Pelaareegerak 32:1-52

 Muta nen ndawi pereegerak wone

1“Mbogut yi wae.

An wone ambi ari me, karuk logot o. Nggween yi wae.

An noone ari neegak, konengge logot o.

2An wone mamunirage yi, o mayu wangge menggi kwak age,

Noone ari yi, miinanggen iri'ngga paga luurik pogom age,

Iri'ngga anggup awo larak paga o mayu wangge kwak, age,

Yi mendek ndi mendek yarak paga o mayu lubu-lubu wangge kwak, age,

Eeruwak o.

3-4At Ala ti, yugum omaawi nu'lek menggi kwak logonet,

Abu obeelom mban eeke,

At eeppiinet nage ti, abe koonak a'me nggelok mban eeppiinet nage,

At eraambe ninggin age, yegetak mbeyok ari,

Eekeelik, mondok li'lak eeke,

Eeke menggerak me,

Aliku ALA endage tiyappege neegak,

Kit kunduk, Ninogoba Ala alik nggwok aret o, yinuk, ayuk wuko logonip o.

5It aakumi nda'nogogwaarak yi ti,

Aliku ALA enggaanom paga eekulik mendek maluk lombok kagak eekwi,

Ineraambe maluk me, at apuri ariyak kunduk, abu meek aret wonogwe,

It ineraambe abu nggolo lombok logonet, yenenak-wanenak eekwi,

Eeko menggaarak me,

6Kit aakumi kiniki lek wi-wa yi wae.

Ala nen obeelom eeppinagit wage onggo nogo togop eeriyak op mbakop?

At Ala ti, kinogoba a'nuk, kinonggo mbanogo pinagage,

Kinanebunu ambit mendek agago pinagage,

Eereegerak ti lek mbakop?

7Maan wonogogutak nogo kiniki abekwi,

Aa'nduk kinombomini nda'nogogwaarak nogo kiniki liippugwi,

Eeko logomonggotik,

Kinogobamini kin wogiigwi kiinok yokkirogwe,

Kinoweewi ineegwa'me waganggwi kiinok mbininggirogwe,

Eeko logogun o.

8-9Aliku ALA anggween mbanak kwak iniki kundugu ti, at apuri aret o.

Ndi, at eyate pugu kwak ti, Yakup aret me,

At alik Tiyanak Lombok Menggerak nogo nen yi aakumi ndi aakumi mogonogo nappiige,

Aakumi inanebunu lombok ineyate kwak wogorage,

Eereegerak nogo ti,

Yi aakumi ndi aakumi inanggween mbanogo wogorage logonet,

Iterali apuri kunduk ineebe ndarak ndak-ndak aret inanggween kuli mbanogo piinet nagagerak o.

10Togop eerogo pereegerak kagak,

O karume eerilek mba'ngge mban ku agan nogo menggam nen kwaariige nagagerik,

Anggen abe kenok iniki kunik mengga kwak, inarum wonage,

At abu'me piinok, liirogon ndegeninake,

Eeginake logonet,

11Towe nggindooni awina nen aagalogwe wigak togon wumbiinok,

Inagalo inirimbaga wiganinuk nege,

Inabu'me wanduk yinuk, a'naabit wiganogo punuk,

At paga kwippiige, eenggabit paga nggereniren nage,

Eeke menggi kwak,

12Ala kwak Ala alik ambi nen wogoren woroolik o.

Ata, Aliku ALA alik nen mban wogoren wagagerak o.

13Wogoren wage logonet,

Puut-puut lagit nugu logowak nduk, unde wonogwe,

Yi mendek ndi mendek yabume yarak anggen mbanogo nenet nogwe,

Nggiin amburu yugum enoona nen toologo nunggwi,

Eyo tayitun puut paga wundit namenggerak amburu tookkologwe,

14Inaanggumi lembu-tapi, kambin-ndomba inelak amburu nunggwi,

Yilak amburu loonggo warak nunggwi,

Inaanggumi kambin-ndomba inaagalogwe piirigalo mban nda'nogwe,

Ndomba ngguunok abe awi o Mbatan mendek mban nda'nogwe,

Gandum anggen abe li eerogo mban yege,

Anggur amburu abu abe laambu toologo nunggwi,

Eeko logowak nduk,

Eeppiyareegerak o.

15Kendage Yetiyurun ti, li'lak eeka aret kwe,

Keebe kole a'nuk, kiyok konden kambokan nen yigirogo pege,

Ndonggok togon nenok, keebe piike logonet,

Keeruwak loba eerogo pege,

Eeke nagagindik,

Kanebunu ambit mendek agago pagareegerak Ala nogo mbo punuk, mbagangge,

Yugum nu'lek menggi kwak kagap ndaka nogo teppege,

Eeppunuk,

16At Ala nen, Neebi o, yinuk, anini kinombaruwak nduk,

Ala alut eekwi obaane'me kugi ayuk wukwi,

Anini wunduwak nduk, Ala eebi mbake kugiwak nogo mendek mugurok nogwe,

Eereegutak o.

17  Ala lek kugi anini warak kineenggo'lek mendek kagak kwe,

Kugi kinombomini nen ayuk wukkologolik ngget mendek kagak kwe,

Aanggo warogo wogogwi,

Eeko logonet,

18Yugum nu'lek menggi kwak menggerak kinogoba ndakkinabeegerak nogo, tene mbo punuk, mbaganggwi,

Kinagalo kwak ndarogo pinagareegerak Ala nogo kobak eerogo pugwi,

Eereegutak o.

19Aliku ALA nen kinapuri wologwe-komologwe togop eerit nugwi enegen iinok,

Anini mi'nage nagagerik, mbo piinok, 20ari logonet,

It aakumi nda'nogogwaarak ti,

Li'lak eekulik ineraambe nggolo menggaarak me,

Eerit age yubuni nogwe nenegen iyaakit nduk, nambot iinok, logokit o.

21  Mbo paninuk, nalut eekwi nobaane'me kugi ayuk wukwi iinok,

Neebi o, yinuk, niniki laakot inombake,

Kugi nen ambi eeppiyoorak lek kagak kugiwak aanom warogo ayuk wukwi iinok,

An nanini wungge,

Eeruwak nduk,

Eerogo paneegwaarak me,

It aakumi inendage lek alik mendek eeppiige paga napuri nen, Ao, mbakwi,

Ndi, aakumi inanebunu wi-wa mendek eeppiige paga napuri nen inanini ogwe,

Eeruwak nduk,

Eeppiyaagin o.

22Nanini mi'nage logonet,

Kani omoonuk negen a'nuk wunuk agan aakumi kambunuk nogo menggam nggween abu'me teberogon time kuli pi nage,

Ndi, nggween kani nenet nage logonet, yi mendek ndi mendek yarak abok aret nengge,

Puut-puut alom abok aret kani nenet nage,

Eerigin o.

23Aaninggin-paaninggin oona lu'luk inoba kwippiige,

Neegin nomaale paga inoba yinik-kunik eerogo piige,

24Mbi abu nen ineebenowak ko eerogo piige,

Inoba aganggen kani wunuk ari logonet, ineebe wuup eerogo piige,

Mburuk kugi inoba age logonet, kambit nogwe,

Nggeewo ta'ngge nen nibiniren ndi ari,

Waalo muuru eyak andiigwi nen eyak mbaninabit nage,

25Wim endekem nambuko logonet, aakumi inooremenggaarak kambit nogwe,

Iname lombok inagabolo nirik-kirik yogwe me, inookwi,

Kumi tawe aap tawe pup eerogo inookwi,

Elege ngget ndarak aap inanggok inom inookwi,

Eeruwak nduk,

Eeppiyaagin o.

26An Ala nen, It mak eerogo piige,

Aakumi inenggela'me inendage aberak logokwak, kobak eerogo piige,

Eerigin, yereegirak kwe,

27It inawim nen an eeppiige nogo liippega'lek yogo logonet,

It eeppiige yi abok aret Aliku ALA nen eeppiyoolik o.

Ata, nit nineenggi paga nen eekoorak me, nit iya o, yogwe iinok,

Niniki wakkolookwak, liippunuk, eeppiyareegirak, yereegerak o.

28It aakumi inanebunu Iterali mendek yi,

Iniki liippunuk koonggwi, wone liippunuk yogwe,

Eekulik me,

29Iniki warak wonogwe, liippunuk ineenu ogwe,

Eeppunuk,

Nit irip paga togop aret eeppinanugun, kogo,

Mba'nuk, ineenu aruwak lak, ao, mbake menggerak o.

30Nonggop togon aap eebe ambit nen aakumi ambik ineebe seribu paga muguren nage,

Ndi, aap ineebe mbere nen kwe, aakumi ambik ineebe sepuluh ribu paga muguren nogwe,

Eeriyak, mbakop?

Togop eeriyak meek aret kwe,

Ninogoba Yugum Nu'lek Menggi Kwak Menggerak nogo nen ninonggo nggerengge,

Aliku ALA nen ambo'me mbo pinangge,

Eereegerak me,

Togop aret eeppinanit nogo logogun o.

31Togop aret eeppinanit nogo logogun kwe,

Yugum Nu'lek Menggi kwak, nit at paga panggonak wonogwe nogo kwak,

It kunduk togop panggonak wonogwe lek ineenu agaarik o.

32Eyo anggur it mendek ti, eyo anggur Torom mendek awi aret.

O Nggomora ineyabume nen awi luurik me, anggen luurik-maarak yugu ti, ale mendek o.

Anggen mbanak ti, aakumi nunggwi iinok, kanggo menggaarak o.

33It anggur amburu toologo pugwi ti, waalo aakumi inooka amburu aret.

Waalo anini ambik age yombak inooke menggerak pogom aret wonogwe o.

34-35  At Aliku ALA nen ari logonet,

Aap inane'me wakwi inom, maluk onggo eeppiigwi inom,

An nen aret eeppiyaagin me,

Logonuk lek aret iniyok eraabin tuk togon wanggwi,

Aaninggin nggwok lombok inoba kwippiyoorak koorok panggoni wage,

It eeppiyoorak inake pipuk aago nogo,

Mbet-mbet aret ari wage,

Eeppiyoorak koombunuk,

Ndi eyom paga eeppiyaakit o, yinuk, neenggi amburu punuk,

Kumaarogo pege minggim pateegirak nogo lek a?

yinuk, yereegerak o.

36  At Aliku ALA nen at apuri inowak loonogo maluk onggo inoba piige,

At ayeloman mini aret me, inabuwa mbake,

Eeppiige logogin me,

At apuri inomaawi lek age,

It wondet aago nugwi inom, inayeloman inom, ineebe lek ogwe,

Eekwi iige logomenggerik,

37Aliku ALA nen ari logonet,

Yugum Nu'lek Menggi Kwak Menggerak nogo nen kinarum logowak nduk,

Nobaane'me kiniki panggonak wonage nogo nggeeme agaarik o.

38Nalut eekwi nobaane'me kugi eeko logonet,

It inake warogo kani kunggwi kiinok, amok nunggwi,

Anggur amburu toologo it inake pugwi kiinok nunggwi,

Eeko menggaarak nogo ineebe ngge o?

It nen yeenggwa kiraawak nduk mi'nogwe,

Kinarum logowak nduk inabu'me pinagagwi,

Eeko logowak o.

39Ala lombok ambit an aret kinigen pe'neyaanip o.

Ala alik ambi wonage lek, nalik aret logonet,

Aakumi inoorogo piige, ineenik agago piige,

Inawinde-inobaande agago piige, lek eerogo piige,

Eeke minggirak an aret me,

Aap ambi nen, Eeppiyoorak mage, yo'niriyak meek o.

40An neenggi titik agago mbogut paga nippunuk, kumbuk mbangge logonet,

41Nawooluwak ngget nggabuniminggirak abinak o yabok pogom eeke nogo,

Aakumi maluk onggo wogoraakit nduk, wagangge logominggirik,

It an ninom ogoorak menggaarak nogo inooke,

Inanini nombako menggaarak nogo onggo eeppiige,

Eeke logogin o.

42Amburu ndonggok togon nenok kumili aganake menggi kwak,

It aakumi inoorak inamiya inom, keele maarak inamiya inom, nomaale nen nengge kagak,

Nobaloowi paga inoweewi wim wone mbangga inenggaanok mbanogo piige logogin o, yinuk,

Nalik mondok neenik minggirak nen abet aret yagi o, yinuk,

Yereegerak me, yokkiragi o.

43  Togop aret yereegerak me,

Ala nen at ayeloman mini inamee'nggo wagangge,

Inom wim mbanak nen eeppiyareegwaarak inikime aberak nogo onggo inooke,

At apuri inom, inanggween inom, obeelom eerogo piige,

Eerigin me,

Kit aakumi kinanebunu lombok yi wae.

Kiniki ale'nggen nen at apuri kinom keyage wako logonip o.”

yinuk, ndawi pereegerak, nogo ti aret.

44At Muta aap Nun aput Yotuwa nogo imbirak nen ndawi abok aret tiyanggwi iigak, it aakumi Iterali mendek nogo inaruk konenggo nogogwaarak.

At Muta nen irip paga kuli inaruk wareegerak wone

45At Muta nen yi wone ndi wone abok aret it aakumi Iterali mendek tigitogon yorage nagagerik, 46-47wone ambi ari logonet, “Eeko logorak wone yugu liiru mbanak abok aret an yogondak yokkiragarak yi nogo ti, aanom warogo yokkirage lek o. Ata, kit kineenik logorak kinake aret me, kit niyo Yoraran wunda nanuk, o kit unde a'nuk logowam time logonet, kineenik nggorek aret wonogwe, ndi, kinapuri nen liirogon konembunuk, eeko logowak nduk yorogwe, eeko logomunggup nduk, yokkirage me, kiniki liippunuk, waganggo logonip o,” yinuk, yoragagerak.

At Muta kambuurak eyom panggoni wage mbareegi, yoreegerak wone

48  Yorage mbareegi, ne ti eyom paga aret at Aliku ALA nen Muta yoge logonet, 49“Kat nen aakumi Mowap mendek iname o Abarim puut nggelok-nggobok time nage logomenggendik, o Yeriko wunggagak puut Nebo paga aret lagi nanuk, o Kanan it aakumi Iterali wogoraminggirak unde a'nuk logowam time kena nakkanu o. 50Kena mban nakkage logomenggendik, kat koweeluk Karun nogo puut Kot paga kambunuk, kinombomini nogogwam nggwogoba wonogwe me iya nagagerak kwak, kat kunduk kambunuk time aret iya namunggun o. 51Kit kimbirak ti, niyo Meriba eneeri wungge menggim o Tin karume tini Kareti koorok nogome logonet, it aakumi Iterali inenggaanom paga an kikak naka'lek abu obeelom minggirak neyaawak nduk, eeriyak op kwe, kiniki an noba panggombunuk, nayuk wurulik eereegutak me, 52kat nen it aakumi Iterali mendek inanggween wogorage nogome unggwi namunggun lek o. Ata, we keebe nda nen kena mban nakkanok nduk, yokkigi o,” yinuk, yoreegerak.

Pelaareegerak 31:130

 Muta obaane'me Yotuwa mippereegwaarak wone

1Ti'nuk, at Muta nen aakumi Iterali abok aret wone ambi yoragagerak nogo yi o. 2 “An ndarak neegak tahun seratus dua puluh aret agaarak me, an nen wokkiren nege logorak meek age, ndi, at Aliku ALA nen ari logonet togon, Kat niyo Yoraran ayo mbaninuk ene pagan time wunda noorak lek o, yo'nege, eereegerak me, 3at Aliku kinogoba Ala nen aret aa'nduk a'nuk wokkiren wunda nage logomenggerik, it aakumi inanebunu lombok o time wonogwe nogo lek eerogo piinet nage kenok, it inanggween nogo kit unde eeppatinuk logomunggup me, at Aliku ALA nen yereegerak nogo ndak-ndak at Yotuwa nen aret aa'nduk a'nuk wokkiren wunda nagin o. 4 Wokkiren nage logomenggerik, at Aliku ALA nen aap o Amori mendek inoweewi inendagembogut Tikon inom, Ok inom, inawi tini abok inom, lek eerogo piyareegerak nogo ndak-ndak, it aakumi inanebunu lombok o time wonogwe ti, togop aret eerogo piyaagin o. 5At Aliku ALA nen kinawim ti, kineenggime wokkirage kenok, an nen yokkiragagirak ndak-ndak aret eeppiyaamunggup o. 6At Aliku kinogoba Ala nen teppinagage, eraanggi mbo pinaganuk mbagangge, eerigin lek kinom aret nagin me, it aakumi ti, ineebe paga kinagabiti mbakwi, kinaganak nuk-nuk kirage, eerugup o. Ata, kit kinogogumbuk kiniki nu'lek eeppatinuk logonip o,” yoragagerak.

7Yorage nagagerik, at Muta nen Yotuwa wiige nagagerik, it Iterali mendek abok inenggaanom paga yoge logonet, “Yotuwa wae. Kat nen aret it aakumi yi, o at Aliku ALA nen, Wokkiraagin o, yinuk, abuk nggaruk togon kumbuk mbanogo inombomini yoragagim time wogoren unggwi nage logomenggendik, nggween nogo ineyate kwak unde a'nuk logowak nen, mbanogo wogoraanok nduk, piya noorak me, kat kogogumbuk kiniki mondok nu'lek eeppatinuk logot o. 8 At Aliku ALA nen teppagage, eraanggi mbo paganuk mbagangge, eerigin lek kimbirak aret logonet, tu nikkeren nagin me, kat kagabiti mbake, Eeriyak, anggon eekkake, eerugun o,” yoreegerak.

Eeko logorak wone liiru mbanak nogotahun6 eeppunuk ambi eerak paga mbininggak eeko logorak wone

9Yoge nagagerik, at Aliku ALA nen eeko logorak wone yereegerak nogo abok aret at Muta nen liiru mbanogo pit nage nagagerik, Aliku ALA inom wone koonogo pugu aloobut mbanak me yonggolak it aap Ala unde anebunu Lewi mendek eewu'nuk nogo menggaarak nogo inom, it aap Iterali mendek inoweewi yo'nggok abok aret nogo inom, wogoragagerak. 10 Wogorage nagagerik, it yorage logonet, “Tahun 6 eeppunuk, ambi eerak irip yubuni nage kagak, ooliya wureegwaarak aberogo laago lakwi paga nomat inobaga luurik nogo, We aret kolaanip, yoroorak eyom aret me, 11it aakumi Iterali abok aret at Aliku inogoba Ala nen o leenogo patemenggim nogome at owagam kuwak ari woramenggaarak inaruk iigak, eeko logorak wone yugu liiru mbanak yi, kinoone nggwok paga lombok mbininogo yorogo logorak aret me, 12Togop me, it aap inom, kumi inom, elege inom, aakumi nggiru kinawi tini lombok kinom monggotak inom, abok aret kuwak ari woraanuk, at Aliku inogoba Ala oone inaruk konenggwi, inagabiti ombako logowak nduk mamunggologwe, eeko logorak wone yugu liiru mbanak yi, liirogon mugurok nogwe, eeko logowak nduk, mbininogo yorogwe, 13ndi, o kit niyo Yoraran wunda nogo logomonggotik, unde eeppatinuk logowam ari nanuk, kangga'lek awo kineenik wonogo logonet, eeko logorak wone yugu liiru mbanak kinapuri ineenggo'lek yi, time nen inaruk konenggwi, at Aliku inogoba Ala inagabiti mbako logorak mamunggologwe, eeruwak nduk, mbininogo yorogwe, eeko logonu o,” yinuk, yoragagerak.

At ALA nen wone irip paga Muta yoreegerak wone

14Yorage mbareegi, at Aliku ALA nen Muta wone ambinom yoge logonet, “Kat kambuurak eyom abu aret panggo yegerak me, at Yotuwa eeke logorak yogop-ndogop yorikit nduk, Mok o, yoge logomenggendik, wonok an ninom lambungge minggim nawooliya wurik me time nak o.” Yoge mbareegi, at Muta Yotuwa imbirak Ala inom lambungge menggim awooliya wurik me time nogogwaarak.

15Nogo mbareegwa, ndugwi nogo Ala awooliya wurik tungga irimbaga taati ari wage kagak, Aliku ALA ndugwi nogo enggela'me nen nigiige nagagerik, 16Muta yoge logonet, “Kat kombomini kambunuk nogogwam nggwogoba wonogwe me, kinom tat yonggonggolage logonok nduk, namunggun me, kwe ambi ogonggelo mbo punuk, aap alik kwaarit nege menggi kwak, it aakumi yi, an mbo panugo logonet, ninom wone abuk nggaruk togon koonogo pereegurak nogo taganogo punuk, o it logowam time an nalut eekwi nobaane'me aakumi time wonogwe inagugi ayuk wuko logonet, eerit nogo logogun o. 17Togop eekwi iinok ti, an nanini kani kunik negen inobaga kwippiige, eraanggi mbo piinok mbagangge, nambot iige, eeke neenok, ineebe lek ogwe, aaninggin-paaninggin inoba kwi'nage, inawi maluk age, eeke kenok, it nen yogo logonet, At ninogoba Ala ninom lek me, aaninggin-paaninggin ninoba age yi nogo lek a? yinuk, iniki aberemenggaarak kwe, 18ti eyom paga it an nalut eekwi nobaane'me inagugi ayuk wuko logonet eekwi ti, abu maluk lombok eekwi me, nambot iinok, logogin o.

19Togop aret me, an yagarak mbo punuk alik eekwi iinok, At Aliku ALA nen togop eeppinanigin, yegerak o, yinuk, iniki penggenggagak eeke logowak nduk, ndawi yi, it inake liiru mbangge logomenggendik mamunirage, eebe, Wa'nip o, yorage, eeke logot o. 20An nen nggween, Wokkiraagin o, yinuk, it inombomini wone abuk nggaruk togon kumbuk mbanogo yoragagim yilak amburu inom, nggiin amburu inom, niyo eneeri negen kila-kila wungge menggim nogome wogoren piya nage neenok, yi mendek ndi mendek abe mban ndonggok togon nonggo logomenggaarik, ineebe kole aremenggaarak kwe, an mbo paninuk, ninom wone abuk nggaruk togon koonogo pereegurak nogo taganogo punuk, an nalut eekwi nobaane'me kugi ayuk wuko logonet, eekwi iinok, 21aaninggin-paaninggin inoba kwi'nage, inawi maluk age, eeke kagak, ndawi liiru mbanak yi, it inapuri-inombowologwe nen mari eerogo pugun lek me, inikime logonet, aberiragak mban eeke logogin o. An nen nggween, Wokkiraagin o, yinuk, abuk nggaruk togon kumbuk mbanogo yoragagim time awo wogoren piya naga'lek neegak kwe, it iniki mba'nuk eeriyak nogo muk neenu aret me, yagi o,” yinuk, yoreegerak. 22Yoge mbareegi, ne ti eyom paga aret at Muta nen ndawi nogo liiru mbangge nagagerik, it aakumi Iterali mendek nogo mamuniragagerak.

23Mamunirage mbareegi, ti'nuk, at Aliku ALA nen aap Nun aput Yotuwa nogo yoge logonet, “Kat nen it aakumi Iterali mendek yi, Nggween wokkiraagin o, yinuk, abuk nggaruk togon kumbuk mbanogo yoragagim time wogoren unggwi namunggun me, wogoren nage keegak, an lombok nimbirak aret nagin me, kogogumbuk kiniki mondok nu'lek eeppatinuk logot o,” yoreegerak.

24Yoge mbareegi, at Aliku ALA nen eeko logorak wone yugu yi, alom me kuli nen nok irip paga kuli abok aret at Muta nen li'luk eerogo mbuku paga liiru mbangge nagagerik, 25Aliku ALA inom wone koonogo pugu aloobut mbanak me yonggolak it aap Lewi mendek eewu'nuk nogo menggaarak nogo yorage logonet, 26“At Aliku ALA nen eeko logorak wone yereegerak mbuku paga liiru mbanogo pigirak yi, it aakumi Iterali mendek alik eekwi iinok, iniki mondok-mondok penggenggagak eeke logowak nduk, waganggo logomonggotik, at Aliku kinogoba Ala ninom wone koonogo pereegurak aloobut mbanak me yonggolak nogo eraanu time pinip o. 27It aakumi yi, wone yugu tagangga inanobak yugum an abu neenu aret o. An neenik neegak togon Aliku ALA oone taganggwi iige nagarak me, an kambiminggirak neegak ti, abunuk aret eeko logogun o. 28-29An kangge neegak, it aakumi yi, an nen, Eeko logorak, yorage nagarak nogo mbo punuk, eekulik maluk mendek kagak eerit nogwe, ndi, o peebi ndime Aliku ALA enegen kagak maluk mban eerit nogo logonet, Ala anini wunduwak nduk, ineenggi paga ogobakkigirogo punuk eeremenggaarak paga aaninggin-paaninggin alik mendek inoba kwi'nage, eerigin nogo an neenu me, o yogondak it aakumi yi, Togop yagaarak o, yuwak nduk, mbogut inom, nggween inom, wiiraminggirak inenggaanom paga an wone yi abok aret yoraakit nduk, it aap inanebunu lombok inoweewi inom, wim wone mbangga inom, abok an nowagam kuwak eerogo piya woraanip o,” yoragagerak.

Muta nen ndawi pereegerak wone

30Yoragagerak kuwak eerogo piya wogo mbareegwa, it aakumi Iterali wonogwe nogo abok inaruk iigak, at Muta nen ndawi alom me nen tiyanit nagagi-nagagi irip yubuni nagagerak nogo yi aret o.