Yotuwa 10:1-43

 Wim eekwi iigak, oonegen puk agagerak wone

1At Yotuwa nen o Yeriko inom, aap inendagembogut inom, eeppiyareegerak nogo ndak-ndak, o Ayi kunduk, aap inendagembogut kunduk, togop mban lek eerogo piinok, tebenggolagagerak nogo inom, ndi, it aakumi Nggibeyon mendek aakumi Iterali inom wone mbambunuk, inenggela'me wonogwe nogo inom, aap endagembogut Yerutalem mendek endage Aroniterek nen aruk koneneegerak. 2Aruk konengge nagagerik, “O Ayi ti mbuuluk. Ndi, o yaga'lelo Nggibeyon ti, kota nggwok lombok aap endagembogut ambi abu'me piige menggim kwak wonogo logonet, it aakumi o Nggibeyon mendek tigitogon wim nambuka wakaa'ngget mban wonogwe o,” yinuk, aap Aroniterek inom, at apuri inom, nogo nen aakumi Nggibeyon ineebe paga inagabiti mbareegwaarak.

3Inagabiti mbako nogogwaarik, aap endagembogut o Yerutalem mendek Aroniterek nogo nen aakumi Keboron mendek inowe aap endagembogut Kokam inom, aakumi Yarumut mendek inowe aap endagembogut Pireyam inom, aakumi Lakit mendek inowe endagembogut Yapiya inom, aakumi Egolon mendek inowe endagembogut Ndebit inom, yorage logonet, 4“Aakumi Nggibeyon mendek nogo nen at Yotuwa inom, aakumi Iterali inom, inom lambunggaarak me, nit nen it aap Nggibeyon mendek inoori nawok nduk, ninom lambuni woraanip o.”

5Yorage mbareegi, aap endagembogut Keboron mendek inom, Yarumut mendek inom, Lakit mendek inom, Egolon mendek inom, Yerutalem mendek inom, it Amori mendek inowe inendagembogut 5 ti, inawuri wim nambuka abok aret inom lambumbunuk, it aakumi Nggibeyon inom wim namburuwok nduk, it wonogwe me mondok panggok togon time aret inawooliya wuri wogogwaarak.

6Wuri wogo mbareegwa, aakumi Nggibeyon mendek nen at Yotuwa o Nggilagan ooliya wuppunuk wonage me, yori wogo logonet, “Kayeloman mini nit yi, aakumi Amori mendek puut nggelok-nggobok wonogwe me time inoweewi inendagembogut abok aret lambumbunuk, ninooruwok nduk, korotok ninowagam panggoni wagaarak wonogwe me, nit kat keenggime wonogwe nogo eraangge mbo pinaniyak ti abu mage o. Ata, ninagap ndariyak nduk, mbet-mbet aret yeenggwa nira woraanip o.”

7Yori nogo mbareegwa, at Yotuwa awuri wim nambuka aap wakaa'ngget inom abok aret it aap Nggibeyon mendek inom a'nuk, wim eeriyak o Nggilagan nen wundi nawok nduk, eeko mbareegwa, 8at Aliku ALA nen Yotuwa yoge logonet, “It ineebe paga kagabiti mbarugun o. An nen muk kineenggime pinagagirak me, it nen ko wappunuk logogun lek o.”

9Yoge mbareegi, at Yotuwa awuri inom o Nggilagan nen oonikiya aret wundi nogo nogogwaarik, nogwe iigak, o weege mbareegi, yini-panip aret inoba kwi'nogwe iigak, 10at Aliku ALA nen it aakumi Amori mendek yale-pale eerogo mappiige mbareegi, it Yotuwa awuri inom nen aakumi Amori mendek abok aret, o Nggibeyon time mondok iya aret inoorogo piinok, tu Mbet-Koron lagi nogo menggam nogo paga muguren inoorit o endage Ateka inom, o Makera inom, aret ari nogogwaarak.

11Inoorit nogo mbareegwa, it aap Amori mendek nogo tu Mbet-Koron paga mbaganit o Ateka ari nogwe me, at Aliku ALA nen mayu kumulinggen nggwok lombok inoba mbo wuppit wagagerak paga kambit nogogwaarak ti, ineebe ambik lombok aret o. Ndi, aakumi Iterali inawooluwak paga inooreegwaarak nogo ti, ineebe mbereeluk aret inooreegwaarak o.

12At Aliku ALA nen it Amori mendek aakumi Iterali wogorage mbareegi, inoorit nogwe iigak, at Yotuwa nen Iterali apit inenggaanom paga Aliku ALA yoge logonet,

“Oonegen ti, o Nggibeyon irimbaga taati aret puk age,

Tut ti, alu'me o Ayalon irimbaga taati aret puk age,

Eeru o.”

13  Yoreegerak nogo aap Yatat nen liiru mbangge logonet,

“Oonegen nogo kilu yi naga'lek puk aret wonage,

Ndi, tut nogo wundi waga'lek puk aret wonage,

Eeke kagak,

It aakumi Iterali nen inawim eeppiyoorak inanini wu aago wonogwe nogo

Nini tayok togon inoorit nogogwaarak o,”

yinuk, ambuku paga liiru mbaneegerak ndak-ndak aret o ne ambit weege kwak oonegen nogo kilu yi naga'lek mbogut paga time puk aret wonagagerak.

14At Aliku ALA nen aap ambi oone ari aruk konembunuk, Iterali inom a'nuk, wim eeruwok nduk, eereegerak ti kokwak, eeka'lek kagak inom, eereegerak kagak inom, togop ambi eeka'lek aret wonage o. 15Abu aret eeko nogogwaarik, at Yotuwa nogo aakumi Iterali apit inom inawooliyana o Nggilagan nogome aret wogogwaarak.

Yotuwa awuri inom nen aap inendagembogut 5 inooreegwaarak wone

16Wogwe iigak, aap inendagembogut 5 nogo, mbaganit ndo endage Makera nogome aret kumaa'nari nogogwaarak. 17Kumaa'nari nogogwaarak nogo it aakumi nen, “Aap inendagembogut 5 nogo ndo endage Makera kumaarak wonogwe iigoorak o,” Yotuwa yogo mbareegwa, 18at Yotuwa nen ari logonet, “Yugum yele-kole waganogo ndo ambe paga time mulunogo punuk, wundi wogwe iyo, kit ando inarum wonogwe kiigak, 19kit ando perak, kinawim yi, at Aliku kinogoba Ala nen muk kineenggime wokkiragaarak me, it iname kota-kota unggwit nogwe iyo, tat yonggonggolaga'lek inambokan time mondok muguret inoorogo piya nanip o.”

20Yorage nagagerik, at Yotuwa inom, it aakumi Iterali nogo inom, nen aap ambi teppiyoolik, it abok inenggaawak abu lek eerogo inoorogo piyareegwaarak kwe, it ambitak iname kota pak wurik me mbaganit unggwit nogogwaarak nogo mbo piinok, 21it Yotuwa awuri nogo abok ineebe obeelom aret o Makera paga inawooliya oore'nggam nogome Yotuwa wonage me, ka wogo mbareegwa, aap ambi nen, “Togop eeriyak mendek eekotak o,” yinuk, yoraga'lek inayuk wuppunuk, puk aret wonogogwaarak.

22Ti'nuk, Yotuwa nen ari logonet, “Ndo tu narak ti, paarogo pogo logomonggotik, aap inendagembogut 5 ti, wogoren an nowagam piya woraanip o.” 

23Yorage mbareegi, aap inendagembogut nogo ambi Yerutalem mendek, ambi Keboron mendek, ambi Yarumut mendek, ambi Lakit mendek, ndi, ambi Egolon mendek, ineebe 5 nogo ti aret ndoome nen wogoren wundi wogo nogogwaarik, 24at Yotuwa owagam piya wogo mbareegwa, Yotuwa nen aap Iterali apit aret kuwak ari woraawak nduk, yoragagerak kuwak ari wogogwaarak wonogwe iigak, aap yigin unde inoweewi Yotuwa inom wim nambuko nogogwaarak nogo yorage logonet, “Korotok ya'i wogo logomonggotik, aap inendagembogut yi, inali'luk paga kiniyok aan lebembiirogo logonip o.”

Yorage mbareegi, wogo nogogwaarik, iniyok konden inali'luk paga tebembiirogo iigak, 25Yotuwa nen at awuri nogo yorage logonet, “Kinagabiti mbakwi, kiniki yungguppegak eekwi, eerugup o. It aakumi kinom wim mbanak wonogwe nogo, at Aliku ALA nen yogop eeppiyaagin me, kinogogumbuk kiniki mondok nu'lek eeppatinuk logomunggup o.” Ari nagagerik, 26aap inendagembogut nogo inoorogo piinok, eyo 5 paga ineebe ndanunogo piigo nogogwaarik, mippiyareegwaarak wonogwe iigak, oonegen aret kilu yi nagagerak.

27  Oonegen nogo abu aret kilu yi nage mbareegi, aap inoorak eyo paga ndanunik wonogwe nogo waganogo wuppiya woraawak nduk, at Yotuwa nen wone lengganogo yorage mbareegi, wuppiya wogo nogogwaarik, ndoome kumaarak wonogogwam nogome inuut ngguluk mambiigo nogogwaarik, yugum yele-kole waganogo tu narogo piyareegwaarak me, o yogondak wonage aret o.

28Ne ti eyom paga aret at Yotuwa nen o Makera tebenggolage logonet, aap ambit-ambi ineenik teppiyoolik tigitogon inoorogo piige, ndi, o Yeriko aap endagembogut eeppereegerak nogo kwak, aap Makera mendek endagembogut nogo togop aret warogo pege, eereegerak.

Yotuwa nen kota-kota tebenggolagagerak wone

29Ti'nuk, Yotuwa nogo Iterali abok aret inom o Makera nen o Libana nogo nogogwaarik, inom wim eekwi iigak, 30at Aliku ALA nen o kota ti inom, aap endagembogut inom, it Iterali ineenggime wogoragagerak me, o Libana tebenggologo logonet, aap endagembogut o Yeriko mendek eeppereegwaarak nogo ndak-ndak, at Yotuwa awuri inom nen aap endagembogut o Libana mendek wakwi, inawi kota time wonogwe nogo ineenik ambi teppiyoolik abok aret wooluwak paga inookwi, eereegwaarak.

31Inooko nogogwaarik, at Yotuwa nogo Iterali inom abok aret o Libana nen o Lakit aret panggok togon inawooliya wuppunuk, inom wim nambukwi iigak, 32at Aliku ALA nen aakumi Lakit mendek nogo, it Iterali ineenggime wogorage mbareegi, inom wim eekwi iigak, nogo ambi yinuk, ko'lu nen inawi paga kwi'nari unggwogo nogogwaarik, o Libana eereegwaarak nogo ndak-ndak inawi kota nogo tebenggologo logonet, ineebe abok aret wooluwak paga inoorogo piyareegwaarak. 33Ti eekwi iigak, o Nggetet mendek inowe endagembogut Koram nen it aap Lakit mendek yeenggwaaroorak nduk, eeri wagagerak mendek, at Yotuwa awuri inom nen aap endagembogut ti inom, awuri ineegin warak inom, ambi teppiyoolik tigitogon aret inoorogo piyareegwaarak.

34Abu aret inooppunuk, at Yotuwa aakumi Iterali inom abok aret o Lakit nen o Egolon panggoni nogo nogogwaarik, inawooliya wuppunuk, inom wim nambuko logonet, 35ne ti paga aret o Egolon tebenggologo nogogwaarik, o Lakit paga eereegwaarak nogo ndak-ndak aret, aakumi ineenik wonogwe nogo ambi teppiyoolik abok aret wooluwak paga inoorogo piyareegwaarak.

36Ti'nuk, Yotuwa aakumi Iterali inom abok aret o Egolon nen o Keboron aret nogo nogogwaarik, inom wim eeppunuk, 37o Keboron tebenggologo logonet, o Egolon eereegwaarak nogo ndak-ndak, aap endagembogut inom, inawi kota wonogwe nogo inom, o yaga'lelo koorok wonogwe inom, ambiriluk ambi teppiyoolik abok aret wooluwak paga kalirubu pup eerogo inooreegwaarak.

38Abu aret inoorogo piinok, at Yotuwa aakumi Iterali inom abok aret iniyokan yungguninuk, aakumi o Ndebit mendek inom wim eeko logonet, 39o Libana inom, o Keboron inom, it inendagembogut imbirak inom, eerogo piyareegwaarak nogo ndak-ndak, aakumi o Ndebit kota wonogwe inom, aap endagembogut inom, o yaga'lelo koorok wonogwe inom, ambit-ambi teppiyoolik abok aret wooluwak paga kalirubu pup eerogo inooppunuk, o Ndebit tebenggologogwaarak.

40At Aliku Iterali inogoba Ala nen wone lengganogo yoreegerak nogo ndak-ndak, at Yotuwa awuri inom nen it aakumi puut-puut wonogwe inom, o karume o ame pa'nggwe wonogwe inom, puut nggelok-nggobok me oonegen kilu yi nage menggim pa'nggwe wonogwe inom, puut elan me wonogwe inom, yi awi ndi awi aakumi ineenik wonogwe abok aret inowe endagembogut inom ambit-ambi ineenik teppiyoolik tigitogon aret kalirubu pup eerogo inoorogo piinok, inanggween tebenggologogwaarak.

41O tebenogo piyareegwaarak nogo ti, o Kareti-Mbareneya nen nok, o Nggata kuli inom, nggween Nggotiyen taganak apit aret nen nok, o Nggibeyon kuli inom, abok aret Yotuwa awuri inom nen tebenogo piyareegwaarak. 42At Aliku Iterali inogoba Ala nogo nen inom a'nuk wim eereegwaarak me, at Yotuwa awuri inom ne ambit wundeegwaarak paga aret aap inendagembogut yi abok aret inoorogo piinet nogo nogogwaarik, inanggween tebenggologogwaarak.

43Abu aret tebenggologo nogogwaarik, at Yotuwa aakumi Iterali inom abok aret iniyokan inawooliyana o Nggilagan nogome aret wogogwaarak.

Yotuwa 9:1-27

 Aap Nggibeyon mendek nen Yotuwa ambokan laganeegerak wone

1It aap inendagembogut niyo Yoraran oonegen kilu yi nage menggim pa'nggwe puut-puut paga wonogwe inom, puut nggelok-nggobok wonogwe inom, niyo nggwok yenggenak laut ambet paga nen, agi puut Libanon kuli aap inendagembogut Ket mendek inom, Amori mendek inom, Kanan mendek inom, Perit mendek inom, Kewi mendek inom, Yebut mendek inom, abok aret at Yotuwa eeke nogo inaruk konenggo nogogwaarik, 2apit aret lambumbunuk, at Yotuwa Iterali inom wim namburuwok nduk, wone mbaneegwaarak.

3Ndi, it aap Nggibeyon mendek perak, Yotuwa nen aakumi o Yeriko mendek inom, o Ayi mendek inom, eeppiyareegerak inaruk konenggo nogogwaarik, 4-5we pilit aret, “Wone yogobi yuwok,” koonggo nogogwaarik, karun nibinik-ndelenak aago maan mendek paga inambi oroti ndeyak ku'lu aago nogo yonggologo keledai amborowak paga kwippugwi, anggur amburu tooko menggaarak ndomba agabolo paga ogobakkigirik maluk nibinik mendek yiluk-yiluk penggaarogo waganggwi, ndi, iniyok ogut nibinik-ndelenak yuwok-tuwok eerak yirikkologwe, inambogoyum abu maluk mili lombok kagak yirikkologwe, eeko nogogwaarik, 6at Yotuwa aakumi Iterali inom o Nggilagan paga ooliya wuppatinuk wonogwe me nogome iniya wogogwaarak. Iniya wogo nogogwaarik, at Yotuwa kunduk, it aap Iterali mendek kunduk, yorogo logonet, “Nit ninawi o nda lombok time nen kit ninom lambumbunuk, wone abuk nggaruk togon mbanuwok nduk, kiniya wogo o.”

7  Yorogogwaarak kwe, it aap Iterali mendek nen it Kewi mendek nogo yorogo logonet, “Kit kinawi we korok-korok ninom wonogwe ya'i nen wogotak kiigak, wone abuk nggaruk togon mbanukwak nonggoti o.”

8Yorogo mbareegwa, it nen Yotuwa yogo logonet, “Nit yi ti, kit kinayeloman aret wogo o.”

Yogo mbareegwa, at Yotuwa nen it yorage logonet, “Kit taani o? Ndi, nggeeme nen wogo nogotik, yo'nugwi o?”

9Yorage mbareegi, it nen at yogo logonet, “Kit kinayeloman nit yi, ninawi mondok nda lombok nen at Aliku kinogoba Ala endage nggwok agaarak kenok wogo o. At nen o Metit paga eerit nage, 10 ndi, niyo Yoraran oonegen wundi wage menggim pa'nggwe enebaga aap mbere inendagembogut Amori mendek ambi endage Tikon o Ketibon unde wonage, ndi, ambi endage Ok awi Atitarot logonet, o Mbatan unde wonage, eekwi iigak, eeppiyareegerak nogo ninaruk koneneegurak me, 11nit ninoweewi inom, it niname ninom monggoorak inom, it abok nen nit yo'nirogo logonet, Tu paga nogo logonet, noorak kinambi kambu ko'nok, it wonogwe me time nogo logomonggotik, yorogo logonet, Nit kit kinayeloman mini aret me, kit ninom lambumbunuk wone abuk nggaruk togon mbanuwok nduk wogo, yoraanu o, yinuk, nappinani wagaarak me, 12ninambi oroti yi pekkaanip o. Niname nen ninambi oroti awo worarogo wonok wogoorak yi kwe, abu ndeyak age nagaarik, ku'lu agaarak wonage yi kaanip o.

13Ndi, anggur amburu tookkolagak ndomba agabolo ngget mendek ogobakkigirik paga toologo yonggo'nuk wogoorak kwe, nibi-nibi nage, tu o nda lombok me, wogo logonet, ninayum inom, niniyok ogut nggerenak inom, abu nibinik-ndelenak arit nage, eekerak yi kaanip o.”

14Yorogo mbareegwa, at Aliku ALA yoga'lek kagak, it iniki mba'nuk nen inambi kambu ndinik nogo ando waganogo nonggo nogogwaarik, 15at Yotuwa nen, “Ninom mondok kunik logowok nduk, kineenik teppinagago o,” yinuk, inom wone abuk nggaruk togon mbangge mbareegi, it aap inoweewi wone koongga nogo nen, “Ala owak o,” yinuk, kumbuk mbanogo pereegwaarak.

16Abu aret aap Nggibeyon inom lambunggo nogogwaarik, nogo kenagan yippunuk, “Aap yi, inawi korotok iigak, kinom lambunggotak o,” yinuk, yogwe it Iterali inaruk konenggo nogogwaarik, 17ti eyom paga aret nogo mbere yegak ko'lu aakumi ti, iname kota-kota Nggibeyon inom, Kepira inom, Mbeerot inom, Kiriyat-Yeyarim inom, aret pegiya nogogwaarak. 18Pegiya nogo nogogwaarik, it Iterali lambunik inoweewi wone koongga nogo nen at Aliku Iterali inogoba Ala owak mbanogo inili eerogo piyareegwaarak me, “Inooriyak lek o,” yinuk, teppiyareegwaarak.

Teppiigo mbareegwa, Iterali lambunik abok nen inoweewi nogo ineebi-ineeba inombako mbareegwa, 19it inoweewi wone koongga nogo nen it Iterali apit yorogo logonet, “At Aliku Iterali ninogoba Ala owak mbanogo inili eerogo piigoorak me, maluk eerogo piyoorak ti meek o. 20Nit Ala owak mbanogo ineenik logowak nduk, inili eerogo piigoorak kagak, maluk eeppiigwi niinok, Ala anini ninoba pinanukwak teppiyaawok o. Ndi, teppiyamonggoorak wonogo logonet, eeko logorak perak yi o. 21It ineenik teppiyamonggoorak me, nit abok lambunik ninake ninayeloman logonet, niyo too'nira nagak, ninaga'ni wu'nira nagak, eekak ake aret logowak o,” yinuk, it Iterali inoweewi nen wone koonogo pereegwaarak ti paga aap Nggibeyon inom wone mbaneegwaarak nogo piyok yuulik omaawi aret wonagagerak.

22Wone nogo koonogo pogo mbareegwa, at Yotuwa nen it aakumi Nggibeyon mendek nogo woraawak nduk, wiiragagerak wogo mbareegwa, yorage logonet, “Kit kinawi korotok yime aret wonogo logonet kwe, Ninawi o nda lombok wonage o, yinuk, wone pilit aret nano nduk yo'nirogotak? 23Wone pilit togop yo'nirogotak me, o yogondak nen mondok-mondok ninayeloman logonet, ninogoba Ala awi wurik ake niyo tooli nagak, kani wuri nagak, eeko logomunggup nduk, pulunogo pinagago o.”

24Yorage mbareegi, it nen wone onggo at Yotuwa yogo logonet, “Nit kayeloman mini yi, aakumi o yime menggaarak abok aret inenggaawak lek eerogo piinok, o nggween yi apit aret, Kit wokkiraagin o, yinuk, at Aliku kinogoba Ala nen eeriyak wone lengganogo ayeloman Muta yoreegerak nogo, liirogon aret ninaruk konenggo nogoorik, kit kineebe paga niniki ma'nage logonet, Nit togop aret ninoorukwak ninagabiti o, yinuk, pilit aret togop eekoorak o, ninogoba. 

25Togop aret me, o yogondak yi paga nit nineebe kit kineenggi paga wonogwe me, nit eekoorak paga eeppinaniyak mbakotak nogo ndak-ndak eeppinaniyak op aret o,” yinuk, yoreegwaarak.

26Ndi, it Iterali nen inookwi iyo, at Yotuwa nen it inili eerogo teppiyareegerak nogo ti aret. 27Teppiige nagagerik, ti eyom paga aret Iterali wonogwe abok aret inake eekwi, ndi, at Aliku ALA ake warogo wogogo logowam Aliku ALA nen leenogo patemenggim nogome eekwi, eeko logonet, niyo toogira nogwe, inagani wugira nogwe, eeko logowak nduk, unde eeppiyareegerak me, yogondak kunduk eekwi aret wonogwe o.