negen inoorumunggun o.”
17Yoge mbareegi, at Nggireyon ari logonet, “Kat nen, An op aret eerit noorak, nombakendak kenok, kat nen aret yo'negendak yelok kaakit nduk, neenu agak ambi eeppanu o, nogoba. 18Eeppanenok nduk, kake ambi kwaari nanuk, wokkiri woraakit nen to'nake logot o.”
Yoge mbareegi, Aliku ALA nen, “An ya'i tokkake wonage me, neya woraanok nduk nak o,” yoreegerak.
19Yoge mbareegi, Nggireyon nogo oome nanuk, kambin aagaluk ambi warogo lake, gandum anggen yigirik 22 liter negen waganogo oroti piika'lek mendek pega'lek kagak woraake, eeke nagagerik, kambing larak nogo muun yarak me yonggoke, ndi, kambing larak amburu nogo yiiwa'na tooke, ee'nuk, at nogo eyo teno alome time awo tokkage wonage me, wogori wagagerak.
20Wogori wage mbareegi, Ala ayonggo malayikat nogo nen Nggireyon yoge, “Kambin larak inom, oroti piiruwak nduk pega'lek kagak woraarak inom, yugum paga taati punuk, amburu ti obaga kilirogo pu o,” yoge mbareegi, ndak-ndak aret eereegerak. 21Eeke mbareegi, Aliku ALA ayonggo nogo nen owaanggun eenggime wonage irip paga kambin larak inom, oroti woraarak nogo inom, mbaanggage kagak, yugum nogo kani wunuk ari logonet, kambin larak inom, oroti woraarak inom, abok aret nengge kagak, Aliku ALA ayonggo nogo iyo'lek aret lek agagerak.
22Iyo'lek aret lek age mbareegi, at Nggireyon nen, “Ti Aliku ALA ayonggo aret,” yelok kage nagagerik, “Ie! Kaliku Kitok Menggendak nogoba Ala kayonggo malayikat mendek aret kagak, nimbirak ninengga pet-pet yogoorak me, nagabiti o.”
23Yoge mbareegi, at Aliku ALA nen at yoge logonet, “Kagabiti yugun o. Kat kambumunggun lek me, kiniki tayenak ugun logot o.”
24Yoge mbareegi, at Nggireyon nogo nen o taa'nogo Aliku ALA abekak yogo logowak nduk, yugum logonogo pege nagagerik, yugum ti endage, “Niniki Tayenogo Pinanega Ti, Aliku ALA aret o,” yinuk, toonogo pereegerak. Ndi, yugum logoneegerak nogo ti, it aap Abiyetet mendek iname o Opara time yogondak kunduk wonage aret o.
25-26Oonikiya ti paga at Aliku ALA nen Nggireyon yoge logonet, “Kat kogoba agugi Mba'an aanggo warogo wogogak ogobakkigirik nogo minogo pege, aanggo warogo wogogak ogobakkigirik eraaninu kugigwe Atiyera ageyo yinik nogo mbanogo pege, eerogo punuk, obaane'me nggween tiyanak ti paga Naliku an kogoba Ala nake warogo kani kungge logowam obeelom lombok ogobakkigippege logomenggendik, kogoba aanggo aa'nduk ndarak kagak, ambo'me ndarak tapi ngguunok obeelom lombok tahun 7 eerak kenok, wonok wage logomenggendik, kugigwe Atiyera ageyo yinik mbanogo pemenggendak ti paga tapi ambo'me ndarak nogo warogo an Naliku ALA nake kani kunu o.”
27Yoge mbareegi, Nggireyon nen ayeloman ineebe 10 wogoren Aliku ALA nen at yoreegerak nogo ndak-ndak eeriyak nduk, nogogwaarak kwe, at owe-awot inom, aap o time mendek inom, inenggaanom paga eeriyak agabiti nen, liingge paga eerulik, ata, oonikiya paga aret eereegerak.
28Kuubondendok o weege mbareegi, it aap o time mendek nen ineenik a'nuk, inagugi aanggo warogo wogogo menggam ogobakkigirik minogo pugwi, inaanggo warogo wogogo menggam eraaninu inagugi Atiyera ageyo yinik nogo mbanogo pugwi, eerogo punuk, obaane'me Ala ake warogo wogogo logowam ogobakkigirogo punuk, tapi ambo'me ndarak nogo warogo kani kuneegwaarak aan ndunik mban kogogwaarak.
29Kogo nogogwaarik, it mban-mban wone mbanggo logonet, “Ta nen eeki mbakop?” yinuk, liirogon kin woginet nogo mbareegwa, aakumi nen, “Lek o. Aap Yowat aput Nggireyon nen aret eekerak o,” yinuk, yogo mbareegwa, 30it aap inawi kota time mendek nen aap Yowat nogo inoone omaawi paga yogo logonet, “Kat kaput ti nen ninagugi Mba'an aanggo warogo wogogo monggom nogo minogo pege, ndi, warogo wogogo monggom eraaninu ninagugi Atiyera ageyo yinik nogo mbanogo pege, eekerak ti, kambuwak nen waruwok nduk wonok yime wundi omok o.”
31Yogo mbareegwa, at Yowat nen it at apuluk waruwok nduk, kuwak ari wogogwaarak nogo yorage logonet, “Kit kugi Mba'an kinom a'nuk at aana'le mbanggwi, ili yogwe, eeruwok nduk, yogo ogotik? Aap ambit-ambi kugi Mba'an aana'le mbangge kenok, o awo weega'lek kagak, at warogo puurak aret o. Ndi, at Mba'an ti, kugi aret kenok, at aanggo warogo wogogo menggam minogo pugwi iinok, obaalombok aret ogobakkigikkolage logowak o.”
32Yorage mbareegi, aakumi nen, “At Mba'an aanggo warogo wogogo menggam ti, Nggireyon nen aret menggerak me, Mba'an Nggireyon imbirak mban eekwi iyaawok o,” yinuk, ne ti eyom paga Nggireyon endage Yeru-Mba'an aret tooneegwaarak.
33Ne ti eyom paga it aakumi Miriyan mendek inom, Amalek mendek inom, aakumi o karume oonegen wundi wage menggim pa'nggwe mendek inom, inanebunu lombok apit aret kuwak ari woraanuk, yi Yoraran wunda wogo nogogwaarik, o kobappaga Yiteren time inawooliya wuppatinuk, wonogwe iigak, 34Aliku ALA Aberiniki at Nggireyon oba age mbareegi, at Nggireyon nen it aakumi Abiyetet mendek kuwak ari wogwe iinok, inom wim eeri nawok nduk, oone nggwok eeka trompet nogo oone pu eeke nagagerik, 35it Manate mendek wonogwe me wim yonggo nappiige logonet, it aakumi Atet mendek inom, Tebulon mendek inom, Natali mendek inom, inom wim eeriyak abok woraawak nduk yonggo nappiige mbareegi, it nogo abok aret Nggireyon iyo'me ari wogogwaarak.
36Ari wogo mbareegwa, at Nggireyon nen Ala yoge logonet, “Kat nen an paga aakumi Iterali mendek inagap ndarumunggun o, yo'negendak nogo an ambi yokkiri o. 37An ndomba eeruwak mbanak waganogo gandum anggen agabolo mbelanggo menggam nggween paga ndoombunuk, ko'lu o weege paga nggween nogo woloonak kagak, ndomba eeruwak mbanak nogo mban konaananggen luurogo pemenggerak wonage kenok, yo'negendak nogo ndak-ndak, kat yeenggwa nege keegak, an nen aakumi Iterali inagap ndariyak nogo neenu arigin o,” yinuk, yoreegerak.
38Yoreegerak nogo ndak-ndak aret agagerak me, at Nggireyon ko'lu kuubondendok eenik a'nuk, ndomba eeruwak mbanak nogo paga konaananggen luurik nogo amburu aambiranogo togolowak yi toologo nonggo menggam ambit me eno korok togon tooleegerak.
39Tooppunuk, at Nggireyon nen Ala yoge logonet, “Ndomba eeruwak mbanak nogo paga ogut wakkoorak nduk, ne ambinom eeriyak yokkirigin me, keebi nombarugun o. Ne yogondak yi paga mban ndomba eeruwak mbanak nogo woloonak kagak, nggween paga mban konaananggen luurogo puwak nduk, eeru o.” 40Yoge mbareegi, Ala nen oonikiya ti paga, yoreegerak nogo ndak-ndak aret eereegerak me, ko'lu kuup nen ndomba eeruwak mbanak nogo abu woloonak aret kagak, nggween paga mban konaananggen luurik wonage kagagerak.