OWAK LOONGGA 3:1-31

 It o Kanan menggaarak teppiyareegerak wone

1-2It aakumi Iterali mendek ando inom, inombowologwe wigannarit nogo logogun nogo inom, o Kanan logonet, wim nambukwi me inom nambuko logolik ineenggo'lek me, wim eekwi mamunggologo logowak nduk, at Aliku ALA nen, “Mugogo wumbiigwi iyaamun ilik?” yinuk, inabut mbanikit nduk, yi aakumi ndi aakumi o Kanan mendek inom teppiyareegerak nogo yi aret.

3Aap Pilitin mendek inendagembogut ineebe 5 inom, it aakumi Kanan mendek abok aret inom, it aakumi Tiron mendek inom, it aap Kewi mendek o Libanon nggelok-nggobok puut Mba'an-Keromon kuli nen nok, tu Kamat nogo menggam kuli wonogwe nogo inom, teppiyareegerak. 4It teppiyareegerak nogo ti, at Aliku ALA nen, “Yogop ee'nu ndogop ee'nu,” yinuk, Muta lengganogo yoge kagak, it Iterali inombomini yorage nagagerak nogo, “It Iterali mendek ndak-ndak eekwi iyaamun ilik?” yinuk, inabut mbanikit nduk, teppiyareegerak.

5Teppiige mbareegi, it Iterali mendek nogo ti, it aakumi Kanan mendek inom, Ket mendek inom, Amori mendek inom, Perit mendek inom, Kewi mendek inom, Yebut mendek inom, inenggela'me aret wonogogwaarak. 6Wonogo logonet, it aap Kanan mendek inapurilogwe komologwe nogo it Iterali mendek wogonakwi, ndi, it Iterali mendek nen inapurilogwe komologwe it Kanan mendek inapuri kolaawak nduk, wogorogwe, eeko logonet, Aliku ALA mugurok nogwe obaane'me it Kanan mendek inagugi inayuk wuko logonet, mugurok nogo nogogwaarak.

Aap O'niyen eereegerak wone

7It aakumi Iterali nogo nen at Aliku ALA enegen kagak maluk mban eerit nogo logonet, at Aliku inogoba Ala inee'nggot a'nuk, aakumi Kanan mendek inagugi endage Mba'an inom, inagugigwe Atiyera inom, inayuk wuppunuk, mugurok nogo nogogwaarak. 8Eekwi iinok, Aliku ALA anini wuk togon Iterali mendek inoba piige nagagerik, waganogo it aakumi Aram-Metopotamiya mendek inowe endagembogut Kutiyan-Iritiyayim eenggime pege mbareegi, at abu'me tebenogo piyareegerak wonogwe iigak, tahun 8 aret eereegerak.

9Eeke mbareegi, Iterali nogo nen inoone nggwok paga Aliku ALA yogwi iinok, Aliku ALA nen inagap ndaruwak nduk, aap Kalep awuluk Kenat apuluk O'niyen aret mippereegerak. 10Mippege nagagerik, it Iterali mendek inowak loongge logowak nduk, Aliku ALA Aberiniki at oba age mbareegi, aap Aram mendek inowe endagembogut Kutiyan-Iritiyayim imbirak wim eekwi iigak, Aliku ALA nen aap ti, O'niyen eenggime pege mbareegi, aap nogo tebenogo pereegerak. 11Tebenogo punuk, o nogome abolok lek obeelom wonage kagak, tahun 40 eeke mbareegi, aap Kenat aput O'niyen nogo aret kambeegerak.

Aap Ekut eereegerak wone

12Ti'nuk peebi nen, it Iterali mendek nogo Aliku ALA enegen kagak maluk ambinom eerit nogwe iinok, at Aliku ALA nen aap Mowap mendek inowe endagembogut Egolon nogo, aakumi Iterali mendek tebenogo piyaawak nduk, omaawi eeppege mbareegi, 13at Egolon nogo nen it aakumi Amon mendek inom, Amalek mendek inom, inom lambumbunuk, it Iterali mendek inoba kwi'nogo nogogwaarik, o kota Nggabunggaame nogome tebenggologogwaarak. 14Ndi, it aakumi Iterali nogo it aakumi Mowap mendek inowe endagembogut Egolon abu'me tebenogo piyareegerak wonogwe iigak, tahun 18 eereegerak.

15Ti'nuk, it Iterali mendek nogo nen inoone nggwok paga Aliku ALA yogo mbareegwa, inagap ndaruwak nduk, aap anebunu Mbeniyamin mendek ambi endage Nggera apuluk eenggi kwaarek Ekut nogo aret mippereegerak. Mippege mbareegi, it Iterali mendek nen wu inarum wonage onggo pugu Ekut oreewi inom wonok it Mowap mendek inowe endagembogut Egolon wogori nawak nduk nappiyareegwaarak. 16Nappiyareegwaarak nogo logonet, Ekut nogo nen paloowi engget abeenok-abeenok maarak nggorek metet oolo negen ogobakkigireegerak nogo, ambulok me ayum enoona nonggoninuk, 17aap Mowap inowe endagembogut Egolon eebe aanogum nggwok wonage me, wu onggo pugu nogo wogori nogogwaarak. 18-19Wu inarum wonage onggo pugu nogo wogogo nogogwaarik, yugum inagugiwak ogobakkigiko menggam o Nggilagan koorok time ari woraanuk, it aap inom wu wonok nogogwaarak nogo, at Ekut nen iname nappiya woraanuk, at alik iyokan yungguninuk aap endagembogut nogo pekka nage nagagerik, yoge logonet, “Nogoba wae. An nen kote wone ambi yokkiri o.”

Yoge mbareegi, at Egolon nen aap at ake eeka nogo, “Wundi nanip o,” yorage mbareegi, it at ake eeka abok aret wundi nogogwaarak.

20Wundi nogo mbareegwa, at Egolon nogo togwi unggwagak awi o nggwok abe wurik ko ambi irimbaga time ari laganuk, alik aret kwi'ndak wonage me, at Ekut nogo owagam nage nagagerik, “At Ala nen wone ambi yokkiriyak nduk, nappani waga o,” yinuk, yoge mbareegi, konenikit nduk, aap Egolon mi'nage kagak, 21aap Ekut nogo eenggi kwaare'nggan nen paloowi ambulok abe'nggan wonage nogo nggiginogo aap endagembogut aanagale me ndanuk togon mambereegerak.

22Mambege mbareegi, amok ambik me, paloowi unggun nogo lobok togon unggwage logonet, irip eebe abeenok polok togon wungge logonet, unggun nogo amok nen kagareegerak me, aap Ekut nogo paloowi nggiginulik, kunik kagak, 23wundi nanuk, o ko ogoorak irimbaga wonage nogo tungga nappunuk, kunti omaawi nake nagagerik, wundi wagagerak.

24Wundi wage kagak, aap endagembogut ayeloman mini nogo nen ko ogoorak irimbaga nogo tu narak inigen kogo nogogwaarik, yogo logonet, “Omayo mboongge menggim time omayo mboongge ilik?” yinuk, 25tokkogogwaarak kwe, tu paa'nuk wundi waga'lek kenok, ayeloman mini nen iniki aaninggin aganake mbareegi, kunti ore waganogo tu kuuko nogogwaarik, it inogoba nogo kambeegerak nggween paga ngginik wonage kogogwaarak.

26Ti eekwi iigak, at Ekut nogo nabik-nabok yugum inagugiwak ogobakkigiko menggam nogo kagak, o endage Teyira pa'nggwe time kole wagagerak. 27Wage nagagerik, o Eparayim puut nggelok-nggobok time ari nanuk, it Iterali mendek wim namburi woraawak nduk, oone nggwok eeka trompet nogo oone pu eeke mbareegi, it nogo kuwak ari wogo mbareegwa, at aa'nduk a'nuk, puurom nen wambi wogogwaarak.

28Wambi wogo logonet, it yorage, “At Aliku ALA nen kinom wim mbanak aakumi Mowap mendek muk nineenggime pinanggerak me, ninom nawok nduk, woraanip o,” yinuk, inom puut paga nen wura wogo nogogwaarik, it aakumi Mowap mendek niyo Yoraran mbanggo menggam tebembunuk, wonogo logonet, aakumi wunda nogwe iyo, non mbambiigo nogogwaarak. 29Eeppunuk, ne ti eyom paga it Iterali mendek nen Mowap mendek inooko logonet, aap wakaa'ngget inomaawi ambik ineebe sepuluh ribu ambit-ambi mbaganulik abok aret pup eerogo inooreegwaarak. 30Inooko nogogwaarik, it Iterali mendek nogo nen aakumi Mowap mendek inabu'me tebenogo piinok, o nogo abolok lek obeelom wonage kagak, tahun 80 aret eereegerak.

Aap Tamagat eereegerak wone

31Eeke mbareegi, aap Ekut obaane'me aap Anat apuluk endage Tamagat nogo mi'nagagerak. Mi'nage nagagerik, eyo tapi teerage menggerak mendek nogo paga aap Pilitin mendek ineebe enam ratus inooreegerak. Ti inooreegerak paga at kunduk aakumi Iterali mendek inagap ndarogo piyareegerak.

OWAK LOONGGA 2:1-23

 Ala ayonggo malayikat nen o Mbokim eereegerak wone

1At Aliku ALA ayonggo malayikat nogo o Nggilagan nen o Mbokim wage nagagerik, Iterali mendek nogo yorage logonet, “An o Metit nen wokkiren kinombomini wone kumbuk mbanogo yoragagim yime pinagi wage nagagirik, yokkirage logonet, Kit an ninom wone abuk nggaruk togon koonogo pereegurak nogo an nen lek eerogo pigin lek o. Ata, mondok-mondok aberak aret logogin o, yinuk, yokkirage nagagirik, 2 it aakumi o yime wonogwe nogo kinom lambunna'nuk, wone koonogo puurak lek o. Ata, kit nen inagugi aanggo warogo wogogo menggam ogobakkigirik yinik-minik eerogo pinip o, yokkiragagirak kwe, kit nen an yokkiragagirak nogo taganogo punuk eerit nogwe ti, nonggop nduk, eeko ogotik? 3Togop aret me, it aakumi o yime menggaarak yi, kit wonogwe me nen, an naa'nduk a'nuk mugogo wumbiyaagin lek o. Kinom ogoorak aret logonet, an nalut eekwi nobaane'me inagugi alut eerumunggup nduk, keele pugu pogom nggelenogo pinagagin o,” yinuk, yoragagerak.

4At Aliku ALA ayonggo nogo nen wone abok aret yorage mbareegi, it Iterali mendek nogo nen leenggu nggwok maareegwaarak. 5Leenggu maako nogogwaarik, o taa'nogo endage, Leenggu Maakom o, yinuk, toombunuk, time at Aliku ALA ake warogo wogoreegwaarak.

Yotuwa kangga'lek kagak eereegerak pelaareegwaarak wone

6At Yotuwa nen it aakumi Iterali iname nappiige mbareegi, ineyate kwak nggween inalitak lombok tumburiragagerak nogo unde a'nuk logowak nduk, nogogwaarak. 7Ndi, it Iterali ti, at Yotuwa eenik wonage kagak, Aliku ALA mugurok nogwe, ndi, kangge kagak, Iterali inoweewi at Aliku ALA nen Iterali eeppiige inigen kogogwaarak nogo awo ineenik wonogwe iigak kunduk, Aliku ALA mugurok nogwe, eeko nogogwaarak.

8Ndi, at aap Nun aput Aliku ALA ayeloman Yotuwa nogo, ndarak kagak tahun seratus sepuluh eeppunuk, kangge mbareegi, 9 puut Nggaat o omarip paga pa'nggwe o Eparayim puut nggelok-nggobok me o Timanat-Tera yate negen anggween mbanogo pereegwam nogome aret nggween taambereegwaarak.

10Nggween taanogo pogo nogogwaarik, it aap Yotuwa inom ndak-ndak ambugwi tawe ogogwaarak ndarak kero, abok aret inombomini nogogwam nggwogoba wonogwe me nogwe iigak, inobaane'me nda'nogogwaarak nogo, Aliku ALA inom, ndi, Aliku ALA nen Iterali eeppiige nagagerak nogo inom, ineenggo'lek aret wonogogwaarak. 11Wonogo logonet, Aliku ALA enegen kagak maluk mban eerit nogo logonet, aakumi ti mendek inagugi Mba'an mban inayuk wuppunuk, mugurok nogo nogogwaarak.

12Mugurok nogo logonet, Iterali inogobamini inogoba at Aliku Ala o Metit nen wogoren wagagerak kagak, mbo punuk, at alut eekwi obaane'me it aakumi enaagan-ambokan time wonogwe nogo inagugi inayuk wuko logonet, mugurok nogwe paga, Aliku ALA anini eeppiyaawak nduk, eeppereegwaarak. 13At Aliku inogoba Ala mbo punuk, aakumi ti mendek inagugi Mba'an inom, Atitoret inom, mugurok nogo mbareegwa, 14at Aliku ALA nen anini inoba piige logonet, inamendek kiraari unggwi wogo logowak nduk, eeppiige, inawim enaagan-ambokan wonogwe nogo nen inoori unggwi wogo logowak nduk, eeppiige, eeke kenok, it ko wappunuk logorak meek aret age nagagerak. 15At Aliku ALA nen wone kumbuk mbanogo yoragagerak ndak-ndak, wim namburiyak nduk wundi nogwe iinok, ineegin tebek yuwak nduk, Aliku ALA nen eeppiige kagak, aaninggin-paaninggin alik negen inoba age nagagerak.

Ala mbo pugwi iinok, aap inowak loongga mippiyareegerak wone

16It aakumi maluk eeppiigwi wonogwe nogo ineenggime nen inagap ndaruwak nduk, at Aliku ALA nen aap inowak loongga mendek ambi mippegak, ambi mippegak, mban eeke nagagerak. 17Ambi mippegak mban eeketak kwe, it aakumi Iterali nogo nen aap inowak loongga inoweewi inoone ti, liirogon konenggo logolik. Ata, it nogo nen kwe ambi ogonggelo mbo punuk, ya wukak menggi kwak, at Aliku ALA mbo punuk, obaane'me kugi inayuk wuppunuk, mugurok nogogwaarak. At Aliku ALA nen, Yogop ee'nu ndogop ee'nu, yegetak inombomini liirogon konembunuk, eerit nogo nogogwaarak nogo kwak, eeka'lek inombomini eeko nogogwaarak mbet-mbet mari eerogo mbo punuk, alik eerit nogwe paga inawim ineenggi paga piyareegerak.

18Piyareegerak wonogwe me, inawim nogo nen tebenogo piigwi, andi-pandi eerogo piigwi, eekwi iinok, “Ai! Ao!” yogwe nogo at Aliku ALA aruk konembunuk, inabuwa nen inake kulinik-kalinik aap inowak loongga mippege nagaatik, yeenggwaage kagak, at eenik wonage logonet, it aakumi Iterali nogo inawim ineenggime nen inagap ndake nagagerak. 19Ti'nuk, aap inowak loongga nogo kangge kenok, it aakumi Iterali mendek nen inombomini maluk mbuuluk negen eeko nogogwaarak kwe, it perak, maluk nggwok lombok eerit nogo logonet, Aliku ALA obaane'me kugi inayuk wukwi, mugurok nogwe, eerit nogo nogogwaarak. Togop mban eerit nogwe iigak, at Aliku ALA nen inowak loongga ambi mippege, kangge kenok ambi mippege, eeke nagagerak. It Iterali inogogumbuk a'nuk, maluk eerit nogo nogogwaarak nogo ti, mbo puurak mbaka'lek, kundugu aret eerit nogo logorak mbareegwaarak.

20Togop aret eerit nogwe iinok, it aakumi Iterali mendek nogo, Aliku ALA anini inombake logonet, “O maan it inombomini, Yogop eeko logorak o, yinuk, wone ninom koonogo pereegirak nogo, it aakumi yi, konengga'lek taganogo mbo pegaarak me, 21at Yotuwa nen yi aakumi ndi aakumi inenggela'me nen mugogo wumbiiga'lek logonet kambeegerak nogo, yogondak yi paga an nen aakumi yi, inanebunu ambiriluk ambi mugogo wumbiyaagin lek o. 22Ata, It aakumi Iterali inombomini an Naliku ALA nen wone yoragagirak nogo, nggirik-nggerok porogo logonet, eerit nogo nogogwaarak nogo ndak-ndak, it yogondak togop aret eekwi iyaamun ilik? yinuk, inabut mbanikit nduk teppiyaagin,” yereegerak.

23Wone yereegerak ti paga at Aliku ALA nen yi aakumi ndi aakumi mbet-mbet mugogo wumbiyaawak nduk, Yotuwa eenggime puulik inom time logowak nduk, teppiyareegerak.