Yotua 2:1-24

 Aap mbere o Yeriko inigen yombooni nogogwaarak wone

1  Yogo mbareegwa, at Nun aput Yotuwa nogo o Titim logonet, aap mbere o Yeriko inigen yombooni nawak nduk, kote kumaarogo nappiige logonet, “O yaga'lelo ambik wurik Yeriko ti inom kinigen liirogon pippak yomboombunuk, woro o,” yoraanuk, nappiyareegerak. Nappiige mbareegi, nogo nogogwaarik, kwe ambi ya wukak endage Arakap ame nogo yereegwaarak.

2-4Nogo yogo logonet, it aap mbere nogo wogoren tilaabaga kumaappiinok, wonage kagak, it aakumi time mendek nen aap endagembogut Yeriko mendek yogo logonet, “It aap Iterali mendek nit ninanggween yime inigen yomboonuwak nduk, oonikiya wagaarak wonogwe o.”

Yogo mbareegwa, aap Yeriko mendek endagembogut nogo nen ayeloman mini nappiyareegerak nogo nogogwaarik, kwe Arakap nogo yogo logonet, “It aap ninanggween abok aret inigen yomboonuwak nduk, wagaarak kame wonogwe ti, wumbiya mok o.”

Yogo mbareegwa, kwe nogo nen it aap nogo yorage, “It aap ti, abet aret neya wagaarak kwe, nggeeme nen wagaarak an neenggo'lek me, 5o kiip age kenok, yaga'lelo tu naruwak nduk eekwi iigak, it aap ti wundi nagaarak me, tu nggeeme nagaarak an neenggo'lek me, kit mbet-mbet aret muguren nanip o.” 6At kwe nogo nen aap nogo wogoren tilaabaga nggiru tiirogo woloombereegim enggela'me kumaappiige nagagerik, yoragagerak. 7Nogo yorage mbareegi, it aap nogo nen tu niyo Yoraran wunda nogo menggam nogome, aap ti ineebe kwaarinabit nawok nduk, o Yeriko wundi nogwe iigak, o nogome tu nareegwaarak.

8Tu nappunuk wonogwe iigak, kwe nogo nen aap mbere nogo yugum paga ndoonogo maarak me, nogo yuwok nduk eekwi me, pegiya lagi nage nagagerik, 9yorage logonet, “At Aliku ALA nen o nggween yi muk wokkiragagerak an abu neenu aret me, it aakumi yime wonogwe yi abok aret kit kiinok, inagabiti nen iniki ma'nage logonet, inaganak warit nage agaarik o. 10 At Aliku ALA o Metit nen wokkiren wundi wage logonet, niyo yenggenak Laut Merah mogombunuk, nggween woloonogo pereegerak paga wumbinagi wage, it aap inendagembogut mbere Amori mendek niyo Yoraran oonegen wundi wage menggim pa'nggwe menggaarak inendage ambi Ok, ambi Tikon imbirak mondok inenggaawak lek eerogo piigwi, eereegutak nogo nit abu ninaruk konenggoorak o.

11Konenggo nogoorik, at Aliku kinogoba Ala ti, mbogut paga inom, nggween paga inom, at Ala alik aret eebe mondok endak warak wonage logonet, eeppinagage kagak, eerit nogwe kiigo nogoorik, niniki ma'nage logonet, ninagabiti ambik mbako ogoorik o. 12Togop aret me, an nen kinabuwa mbake logonet, kinili ari me, kit ndak-ndak nagalomini-nogobamini ninom ninili yuurak abet mbarikit nduk, at Aliku ALA endage kumbunuk, kumbuk mbanogo yo'ninip o. 13Kit nen an nagalo-nogoba inom, niruwi-noreewi inom, it inaaganapuri apit inom, ninooriyak lek abok aret we inaani ninili eerogo teppinaniyak an abet aret mbarikit nduk, neenu agak mendek ambi eeppaninip o.”

14Yorage mbareegi, aap mbere nogo nen kwe nogo yogo logonet, “Nit kinili yogwe me ninookwi iinok, nit kit kinake kambuurak op aret o. Ndi, nit eeruwok nduk wogoorak nogo perak, aakumi mondok yoraga'lek puk aret wonage keenok, Aliku ALA nen o yi wo'nirage nogo eyom paga kinabuwa nen yokkogoorak yi, a'me lik yuwak nduk, abet aret kinili yogo logogun o.”

15Yogo mbareegwa, kwe nogo ame o kota yugum pak wurik wuka wagak tiyarogon wurik wukagi ambe mbanak me nen keeleluwi paga pugunogo endekem wumbiige logonet, 16wone yorage, “It aap kwaakkinabit nogwe nogo kwaakkiyookwak, o endekem puut nggelok-nggobok time kumaarak nogo kenagan yogo logomonggotik, it aap kwaakkinabit nogwe nogo iniyokan wogwe iinok perak, aret namunggup o.”

17Yorage mbareegi, it aap nogo nen kwe nogo yogo logonet, “Kat nen, Ninili yuurak abet mbarikit nduk, at Aliku ALA endage kumbunuk, kumbuk mbanogo yo'ninip o, ari mbaken, wone yokkogoorak nogo a'me lik yuwak nduk, 18nit o yime tebenggola unggwi wogwe niinok, kat nen keele laambu maa'ngga kunik lombok yi, waganogo wukagi ambe mbanak me nit wumbinani wagandak yi paga pugunogo punuk, kat kagalomini-kogobamini inom, kiruwi-koreewi inom, kit ndarak linik-lenok abok aret kame kuwak eeppiinok wonage kenok, teppinagagun o. Ndi, lek kenok perak, wone yokkogoorak yi, a'me lik yigin lek o.

19Togop aret me, nit unggwi wogwe ti eyom paga aap ambi kame yime nen ugun endekem wundi namenggerak paga amiya wungge kenok ti, amiya nit ninoba logogin lek o. At obaalombok oba aret logogin kwe, kame yime kinom wonage me wakwi niinok perak, amiya nit ninoba wonage aret mbarumunggun o. 20Togop aret kwe, nit ninabok paganogo aakumi yorage keenok perak, Aliku ALA endage kumbunuk, kumbuk mbanogo yo'ninip, ari mbaken, yokkogoorak nogo a'me lik yigin lek o.”

21Yogo mbareegwa, kwe nogo nen, “Op aret o. Kit wone yo'nogotak ti, a'me aret aruwak o,” yoraanok, aap wumbiyareegerak nogo nogwe iigak, kwe nogo nen keele laambu maa'ngga kunik nogo waganogo wukagi ambe mbanak nogo paga pugunogo pereegerak.

22Ndi, it aap mbere nogo puut nggelok-nggobok nogome nogo nogogwaarik, kumaarak nogo kenagan yugwi iigak, it aap nogo tu paga nogwe iyo, kwaarinabit nogogwaarak mendek ineebe lek mbareegwa, yungguninuk iniyok paga iname Yeriko aret nogogwaarak. 23Nogwe iigak, it aap mbere nogo puut nggelok-nggobok nogome nen wambi wogo nogogwaarik, niyo Yoraran mbambunuk, aap Nun aput Yotuwa owagam wogo nogogwaarik, kwe Arakap nen wone yoragagerak nogo inom, o time kogogwaarak nogo inom, mbinuk-mbenak eerogo yoreegwaarak. 24Mbininogo Yotuwa yogo logonet, “It aakumi o Kanan wonogwe nogo abok aret nit nineebe paga inagabiti nen inaganak nugiranet nogwe iigoorak me, at Aliku ALA nen abet aret o ti nineenggime wo'niragaarak kogo o,” yinuk, yoreegwaarak.

Yotuwa 1:1-18

 YOTUWA WONE

ALA nen Yotuwa mippereegerak wone

1At Aliku ALA ayeloman Muta nogo kangge mbareegi, Aliku ALA nen Muta yeenggwaagak aap Nun apuluk Yotuwa nogo yoge logonet, 2“An nayeloman Muta nogo abu aret kanggerak me, it Iterali inanggween wogoraawam nogome yi Yoraran enebaga wunda nanuk, unggwi namunggup nduk, kat inom, it aakumi yi inom, abok aret pipuk eeko logonip o. 3 An nen Muta yoreegirak nogo ndak-ndak kat nen yi awi ndi awi kiyok pit namenggendak nogo abok aret wokkirigin o. 4O karume inom, puut Libanon inom, panggombunuk, arunggwe niyo kole endage Eparat nen, nok-nok aakumi Ket wonogwe me nen, nok-nok yi kole yenggenak laut oonegen kilu yi nage menggim pa'nggwe ti kuli abok aret kit kinanggween arigin o. 5 An teppagage, eraangge mbo paganuk mbagangge, eerigin lek at Muta nimbirak wonagagirak nogo pogom kat nimbirak mondok aret logogun me, kat keenik wonage keegak, aap ambi nen tebenogo pagagin mondok lek o.

6  Kinombomini nggween wogoroorak wone abuk nggaruk togon kumbuk mbanogo yoragagirak nogome aret ineyate kwak unde a'nuk logowak nduk, kat nen aakumi Iterali yi, wogoren wunda namunggun me, kat kogogumbuk kiniki mondok nu'lek eeppatinuk, logot o. 7Kat eerit nage nogo abe mban arit nage kaanok nduk, kena agigan agak, ogugan agak, eerugun o. Ata, kogogumbuk kiniki mondok nu'lek eeppatinuk logonet, eeko logorak wone yugu nayeloman Muta liiru mbanogo wokkireegerak nogo abok ndak-ndak liirogon aret eerit nage logot o.

8Eeko logorak wone yugu mbuku paga liiru mbanak yi, kat nen aakumi yoroorak ti, Neebi o, yinuk, mbo pugun o. Ata, mbuku yi paga yi wone ndi wone liiru mbanak wonage abok aret kat mondok ndak-ndak liirogon aret eerit nage logonok nduk, liingge-kiyoma mondok aberit nage logot o. Ti eeke keenok, yi mendek ndi mendek eerit namenggendak nogo a'me nggelok arit nage kagak, ambi kolage logomunggun o. 9Kat kogogumbuk kiniki mondok nu'lek eeppatinuk logot o, yinuk, yokkigirak nogo lek a? Kat ambime nage keegak, Naliku kogoba Ala an nimbirak nagin me, kat kagabiti mbake, eerit nage logonet anggon eekkake, eeriyak ti mondok mage o,” yinuk, yoreegerak.

10-11Yoge mbareegi, at Yotuwa nen it aakumi Iterali inoweewi nogo yorage logonet, “Nogo mbere yinuk, ko'lu aret niyo Yoraran yi, enebaga wunda nanuk, at Aliku kinogoba Ala nen kit kinanggween kinalitak lombok wokkirage nogome unde eeppatinuk logomunggup nduk, unggwi noorak me, it aakumi Iterali apit aret inambi kambu ndarogo pako logowak nduk, inawooliyana lombok yoranet nogo logonip o,” yinuk, yoragagerak.

12  Yorage nagagerik, it Uruben mendek inom, Nggat mendek inom, anebunu Manate ando mogonak inom, yorage logonet, 13“Kit kiniki ugun tayenak obeelom aret logomunggup nduk, at Aliku kinogoba Ala nen, Kinanggween yi wokkiragaarak o, yinuk, at Aliku ALA ayeloman Muta nen wone lengganogo yokkiragagerak nogo abeko logonip o. 14Abeko logomonggotik, kinakuwi inom, kinapuri inom, kinaanggumi inom, at Muta nen kinanggween tumbukkiragagim niyo Yoraran yibaga ya'i wonogwe iigak, kit aap wim nambuka wakaa'ngget kineebe abok aret kineegin li'luk eekko'nok, kinoreewi kinambokan piinok, kit kinaa'nduk wunda nanip o.

15Ndi, kit kiniki ugun tayenak obeelom logomunggup nduk, Aliku ALA nen yeenggwa kiragagerak nogo kokwak, kinoreewi ando inanggween Aliku ALA nen wogorage nogome, togop aret logowak nduk, yeenggwaarogwe kiinok, at Aliku kinogoba Ala nen inanggween wogorage nogome abu aret unde eeppatinuk, obeelom wonogwe iigak, Ala ayeloman Muta nen kinanggween tumbukkiragagim oonegen wundi wage menggim niyo Yoraran yibaga yime logomunggup nduk, kiniyok paga yungguninuk wunda woraamunggup o,” yinuk, yoragagerak.

16-17Yorage mbareegi, it nogo nen at yogo logonet, “At Muta nen yo'nirage kenok, eerit nogo nogogurak nogo ndak-ndak, kat nen wone lengganogo yo'nirage nogo, E o, yinuk, eekwi, ndi, Ndime nanip o, yo'nirage kenok nogwe, eeko logorak me, yo'nirage logot o, ninogoba. Ndi, at Aliku kogoba Ala Muta imbirak wonagagerak kokwak, kat kunduk kimbirak aret logomunggun o. 

18Aap ambi nen kat koone ari nogo, Eeriyak neebi, mbake, wone lengganogo yo'nirage nogo taganogo mbo pege, eeke kenok, aap ti kambuwak nduk, warogo puurak aret me, kat perak, kogogumbuk kiniki mondok nu'lek eeppatinuk logot o,” yinuk, yoreegwaarak.

Yotuwa iyaalok pekkoorak wone

 Yotuwa Wone

Mbuku Yotuwa yi, eebe mbanak pekkaga'lek logonet, aa'nduk pekkoorak yi o.

Mbuku Yotuwa yi, o Kanan tebeni ungguwok nduk, at Yotuwa nen aakumi Iterali wogoren o Kanan unggwi nagagerak nogo liiru mbanak yi aret.

At Yotuwa Muta obaane'me age nagagerik, aakumi Iterali inarum wonagagerak. Mbuku yi paga Iterali iya tit eereegwaarak wone liiru mbanak wonage nogo yi aret:

* Niyo Yoraran mbaninuk wunda wogogwaarak wone inom,

* O Yeriko yigirogo pi unggwogogwaarak wone inom,

* O Ayi wim eereegwaarak wone inom,

At Ala nen Iterali eeko logorak wone ambinom koonogo yoragagerak wone inom,

abok aret liiru mbanak wonage.

Ndi, mbuku yi paga wone ambi iya lombok mbanak ti, pasal 24 ayat 15 yi aret: At Yotuwa nen ari logonet,

“... kit kugi mugurok noorak ilik, Aliku ALA mugurok noorak a? O yogondak yi paga aret kit mban miikkolaanip o. An, nakwe, napurilogwe ninom perak, at Aliku ALA mban aret mugurok nogo logogun o,”

yinuk, yoragagerak.