Pelaareegerak 26:1-19

 Anggen aa'nduk yugu mbanogo Ala ake pogo logorak wone

1Yorage nagagerik, ambi yorage logonet, “At Aliku kinogoba Ala nen yate negen o wokkirage nogome unggwi nogo logomonggotik, o ti abu aret kolaanuk, ye mbambatinuk wonogo logonet, 2 at Aliku kinogoba Ala nen kinanggween wokkirage ti paga yi mendek ndi mendek awi yarumonggotak anggen iyaalok yemenggerak nogo mbanogo muun yarak me yonggologo punuk, wonok at Aliku kinogoba Ala nen, An wonage me yime nen mban nendage tiyappogo logowak o, yinuk, o leenogo patemenggim nogome pi nogo logomunggup o. 3Pi nanuk, ne ti eyom paga at aap Ala unde wonage nogo yogo logonet, At Aliku ALA nen nit ninanggween wo'niroorak nduk, ninombomini inom wone abuk nggaruk togon kumbuk mbaneegwam nogome, Muk unggwi wogo nogoorik, at Aliku ninogoba Ala yi eyom paga keyage waruwok nduk wogo, yo'nu o.

4Yogwi kiinok, aap Ala unde nogo nen muun yarak me anggen mbanak yonggolak nogo kineenggime nen wagangge logomenggerik, wonok at Aliku kinogoba Ala ake pogo menggam eyo ndoonak enaame paga pi nawak o. 5Pi nage kenok, kit nen at Aliku kinogoba Ala enggaanom paga wone yogop aret yumunggup o.

O maan togon it aakumi Aram mendek ninogoba ambi yaluk-ndaluk agan nege nagagerik, apuri we mbuuluk mban inom o Metit ari nanuk, aap nggiru negen wonogo logonet, inanebunu nggwok lombok wigak yogo nogogwaarik, inomaawi ambik ineebe ambik lombok ogogwaarak.

6Ambik ogo mbareegwa, aakumi o Metit mendek nen nit inayeloman eeppinaninuk, yabu meek lagik-loguk eerogo aaninggin ninoba pinanugo mbareegwa, 7ninoone nggwok paga at Aliku ninogobamini inogoba Ala yogo mbareegu, Aliku ALA nogo aruk konengge, meek lagik-loguk eerogo pinanugwi nogo enegen niige, aaninggin inoba pinanugwi nogo niige, tebembinanogo wonogwe nogo liippinanege, eeke nagagerik, 8at Aliku ALA nen ineenu agak inagabiti warak mendek inom, Wi, yuwak nduk eerubok mendek inom, aakumi Metit mendek inenggela'me eeke nagagerik, it Metit mendek iniki ma'naruwak nduk, eenggi omaawi ambik lombok paga eeppiige, eenggi titik paga eeppiige, eerit o Metit nen wo'niren wundi wagagerak. 9Wundi wage nagagerik, nggween abu anggiinu lombok yilak amburu inom, nggiin amburu inom, niyo eneeri negen kila-kila wungge menggim o yime aret pinani wage nagagerik, o yi aret wo'niragagerak o.

10Togop aret me, Kaliku ALA nen ninanggween wo'niragagindak nogo paga yi mendek ndi mendek awi yako nogoorik, anggen iyaalok yegerak mbanogo kat wokkiriyak nduk, wonok pi wogo o, yinuk, Aliku ALA yogo logomonggotik, anggen mbanak yonggolak nogo waganogo at Aliku kinogoba Ala enggaanom paga pogo logomonggotik, kinendobanggun yindumbunuk, alut eerumunggup o. 11At Aliku kinogoba Ala nen kit inom, kinom monggotak inom, yi mendek ndi mendek obeelom aret wokkirage kenok, kit inom, aap Lewi mendek inom, aap nggiru kinenggela'me wonogwe inom, abok aret kinom kiniki ale'nggen paga aret eeko logomunggup o,” yoragagerak.

Anggen iyaalok mbanak ambi yendenogo Ala ake pogo logorak wone

12  Yorage nagagerik, ambi yorage logonet, “Tahun mbere eeppunuk, ambi eeke paga yi mendek ndi mendek anggen iyaalok yugu mbambunuk, ambi yendenogo Ala ake pogo logorak koonak nogo paga abu aret pogo logomonggotik, waganogo aap Lewi mendek inom, aap nggiru inom, elege moono inom, kumi nanu inom, kinom wonogwe nogo nunggwi iinok, ineebe op logowak nduk, it wogorogo logomunggup o.

13-14Abu aret wogorogo logomonggotik, at Aliku kinogoba Ala yogo logonet, Kaliku ALA nen wone, Yogop ee'nu ndogop ee'nu, yo'niragagindak nogo ambi taganogo pugwi, ambi kobak eerogo pugwi, eerulik kat yo'niragagindak nogo mondok ndak-ndak aret kake pugu abu leenak mendek nogo, nit tabun paga logonet, ambi waganogo nunggwi, maluk ninoba lenggenak wonage logonet kunduk, wonok endekem wundi nogwe, aakumi kanggwi iinok wogorogwe, eerulik o. Ata, Kaliku ninogoba Ala nen wone lengganogo yo'niragagindak nogo ndak-ndak mban eeko logonet, kake pugu abu alik leenak lombok ti, nit niname nen apit aret waganogo aap Lewi mendek inom, aap nggiru inom, elege moono inom, kumi nanu inom, wogorogo o.

15Togop aret me, kat kame agi mbogut irimbaga alik leenak menggenom time logonet, kiniki ale'nggen paga kapuri Iterali mendek kena wu'niya woraanuk, obeelom eeppinanege, ndi, ninombomini yorage logonet, Kinanggween mili obeelom yilak amburu inom, nggiin amburu inom, niyo eneeri negen kila-kila wungge menggim wokkiraagin o, yinuk, wone abuk nggaruk togon kumbuk mbanogo yoragagindak ndak-ndak aret wo'niragagindak nggween nogo kunduk obeelom eeppege, eeru o, yinuk, yogo logomunggup o,” yoragagerak.

Ala wone eeko logorak irip paga keele maarogo yoragagerak wone

16-19  Yorage nagagerik, ambi yorage logonet, “Ne yogondak yi paga aret at Aliku ti, ninogoba Ala aret o, yinuk, yogwi, at nen yo'nirage nogo mban mugurok nogwe, wone lengganak inom, Yogop ee'nu ndogop ee'nu, wone yugu inom, eeko logorak wone inom, mondok liirogon aret porogo wonogwe, at nen wone yo'nirage nogo ninaruk konenggwi, eeko logowok o, yinuk, wone abuk nggaruk togon yogotak o.

Ndi, at Aliku ALA kunduk ne yogondak yi paga mban, wone, Yogop ee'nu ndogop ee'nu, yokkiramenggerak nogo mondok nggirik-nggerok porogo wonogwe kiinok, at nen eeppinagarak koonogo pereegerak nogo ndak-ndak aret, kit at apuri iniki kundugu lombok eerogo pinagage, yi aakumi ndi aakumi ogobakkigirogo piyareegerak nogo inirimbaga wonogwe kiinok, Wi, kirogwe, kinendage tiyappinagagwi, kinayuk wukwi, eeruwak nduk, eerogo pinagage, ndi, at koonogo pereegerak nogo ndak-ndak at Aliku kinogoba Ala ake leenogo pake, eerogo pinagagin o, yinuk, wone abuk nggaruk togon yokkirage, eeruwak nduk, eekotak me, kit eeko logorak wone lengganak inom, wone yugu inom, at Aliku kinogoba Ala nen o yogondak yi paga yokkirage yi, kiniki paga inom, kineebe paga inom, abok aret liirogon mugurok nogo logonip o,” yinuk, yoragagerak.

Pelaareegerak 25:1-19

 Inomaluk onggo eeppiigo logonet, liippunuk, eeko logorak wone

1Yorage nagagerik, ambi yorage logonet, “Aap ambi imbirak wone wariyak age kenok, aap inowak loonggo menggam time namenggaarak me, it aap inowak loongga nogo nen wone aremenggerak nogo mbeenogo inowak loonggo logonet, at ambi oba abe eerogo pugwi, at ambi oba maluk eerogo pugwi, eeppunuk, 2-3 aap maluk eeremenggerak nogo yawi wariyak aret age kenok, aap inowak loongga nogo nen aap nogo enete wanduk punuk, yawi waruwak nduk, yoramenggerak yawi wako logonet, Aap ninoreeluk yi abu maluk eekerak me, mba'nuk, meek eerogo pogo logonet warukwak, yawi ne 40 agi nggwe negen wariyak ti mage o. Ata, aap inowak loongga inenggaanom paga at maluk eeremenggerak ndak-ndak aret yawi wako logowak o.

4  Lembu nen iniyok paga gandum anggen mbelanit nage kagak, ando nunggwi iyo, inambe keele maarogo piigo logorak mage o,” yoragagerak.

Inore ambi kangge kenok, akwe nanu waganggo logorak wone

5  Yorage nagagerik, ambi yorage logonet, “Aap ambi kinoreeluk kinom wonage me, aput wulaga obaane'me pugu lek aret kangge kenok, akwe nanu pemenggerak nogo aap anebunu tayorogon ambi paga wogonabi noorak mage o. Ata, kumi wogonako logonet eeko menggaarak nogo ndak-ndak aret aap kambemenggerak nogo ore liirogon inogoba ambit kenok aret kolage logowak o. 6Kolage logomenggerik, kwe nogo aagaluk manggu ndake kenok, aap kambemenggerak nogo Iterali inenggela'me endage ki logowak nduk, aap kambemenggerak nogo aput eerogo pogo logowak o.

7  Ndi, aap kambemenggerak ore nogo nen, Kwe nore nanu ti, an woorak neebi o, ari kenok, kwe nogo nen it aap inoweewi kota tu unggwogo menggam wonogwe nogo inowagam nage logomenggerik, yorage logonet, An narogweluk nogo nen aakumi Iterali wonogwe me endage ki logowak nduk, kumi kologo logonet, eeko menggaarak nogo eeriyak neebi, ari kenok, yokkira wagi o. 8Yorage kenok, it aap inoweewi o kota wonogwe nogo nen aap nogo wiiremenggaarak wage kenok, eegwa'me wamenggaarak kwe, aap nogo nen, An woorak abu neebi o, yemenggerak togop nogo aret ari kenok, 9kwe nanu nogo nen aap inoweewi nogo inenggaanom paga aap arogweluk nogo iyogogut yirik ambi nggoorogo punuk, yoge logonet, Ore endage ki logowak nen obaane'me piyoorak eebi mbake kenok, yogop aret eeriyak me, yinuk, awoori etenggen paga lenggenogo nappuwak o. 10Ti eeremenggerak paga it aakumi Iterali mendek nen aap nogo owe-awot inabok mbanggo logonet, Iniyok ogut nggoorogo wogoragagerak mendek nogo yi aret o, yinuk, yogo logogun o,” yoragagerak.

Yi wone ndi wone alitak eeko logorak yoragagerak wone

11Yorage nagagerik, ambi yorage logonet, “Aap mbere nen ndugwi pugwi me, aap ore nogo akwe wage logomenggerik, ogonggelo nogo ili woorak nduk, eeke logonet, eenggi paga aap ambi nogo ooli nikkage kenok, 12kwe ti abuwa mbaka'lek aret eenggi mbanogo nappogo logomunggup o.

13-16  Yi aap ndi aap nen yi mendek ndi mendek aaninggin wakkogo logonet, wi-wi aganako menggaarak nogo ti, at Aliku kinogoba Ala nen eebi mbake menggerak me, at Aliku kinogoba Ala nen kinanggween wokkirage nogome logonet, kineebe li a'nuk kanggo logomunggup nduk, aaninggin wakkagak yugum kole inom, mbuuluk inom, imbirak kinayuma yonggo'nuk nugwi, ndi, yonggologo wakkagak togolowak nggwok inom, mbuuluk inom, imbirak kiname wonage, eeriyak mage o. Ata, aaninggin ari nage menggerak paga ndak-ndak aret wakkagak wogorogwe, ndi, togolowak ambit nogo paga yonggoppunuk, wakkagak wogorogwe, eeko logomunggup o,” yoragagerak.

Aakumi Amalek mendek lek eerogo piyareegwaarak wone

17-18  Yorage nagagerik, ambi yorage logonet, “Kit o Metit nen wundi wogo nogogutik, tu paga wogo logonet, kineebe ndeyak eerogo pinagage, kinowak aagi age, eekkinabeegerak wogwe kiigak, it aakumi Amalek mendek nen Ala inagabiti mbaka'lek wundi nogo logonet, kinoreewi inowak lobak yereegerak kinambokan wogwe inooreegwaarak nogo kiniki abeko logomunggup o. 19At Aliku kinogoba Ala nen kit unde a'nuk logomunggup nduk, yate negen kinanggween wokkirage nogome kiniki ugun tayenak logomunggup nduk, kinawim kinaagan-ambokan wonogwe nogo tebenogo piinok, time wonogo logonet, aap Amalek nogo inendage ki logokwak, o nggween paga yime inenggaawak lek eerogo piigo logorak nogo mari eerogo puurak mage o,” yinuk, yoragagerak.