Pelaareegerak 11:1-32

 ALA mondok nggwok lombok wonage yoragagerak wone

1Yorage nagagerik, ambi yorage logonet, “At Aliku kinogoba Ala nogo kiniki kunik eeko logonet, at eeriyak mbareegerak inom, wone lengganogo pereegerak inom, eeko logorak wone koonogo pereegerak inom, Yogop ee'nu ndogop ee'nu, yereegerak inom, nggirik-nggerok porogo logonet, mondok-mondok eerit nogo logonu o.

2-7    At Aliku kinogoba Ala tiyanak kenok, Wi, ugwi, at eenggi omaawi paga eerit nage, eenggi titik eeke kenok eeppiige, ineenu agak eerubok mendek eeke, aap endagembogut o Metit mendek Pirawun eebe paga inom, at apuri o Metit mendek ineebe paga inom, mondok iya lombok eerogo piige, o Metit mendek ineegin unde inom, inaguda inom, inanggweendo inom, kit mukkiren wogwe me, at Aliku ALA nen niyo yenggenak Laut Merah inikime taanogo piinok, ineebe lek eerogo piige, o karume nen wokkiren o yime pinagi wage logonet, eeppinagit wundi wage, anebunu Uruben mendek aap Eliyap apuri Ndatan inom, Abiram inom, iname inom menggaarak inom, inawooliya wurik inom, it inoone koneneegwaarak inom, abok aret kit Iterali kinenggela'me nggween nen ambeme yonggorinabuwak nduk eeppiige, eereegerak nogo ti, kit kinapuri nen inigen kogwe, it Metit mendek iniki koonuwak nduk eeppiige nogo ineenu ogwe, eeruwak nduk eerulik o. Ata, at Aliku ALA nen iya lombok eereegerak nogo ti, kit lombok kinigen abe nen aret kogogutak me, wone yogondak yokkirage yi abe'nip o,” yoragagerak.

Abet mbakwi iinok, ale'nggen inoba piigwi, abet mbaka'lek iinok, pulunogo piigwi, eeko logorak wone

8-9Ti'nuk, ambi yorage logonet, “Kit niyo Yoraran wunda nanuk, o logowam nogome kinomaawi paga unggwi nogo logomonggotik, unde eeppatinuk wonogwe, ndi, at Aliku ALA nen kinombomini inom, inombowologwe inom, nggween abu obeelom nggiin amburu inom, yilak amburu inom, niyo eneeri negen kila-kila wungge menggim, Wokkiraagin o, yinuk, wone abuk nggaruk togon kumbuk mbanogo yoragagim nogome logonet li a'nuk kanggwi, eeko logobagip nduk, an wone, Yogop ee'nu ndogop ee'nu, yinuk, yogondak yokkirage yi, liippunuk, eeko logonip o.

10Nggween kit unggwi nanuk unde eeppatinuk logowam ti, aakumi noorak ake kom yappunuk, niyo mbininogo mambi wogo mengga kwak, kit o Metit paga logonet, yabu aaninggin-paaninggin eerogo yappunuk, anggen mbanogo nonggo nogogutik, wundi wogogu'nom togo'nogo lek o. 11Ata, kit niyo Yoraran wunda nogo logomonggotik, unde eeppatinuk logowam time ti, mayu mbogut paga nen wurabi wage logonet, puut nggelok-nggobok inom, kobappaga inom, amburu warak eerogo pit nage menggim time aret namunggup o. 12Kinanggween ti, at Aliku kinogoba Ala nen arum wonage, enegen liippege, eeke kagak, yi tahun ndi tahun mbi yarumonggotak kuli nen nok, alom kinok yi noorak kuli aret age logogin o.

13  Kit nen at Aliku kinogoba Ala kiniki kunik eekkologwe, kiniki inom, kineebe inom, abok aret at mban wogo'nuk mugurok nogwe, eeko logomunggup nduk, an nen wone, Yogop ee'nu ndogop ee'nu, yinuk, yogondak yokkirage yi, mondok liippunuk eeko logonip o. 14Liippunuk eekwi kiinok, awi yakwi eyom paga awi yarak mbilanuwak nduk mayu wokkirage, eebe mbaniyak eyom paga anggen piiruwak nduk mayu wokkirage, eeke kagak, gandum anggen mbanggwi, anggur anggen aambiranogo amburu tookwi, eyo tayitun amburu toologo pugwi, eerogo pako logomunggup o. 15Ndi, kinaanggumi iri'ngga pipuk eerogo piige, kit mbi ndonggok togon nonggo logomunggup nduk, wokkirage, eeke logogin o.

16Kiniki nomongginakwi iinok, Ala kinambokan mbo punuk, obaane'me kugi ayuk wurogo alut eeko logokwak, kiniki liippogo logomunggup o. 17Liippega'lek kiinok, at Aliku ALA anini mi'na'nuk, kinoba pinagage logonet, kinambi yarumonggotak engga mbuk eerogo puwak nduk, mayu wage kero, mbogut paga tu narogo pege, kit o obeelom wokkirage time logonuk lek mbet-mbet aret kambumunggup nduk, eeppinagage, eekkinake kero, 18 wone yokkiragarak yi, kinikime liirogon waganggo logomonggotik, mondok aberak logomunggup nduk, kineenggi paga inom, kinenggaawak paga inom, kineenu agak pugunik aret logowak o. 19Kinapuri mbininirogo logonet, oome kwi'ndak logonet, endekem tu paga nogo logonet, yonggonggologo logonet, yabu eeko logonet, liirogon aret mamunirogo logomunggup o.

20-21At Aliku ALA nen nggween, Wokkiraagin o, yinuk, wone abuk nggaruk togon kumbuk mbanogo kinombomini yoragagim time logonet, mbogut yi, lek aga'lek awo wonage kagak, kit kinapuri kinom kineenik mondok nggorek logomunggup nduk, wone yokkiragarak yi, kinawi tungga paga inom, tu unggwogo menggam paga inom, abok aret liiru mbanogo pogo logomunggup o.

22Kit nen at Aliku kinogoba Ala kiniki kunik eekkologwe, Eeriyak, kinombake nogo mugurok nogwe, kiniki at paga mban panggonak wonogwe, eeko logomunggup nduk, an wone, Yogop ee'nu ndogop ee'nu, yinuk, yokkiragarak yi, abok aret liirogon eerit nogwe kiinok, 23at Aliku ALA nen aa'nduk a'nuk, yi aakumi ndi aakumi kit ndak-ndak lek ineebe yo'nggok inomaawi ambik ti, mugogo wumbiige kenok, kit nen inanggween ti paga ye mbambatinuk logomunggup o. 24 Inanggween kit logorak ti, o karume nen nugwa, puut Libanon kuli inom, niyo Eparat nen nugwa, niyo nggwok yenggenak oonegen kilu yi nage menggim pa'nggwe inom, kiniyok pit namonggo'nom time abok aret kit unde a'nuk logomunggup o. 25Ndi, at Aliku kinogoba Ala nen koonogo yokkiragagerak nogo ndak-ndak aret o kit kiniyok pit namonggo'nom abok aret kit kineebe paga inagabiti mbako logonet, inaganak nuk-nuk iraawak nduk, at Aliku ALA nen eeppiyaagin me, it aakumi ti mendek nen kinaru non mbambinagagun mondok lek o.

26Togop aret me, ne yogondak yi paga aret kugi pulunogo pinagarak a, ale'nggen kinoba pinagarak a, nogo kit mban miikkolaamunggup nduk, yokkirage me, liippinip o. 27At Aliku kinogoba Ala nen wone, Yogop ee'nu ndogop ee'nu, yereegerak wone an yogondak yokkirage yi, liirogon konembunuk, eekwi kiinok, ale'nggen kinoba pinagage, 28ndi, at Aliku kinogoba Ala nen, Yogop ee'nu ndogop ee'nu, ari nogo konembunuk, Ndogop eerit nogo logonip o, yinuk, an yogondak yokkirage yi, eeka'lek mbo punuk, Ala obaane'me kugi kit kineenggo'lek mendek ambi mugurok nogwe kiinok, pulunogo pinagage, eeke logogin o.

29  Togop aret me, at Aliku kinogoba Ala nen o kit unde a'nuk logowam time abu aret pinagi nage kenok, ale'nggen kinoba pinagarak nogo ti, puut Nggeritin paga logonet yogwe, ndi, kugi pulunogo pinagarak nogo ti, puut Eban paga logonet yogwe, eeko logomunggup o. 30Puut mbere ti, niyo Yoraran enebagan tu nggwok yarak oonegen kilu yi nage menggim pa'nggwe aakumi Kanan inanggween o Araba kobappaga nonggologo pereegim o Nggileyat korotok eyo tenonggaame o More nogome aret wonage o. 31Kit o yogondak yi paga aret niyo Yoraran wundogo logomonggotik, at Aliku kinogoba Ala nen kit o unde a'nuk logomunggup nduk, nggween wokkirage me time unggwi namunggup o. Ndi, unggwi nogo logomonggotik, unde eeppatinuk wonogo logonet, 32wone lengganak wone inom, eeko logorak wone inom, an yogondak yokkirage yi, mondok liirogon aret eeko logomunggup o,” yinuk, yoragagerak.

Pelaareegerak 10:1-22

 Yugum tabak liiru mbanak peebi Muta waganeegerak nogo pelaarogo yoragagerak wone

1Yorage nagagerak, ambi yorage logonet, “Ne ti eyom paga at Aliku ALA nen an yo'nege logonet, Yugum tabak mbere'ndak aa'nduk eereegindak togo'nogo ambi ogobakkigike, yugum ti, yonggolak logorak eyo paga aloobut mbangge, eeke logomenggendik, yugum tabak mbere nogo wonok an wonage me puut paga yime lagi mok o. 2Wonok lagi wage keenok, an noone yugu yugum aa'nduk liiru mbanak telenogo pegendak nogo ndak-ndak aret yugum tabak mbere paga an nen liiru mbanogo wokkege neenok, naloobut mbanemenggenom nogome yonggologo punu o.

3Yo'nege mbareegi, an nen eyo liibu paga yonggokak aloobut mbangge, pulu paga yugum aa'nduk ogobakkigireegirak togo'nogo mbere loongge, eeke nagagirik, yugum tabak mbere nogo neenggime wonok puut paga laganeegirak. 4Lagangge mbareegi, at Aliku ALA nogo eebe kani omoonuk wunuk ari enggela'me nen wone, Yogop ee'nu ndogop ee'nu, yinuk, eeko logorak wone 10 yugu nogo kit abok aret puut abu'me kuwak eerak wonogwe me, yokkirage nagagerik, aa'nduk liiru mbanogo wo'nereegerak nogo ndak-ndak yugum tabak mbere nogo paga liiru mbanogo an wo'nege mbareegi, 5puut paga nen niyokan wambi wage nagagirik, at Aliku ALA nen yo'nereegerak nogo ndak-ndak aret yugum tabak mbere'ndak nogo eyo paga aloobut mbaneegim nogome mambereegirak wonage nogo aret o.

6  Ti'nuk, nit aakumi Iterali nogo it Yaakan mendek inaniyo ambik nggween kabunik me nogome nen o Motera ari wogo nogogurik, aap Karun nogo taati aret kangge mbareegi, o time aret nggween taambunuk, obaane'me aput Eleyatat nogo Aliku ALA unde logowak nduk, mippereegurak nogo o. 7Mippogo nogogurik, o time nen o Nggurogot ari woraanuk, time nen nok, o Yotabata niyo ambik wonage me nogome aret unggwi wogogurak.

8  Wogo nogogurik, inanebunu Lewi mendek nen at Aliku ALA aloobut mbanak me wone yugu yonggolak wonok wogwe, enggaanom paga at ake eekwi, at endage paga inale'nggen aakumi inoba piigwi, eeko logowak nduk, at Aliku ALA nen ne ti eyom paga leenogo mippiyareegerak nogo o yogondak wonogwe yi aret o. 9Togop aret me, it inanebunu Lewi mendek ti, inoreewi ando nggween unde arugun nogo kokwak, it inanggween yate kwak ambi unde arugun mondok lek aret o. At Aliku kinogoba Ala nen yoragagerak nogo ndak-ndak ineyate koloorak nogo ti, at eebe unde ti aret o.

10  Ndi, an aa'nduk puut paga wonage logonet, nogo 40 yereegirak togo'nogo aret peebi puut paga logonet, an nen wone Aliku ALA yoge nogo, at aruk konengge nagagerik, E o, yinuk, kinoorulik teppinagareegerak nogo o. 11Teppinagage nagagerik, Aliku ALA nen an yo'nege logonet, It aakumi ti, inombomini nggween, Wokkiraagin o, yinuk, an ninom wone abuk nggaruk togon kumbuk mbanogo yoragagirak nogome unggwi nogo logomenggaarik, unde a'nuk logowak nduk, Wogoren nak o, yo'nereegerak nogo o,” yoragagerak.

ALA nen yorage nogo eeko logorak yoragagerak wone

12Yorage nagagerik, ambi yorage logonet, “Togop aret me, kit nowe-nawot Iterali mendek yi wae. At Aliku kinogoba Ala nen kit eeko logorak kinombake nogo ti, at Aliku kinogoba Ala kinagabiti ombako logonet, Eeriyak, kinombake nogo mugurok nogwe, at kiniki kunik eekwi, kiniki inom, kineebe inom, abok aret at Aliku kinogoba Ala mban wogo'nuk, ake eekwi, 13ndi, kit wone ambi kinoba aga'lek obeelom mban logomunggup nduk, Yogop ee'nu ndogop ee'nu, yinuk, at Aliku ALA nen yereegerak wone inom, wone lengganak inom, yogondak an yokkirage yi, liippunuk, mugurok nogwe, eeko logonip o.

14Mbogut inom, mbogut irimbaga inom, nggween inom, yi mendek ndi mendek nggween paga wonage inom, abok aret at Aliku kinogoba Ala alik unde wonage o. 15Togop aret kwe, at Aliku ALA nen kit kinombomini nogo inabuwa nggwok lombok mba'nuk iniki kunik aganake nagagerik, aakumi inanebunu andorogon wonogwe iigak, inombowologwe kit mban miirogo pinagareegerak yogondak wonogwe kit yi aret o. 16Togop aret me, o yogondak yi paga nen kit kiniki omaawi a'nuk kinanobak yugum pogom kunggak eeriyak mage o. Ata, kinagabolo mbanggo monggotak kwak, kiniki omaawi wonage nogo lek eerogo mbo pogo logonip o.

17  Ndi, at Aliku kinogoba Ala ti, yi kugi ndi kugi at obaane'me punuk, alut eekwi nogo abok aret at abu'me iigak, at Ala alik aret irimbaga wonage o. Ndi, yi aap ndi aap yo'nggok tebenak iigak, at Aliku ALA alik tiyanak aret wonage o. At mondok tiyanak omaawi ambik mondok iya lombok me, at ambi iya, ambi meek mbake, ndi, at ambi eeppinanuwak nduk, wu wogogwi iinok wagangge, eekeelik o. 18At nen elege moono inom, kumi togwe inom, inawone liirogon koonogo piige, aap nggiru inabuwa nen inambi noorak inom, inayum yikkoloorak inom, wogorage, eeke menggerak me, 19kit lombok maan o Metit logonet, aap nggiru negen aret wonogogutak me, yogondak aap nggiru kinenggela'me wonogwe nogo inabuwa mbako logonip o.

20At Aliku kinogoba Ala kinagabiti mbakwi, kiniki at paga mban panggonak logonet mugurok nogwe, ndi, at endage kunogo kumbuk mbanggwi, eeko logonip o. 21Tam warak inagabiti warak mendek mondok iya tit eerit nage kinigen abe nen kogogutak nogo ti, kinogoba Ala aret me, at mban wogoppogo logonip o. 22 O maan kit kinombomini ineebe we 70 iluk aret o Metit nogogwaarak kwe, yogondak perak, at Aliku kinogoba Ala nen kineebe laaluguragan mbogut paga wonage ti kokwak agago pinagagerak wonage o,” yinuk, yoragagerak.