Pelaareegerak 9:1-29

 “Nit obeelom eekwi paga nggween wo'niraagin,” yuurak lek yoragagerak wone.

1Yorage nagagerik, ambinom yorage logonet, “Kit nowe-nawot Iterali mendek yi wae. Wone yi liirogon kinaruk logonip o. O yogondak yi paga aret yi aakumi ndi aakumi inanebunu nggwok inomaawi ambik lombok kit kinom ndak ariyak lek logonet, inawi kota-kota nggwok lombok wurogo pugwi, yagat pak mbogut ndak negen wurogo pugwi, eeppunuk wonogwe me, unggwi nanuk, inanggween ndinggologo logomonggotik, ye mbambatinuk logomunggup nduk, niyo Yoraran mbanogo pegak wunda namunggup o. 2Wunda nogo logomonggotik, aap ineebe kunduk yo'nggok yerek-nggorek inomaawi ambik lombok aap Enak mendek wiganak aret me, Aakumi ambi nen aap Enak mendek inom wim eeriyak meek o, yogwe konenggo monggotak nogo aret. 3Togop aret kwe, at Aliku kinogoba Ala aa'nduk age logomenggerik, kani omoonuk nen ne ambit liingge nengge menggi kwak, it togop aret inoorit nage logonet tebenogo piinet nage kagak, at Aliku ALA nen wone koonogo yokkiragagerak nogo ndak-ndak kit nen mbet-mbet aret ineebe lek eerogo piigwi, mugogo wumbiigwi, eerumunggup o.

4At Aliku kinogoba Ala aa'nduk age logomenggerik, mugogo wumbiige kenok, kit kiniki mbako logonet, Nit obeelom eeko monggoorak me, o yi unde a'nuk, logowok nduk, pinani wagaarak, mbarubok o. Ata, It aakumi inanebunu abok ti, maluk lombok eeko menggaarak kenok, at Aliku ALA aa'nduk age nagaarik, mugogo wumbiigi, mbarumunggup o.

5Kit nen obeelom eekwi, kiniki abu koonak wonogwe, eeko logomonggotak paga aakumi inanggween time unde arumunggup nduk, unggwi namunggup lek o. Ata, at Aliku kinogoba Ala nen wone abuk nggaruk togon kumbuk mbanogo kinombomini Abarakam inom, Itak inom, Yakup inom, yoragagerak nogo a'me lik yuwak nduk, eeke logonet, It aakumi inanebunu abok maluk lombok eekwi me, yinuk, at aa'nduk a'nuk mugogo wumbiyaagin o.

6Togop me, kit unde a'nuk logomunggup nduk, at Aliku kinogoba Ala nen o nggween mondok obeelom lombok wokkirage nogo ti, kit obeelom eerit nogwe me, yinuk, wokkiraagin ta lek o. Ata, kinanobak yugum pogom wonogwe kiigak aret kwe, wokkiraagin ti, kineenu a'nip o,” yoragagerak.

Puut Korep paga Ala mbo pereegwaarak nogo pelaarogo yoragagerak wone

7Ti'nuk, yorage logonet, “O Metit wundi wogogutak kuli nen yogondak kuli at Aliku kinogoba Ala oone taganogo pit wogwe, o karume time wonogo logonet, anini wunduwak nduk eekwi, eereegutak nogo kobak eerogo puurak ti mage o. Ata, aberak mban logonip o. 8Puut Korep paga nen at Aliku ALA anini wunduwak nduk eeko mbareegup, at anini nen mondok kinooriyak nduk eereegerak nogo o.

9  Eeke mbareegi, an puut Korep paga laganeegirak nogo ti, kinom eeko logorak wone at Aliku ALA nen abuk nggaruk togon koonogo pereegerak yugum tabak mbere paga liiru mbanak nogo wo'niruwak nduk, lagi nage nagagirik, time wonage logonet, an mbi nengga'lek, yi nengga'lek, o kiip age, o weege, eeke kagak nogo 40 aret yereegirak o. 10Nogome wonage me, yugum tabak mbere'ndak paga at Aliku ALA eenggi lombok paga nen liiru mbaneegerak nogo an wo'nereegerak. Wone eebe yugum tabak nogo paga mbanak ti, kit kineebe puut abu'me kuwak aago kiigak, kani omoonuk wunuk ari enggela'me time at Aliku ALA nen wone, Yogop ee'nu ndogop ee'nu, yinuk, yokkirage kogogutak nogo aret o.

11O kiip age, o weege, eeke kagak nogo 40 abu aret age mbareegi, eeko logorak wone abuk nggaruk togon koonogo pereegerak yugum tabak mbere paga mbanak nogo, at Aliku ALA nen an wo'nege nagagerik, 12yo'nege logonet, Kat kapuri o Metit nen wogoren wundi wagandak nogo nen eeko logorak yoragagirak nogo awo aret kagak taganogo punuk, nobaane'me ambi ogobakkigirogo mippogo nagaarik, alut eeko logonet, abu maluk aret eekwi me, mbet-mbet aret wura nak o, yo'nereegerak.

13Yo'nege nagagerik, at Aliku ALA ambinom yo'nege logonet, It aakumi ti, inanobak yugum pogom abet aret iigirak me, 14inanebunu nggwok iigak kwe, kat paga nen kanebunu abu nggwok age, komaawi mondok ambik age, eeruwak nduk, kat kalik mban teppagage logonet, it aakumi ti, o nggween paga yime inendage toonak ki logokwak, inenggaawak mondok lek eerogo piyoorak mbakirak me, kat nen naru non mbanogo paniyak ti mage o.

15Yo'nege mbareegi, puut paga kani omoonuk wunuk ari kagak, eeko logorak wone abuk nggaruk togon koonogo pereegerak yugum tabak mbere paga liiru mbanak nogo, neenggi peenok-peenok wonok niyokan puut abu'me taati ari wambi wa'nuk, 16at Aliku ALA nen wone yokkiragagerak nogo awo aret kagak, mbo punuk, at Aliku kinogoba Ala maluk lombok eeppogo logonet, tu alik nomoninuk, Ala obaane'me mbuti emas paga tapi ogut ogobakkigikkologo nogogutik, mippunuk, alut eekwi kiyareegirak nogo o. 17Kiige nagagirik, yugum tabak mbere nogo kineraaket nen neenggi omaawi paga mbo wuppi wage mbareegi, yigirik-noonom nage nogo kinigen kogogutak o.

18Yigi'nage mbareegi, puut paga taati aret at Aliku ALA abu'me nenete wanduk ngginna'nuk, kit kinogogumbuk lombok logonet, at Aliku ALA enggaanom paga yi maluk ndi maluk eerit nogwe kiinok, at anini kinoba pinagukwak, an aa'nduk eereegirak nogo ndak-ndak aret, yi nengga'lek, mbi nengga'lek o kiip age, o weege, eeke kagak nogo 40 aret yereegirak o. 19 At Aliku ALA iniki aagi a'nuk anini kinoba pinaganuk, kineebe lek eerogo pinagarak ti, nagabiti nen eereegirak o. Ne ti paga kunduk, at Aliku ALA noone yoge neegak, konengge nagagerak. 20Ti'nuk, peebi aap Karun kunduk, at Aliku ALA nen togop aret anini oba pege nagagerik, eebe mondok warikit nduk eeke me, an nen ne ti eyom paga at ake tamban eereegirak o. 21Eeke nagagirik, maluk eeko logonet, tapi aagaluk ogut ogobakkigirogo pereegutak nogo waganogo kani paga worarogo wun negen yigirik-noonom eerogo pege nagagirik, niyo eneeri puut paga nen wambi wage me time mbo mambi nagagirak o.

22  Ti'nuk, kit o Tabera inom, Mata inom, Kiborot-Taawa inom, time nen kunduk, at Aliku ALA anini wunduwak nduk eereegutak nogo o.

23  Ti eeppunuk, at Aliku ALA nen kit yokkirage logonet, O Kareti-Mbareneya yime teppunuk, o kit unde eeppatinuk logomunggup nduk, an wokkiragagim time nanip o, yinuk, yokkiragagerak kwe, kiniki at oba panggombunuk abet mbakwi, oone yokkirage nogo kinaruk liirogon konenggwi, eeka'lek at Aliku kinogoba Ala oone yokkirage nogo taganogo pereegutak nogo o. 24Ndi, an kit ninom iyaalok lombok lambuneegurak eyom paga nen nok yogondak kuli kulinik-kalinik at Aliku ALA oone taganggak mban aret eekwi kiige minggirak o.

25At Aliku ALA nen kineebe abok aret lek eerogo pinagarak ari kenok, an puut paga Aliku ALA enggaanom nenete wanduk ngginna'nuk, o kiip age, o weege, eeke kagak nogo 40 yege logonet, tamban eereegirak. 26Tamban eeke logonet, Kaliku Kitok Menggendak nogoba ALA wae. Kat keenggi omaawi paga iya lombok eeke logonet, yate iniki kunik mengga kwak, kapuri Iterali unde logonok nduk, inagap ndarogo o Metit nen wogoren wundi wagagindak me, it ineebe lek eerogo piyoorak ti mondok mage o. 27Kat kayeloman mini Abarakam inom, Itak inom, Yakup inom, nogo inoba kiniki aberu o. Abeppunuk, it aakumi yi, inobaabut abu maluk lombok inanobak yugum pogom wonogwe inom, it iniki worokot logonet, maluk eekwi inom, kat nen liippiyoorak ti mage o.

28Liippiinok, kapuri yi, lek eerogo piyaamunggun keenok, it aakumi o kat wo'niren wundi wagaginom nogome nen yogo logonet, At Aliku ALA nen aakumi Iterali mendek o wogoroorak koonogo pereegim nogome wogoren piya noorak meek age, ndi, eebi inombake, eeke nagaarik, o karume time inenggaawak lek eerogo inoorogo piyaakit nduk, wogoren wundi nagaarak kogo o, yogo logokwak me, inoorogo piyaagun o, nogoba. 29It aakumi yi, keenggi omaawi lombok paga eeppiige, keenggi titik eeke kenok eeppiige, eeke logonet, wogoren wundi wagagindak keyate kwak kapuri kiniki kunik yi aret o, nogoba, yinuk, tamban mban eeke neegak, nogo 40 yereegirak nogo o,” yinuk, yoragagerak.

Pelaareegerak 8:1-20

 Obeelom eerogo piige kenok, “Wa,” yogo logorak, wone

1Yorage nagagerik, ambi yorage logonet, “At Aliku ALA nen, Nggween wokkiraagin o, yinuk, kumbuk mbanogo kinombomini yoragagim o nogome ari nogo logomonggotik, unde a'nuk, kineenik obeelom aret wonogwe, kineebe ambik wigannarit nogwe, eeko logobagip nduk, wone, Yogop ee'nu ndogop ee'nu, yereegerak nogo o yogondak an mamunggirage yi, liirogon aret eerit nogo logonu o. 2At Aliku kinogoba Ala nen tu karume wokkiren wage logonet, It aakumi yi, Yogop ee'nu ndogop ee'nu, an yorage nogo liirogon porogo wonogwe iyaamun ilik, lek a? yinuk, kinikime nano wonage nogo eenu arikit nduk, kinabut mbangge, kiniki tebenak logomunggup nduk eeppinagage, eeke kagak, tahun 40 aret eereegerak nogo kiniki abe'nip o.

3  It aakumi mbi mban nunggwi iinok, ineenik logogun lek o. Ata, at Aliku ALA nen yi wone ndi wone ari nogo waganggwi iinok, mondok ineenik aret logorak nogo liippugwi, kiniki tebeppatinuk wonogwe, eeko logobagip nduk, mbi abu eerogo pinagage, ti'nuk, kit inom, kinombomini inom, kineenggo'lek mendek mbi mana wokkirage, eereegerak nogo o. 4Kit tahun 40 paga wogwe kiigak, kineebe paga kinayum yirik ambi nibik yagak, kiniyok ambi piikkinakak, eerulik o. 5Aap nen inapuri wone lunirogo mengga kwak, at Aliku kinogoba Ala nen wone lunggiragagerak nogo liippinip o.

6Togop aret me, at Aliku kinogoba Ala kinagabiti mba'nuk, at eeriyak mbake nogo mugurok nogo logonet, wone, Yogop ee'nu ndogop ee'nu, yokkirage nogo, liippunuk, eerit nogo logomunggup o. 7Yi awi ndi awi abe lombok nenaarak ti paga niyo o kobappaga nen wungge, puut-puut paga nen wundi wage, eeke logonet, niyo yenggenogo pege, eneeri wungge, niyo nggwok wage, eeke menggim inom, 8pinagi namenggim time gandum wonage, waabuk negen jelai wonage, eyo anggur wonage, eyo wuli wonage, eyo delima wonage, eyo tayitun wonage, nggiin amburu wonage, apit aret wonage menggim inom, at Aliku kinogoba Ala nen wokkiren pinagi namenggerak 9wonogwe kiigak, mbi noogelo ambi kinoba age, kinamendek ambi lek age, eerigin lek o. O time yugum nogo ti, mbuti mendek mban kunik wonage, ndi, puut-puut time mbuti tembaga mban wonage me, nggween kabunogo wonet nogwe, eeko logomunggup o.

10Yi mendek ndi mendek ndonggorogon nonggo logomonggotik, kinaanoma'le ndeenggo logonet, At Aliku ninogoba Ala nen ninanggween abe wo'niragagerak me, Wa, yinuk, alut eeko logomunggup o,” yoragagerak.

ALA oba mari eerogo pugwi iyo, yoragagerak wone

11  Yorage nagagerik, ambi yorage logonet, “Ala nen, Yogop ee'nu ndogop ee'nu, yereegerak wone inom, eeko logorak wone yugu inom, wone lengganak inom, an yogondak yokkirage yi, ambi taganogo punuk, at Aliku kinogoba Ala oba mari eerogo mbo pugwi kiyo, liippogo logonu o. 12Kinambi ndonggorogon nonggo logomonggotik, kinaanoma'le ndeenggwi, kinawi obeelom lombok wurogo patinuk wonogwe, 13kinaanggumi lembu-tapi inom, kambin-ndomba inom, ambik yagabit age, kinamindik-kinamendek mbuti perak-emas ambik lombok age, eeke kenok, 14kit o Metit inayeloman eeppinaganuk wonogwe me, wokkiren wundi wagagerak at Aliku kinogoba Ala nogo oba mari eerogo mbo punuk, kiniki tiyappatinuk logokwak, kiniki liippogo logonu o.

15Kit kinogoba Ala nen karume iya paga waalo eyak ambik muuru inom, nggitamuru inom, ambik lombok wonage kagak wokkiren wage, nggween mbuk paga niyo ero lek aret kwe, kit nen ndonggorogon nabagip nduk, yugum enoona nen niyo eneeri warak eerogo wumbi wage, eerit tu nikkiren wage logonet, 16peebi obeelom mban logobagip nduk, kinabut mbangge, kiniki tebeppatiyak nduk eeppinagage, eerit karume wundi wage logonet, kinombomini ineenggo'lek mendek mbi mana nabagip nduk, wokkiragagerak nogo o.

17Kit kinikime nen mbako logonet, Nit ninobaalombok nineenggi omaawi paga nen eekkologoorak paga nineenggi warak agaarak o, yinuk, yuurak kiigirak kwe, 18kineenggi warak logomunggup nduk, at Aliku kinogoba Ala nen eerogo pinagage nogo paga kinombomini inom wone abuk nggaruk togon kumbuk mbanogo yoragagerak nogo aberak mban logonet, omaawi eerogo puwak nduk, yogondak yi paga eeppinagage ndak-ndak aret eeppinagagin me, at Aliku kinogoba Ala paga mban aberak logomunggup o.

19Togop aret me, at Aliku kinogoba Ala oba mari eerogo mbo pogo logomonggotik, at obaane'me kugi inalut eekwi, inayuk wukwi, eerit nogwe kiinok, kineebe abu lek aret arumunggup o, yinuk, yogondak yi paga an nen abet aret yokkiragi o. 20At Aliku kinogoba Ala oone yokkirage nogo koneniyak kineebi mbarumonggotak paga at Aliku ALA nen kit kinenggaanom paga aakumi inooreegerak togop nogo aret kineebe lek eerogo pinagagin o,” yinuk, yoragagerak.