Yotuwa 1:1-18

 YOTUWA WONE

ALA nen Yotuwa mippereegerak wone

1At Aliku ALA ayeloman Muta nogo kangge mbareegi, Aliku ALA nen Muta yeenggwaagak aap Nun apuluk Yotuwa nogo yoge logonet, 2“An nayeloman Muta nogo abu aret kanggerak me, it Iterali inanggween wogoraawam nogome yi Yoraran enebaga wunda nanuk, unggwi namunggup nduk, kat inom, it aakumi yi inom, abok aret pipuk eeko logonip o. 3 An nen Muta yoreegirak nogo ndak-ndak kat nen yi awi ndi awi kiyok pit namenggendak nogo abok aret wokkirigin o. 4O karume inom, puut Libanon inom, panggombunuk, arunggwe niyo kole endage Eparat nen, nok-nok aakumi Ket wonogwe me nen, nok-nok yi kole yenggenak laut oonegen kilu yi nage menggim pa'nggwe ti kuli abok aret kit kinanggween arigin o. 5 An teppagage, eraangge mbo paganuk mbagangge, eerigin lek at Muta nimbirak wonagagirak nogo pogom kat nimbirak mondok aret logogun me, kat keenik wonage keegak, aap ambi nen tebenogo pagagin mondok lek o.

6  Kinombomini nggween wogoroorak wone abuk nggaruk togon kumbuk mbanogo yoragagirak nogome aret ineyate kwak unde a'nuk logowak nduk, kat nen aakumi Iterali yi, wogoren wunda namunggun me, kat kogogumbuk kiniki mondok nu'lek eeppatinuk, logot o. 7Kat eerit nage nogo abe mban arit nage kaanok nduk, kena agigan agak, ogugan agak, eerugun o. Ata, kogogumbuk kiniki mondok nu'lek eeppatinuk logonet, eeko logorak wone yugu nayeloman Muta liiru mbanogo wokkireegerak nogo abok ndak-ndak liirogon aret eerit nage logot o.

8Eeko logorak wone yugu mbuku paga liiru mbanak yi, kat nen aakumi yoroorak ti, Neebi o, yinuk, mbo pugun o. Ata, mbuku yi paga yi wone ndi wone liiru mbanak wonage abok aret kat mondok ndak-ndak liirogon aret eerit nage logonok nduk, liingge-kiyoma mondok aberit nage logot o. Ti eeke keenok, yi mendek ndi mendek eerit namenggendak nogo a'me nggelok arit nage kagak, ambi kolage logomunggun o. 9Kat kogogumbuk kiniki mondok nu'lek eeppatinuk logot o, yinuk, yokkigirak nogo lek a? Kat ambime nage keegak, Naliku kogoba Ala an nimbirak nagin me, kat kagabiti mbake, eerit nage logonet anggon eekkake, eeriyak ti mondok mage o,” yinuk, yoreegerak.

10-11Yoge mbareegi, at Yotuwa nen it aakumi Iterali inoweewi nogo yorage logonet, “Nogo mbere yinuk, ko'lu aret niyo Yoraran yi, enebaga wunda nanuk, at Aliku kinogoba Ala nen kit kinanggween kinalitak lombok wokkirage nogome unde eeppatinuk logomunggup nduk, unggwi noorak me, it aakumi Iterali apit aret inambi kambu ndarogo pako logowak nduk, inawooliyana lombok yoranet nogo logonip o,” yinuk, yoragagerak.

12  Yorage nagagerik, it Uruben mendek inom, Nggat mendek inom, anebunu Manate ando mogonak inom, yorage logonet, 13“Kit kiniki ugun tayenak obeelom aret logomunggup nduk, at Aliku kinogoba Ala nen, Kinanggween yi wokkiragaarak o, yinuk, at Aliku ALA ayeloman Muta nen wone lengganogo yokkiragagerak nogo abeko logonip o. 14Abeko logomonggotik, kinakuwi inom, kinapuri inom, kinaanggumi inom, at Muta nen kinanggween tumbukkiragagim niyo Yoraran yibaga ya'i wonogwe iigak, kit aap wim nambuka wakaa'ngget kineebe abok aret kineegin li'luk eekko'nok, kinoreewi kinambokan piinok, kit kinaa'nduk wunda nanip o.

15Ndi, kit kiniki ugun tayenak obeelom logomunggup nduk, Aliku ALA nen yeenggwa kiragagerak nogo kokwak, kinoreewi ando inanggween Aliku ALA nen wogorage nogome, togop aret logowak nduk, yeenggwaarogwe kiinok, at Aliku kinogoba Ala nen inanggween wogorage nogome abu aret unde eeppatinuk, obeelom wonogwe iigak, Ala ayeloman Muta nen kinanggween tumbukkiragagim oonegen wundi wage menggim niyo Yoraran yibaga yime logomunggup nduk, kiniyok paga yungguninuk wunda woraamunggup o,” yinuk, yoragagerak.

16-17Yorage mbareegi, it nogo nen at yogo logonet, “At Muta nen yo'nirage kenok, eerit nogo nogogurak nogo ndak-ndak, kat nen wone lengganogo yo'nirage nogo, E o, yinuk, eekwi, ndi, Ndime nanip o, yo'nirage kenok nogwe, eeko logorak me, yo'nirage logot o, ninogoba. Ndi, at Aliku kogoba Ala Muta imbirak wonagagerak kokwak, kat kunduk kimbirak aret logomunggun o. 

18Aap ambi nen kat koone ari nogo, Eeriyak neebi, mbake, wone lengganogo yo'nirage nogo taganogo mbo pege, eeke kenok, aap ti kambuwak nduk, warogo puurak aret me, kat perak, kogogumbuk kiniki mondok nu'lek eeppatinuk logot o,” yinuk, yoreegwaarak.

Yotuwa iyaalok pekkoorak wone

 Yotuwa Wone

Mbuku Yotuwa yi, eebe mbanak pekkaga'lek logonet, aa'nduk pekkoorak yi o.

Mbuku Yotuwa yi, o Kanan tebeni ungguwok nduk, at Yotuwa nen aakumi Iterali wogoren o Kanan unggwi nagagerak nogo liiru mbanak yi aret.

At Yotuwa Muta obaane'me age nagagerik, aakumi Iterali inarum wonagagerak. Mbuku yi paga Iterali iya tit eereegwaarak wone liiru mbanak wonage nogo yi aret:

* Niyo Yoraran mbaninuk wunda wogogwaarak wone inom,

* O Yeriko yigirogo pi unggwogogwaarak wone inom,

* O Ayi wim eereegwaarak wone inom,

At Ala nen Iterali eeko logorak wone ambinom koonogo yoragagerak wone inom,

abok aret liiru mbanak wonage.

Ndi, mbuku yi paga wone ambi iya lombok mbanak ti, pasal 24 ayat 15 yi aret: At Yotuwa nen ari logonet,

“... kit kugi mugurok noorak ilik, Aliku ALA mugurok noorak a? O yogondak yi paga aret kit mban miikkolaanip o. An, nakwe, napurilogwe ninom perak, at Aliku ALA mban aret mugurok nogo logogun o,”

yinuk, yoragagerak.

Pelaareegerak 34:1-12

 Muta kambeegerak wone

1Yorage nagagerik, at Muta nogo o Mowap kobappaga nogome teppunuk, puut Nebo paga lagangge logonet, o Yeriko wunggagak puut kirin Pitaka paga ari laganeegerak. Lagangge mbareegi, at Aliku ALA nen o nogome nenaarak abok aret o Nggileyat nen o omarip paga pa'nggwe it Ndan mendek logowam kuli nikkage, 2it Natali mendek inom, Eparayim mendek inom, Manate mendek inom, inanggween logowam nikkage, it Yekura mendek inanggween logowam oonegen kilu yi nage menggim pa'nggwe niyo nggwok yenggenak laut nen nok, 3ogu o ame pa'nggwe karume kuli inom, o kobappaga Yeriko o tini Nggabunggaame kuli nen o Towat kuli inom, nogo nikkage, eereegerak. 4 Eeke nagagerik, at Aliku ALA nen Muta yoge logonet, “O kenegen nakkagandak ti, an nen Abarakam, Itak, Yakup, yorage logonet, Kinapuri-kinombowologwe o ambi wogorage logogin o, yinuk, abuk nggaruk togon kumbuk mbanogo yoragagirak nogo ti aret me, kat kenegen kaanok nduk, nikkeegirak kwe, kat perak, o time unggwi namunggun lek o,” yoreegerak.

5Yoge mbareegi, at Aliku ALA ayeloman Muta nogo at Aliku ALA nen yoreegerak nogo ndak-ndak, o Mowap time aret kambeegerak. 6Kangge mbareegi, at Aliku Ala nen o kota Mbet-Peyot yime pa'nggwe o Mowap kobappaga time aret nggween taambereegerak kwe, taambereegim time aakumi ineenggo'lek o yogondak kuli kobak aret wonogwe o.

7At Muta nogo ndarak kagak tahun seratus dua puluh aret eereegerak kwe, omaawi lek age, enegen ogut age, eeka'lek aret kagak kambeegerak. 8Kangge mbareegi, it aakumi Iterali nogo nen Muta abuwa wakwi o Mowap kobappaga time tabun ndoombunuk le yogwe ne 30 paga aret wonogogwaarak.

9Wonogogwaarik, at Muta nen at obaane'me mippuurak aap Nun aput Yotuwa nogo muk anobak tebeneegerak me, iniki warak lombok Ala nen wogoreegerak kenok, it aakumi Iterali mendek abok aret at Yotuwa oone mban liirogon konenggo logonet, at Aliku ALA nen it eeko logorak Muta yoreegerak nogo abok aret eeko nogogwaarak.

10-12  Ndi, at Muta nogo Aliku ALA imbirak engga kunna'nuk wone mbangge, at Aliku ALA nen o Metit paga nappege mbareegi, Pirawun inom, inom yabu eeko menggaarak inom, yi awi ndi awi at unde menggim inom, ineenu agak inagabiti warak eerubok mendek eeppiige, ndi, it aakumi Iterali mendek abok inenggaanom at omaawi paga eerit nage, eerubok mendek eeke kenok, Wi, ugwi nogo mendek eeke, eeke nagagerik, kambeegerak nogo kokwak, aap Ala wone yaga Muta kwak, aakumi Iterali inenggela'me ambi mi'naga'lek aret menggerak o.