Pelaareegerak 7:1-25

 Aakumi o Kanan mendek inenggela'me logonet eeko logorak wone

1  Yorage nagagerik, at Muta nen aakumi Iterali ambinom yorage logonet, “At Aliku kinogoba Ala nen o kit unggwi nogo logomonggotik, unde a'nuk logowam time wokkiren pinagi nage logonet, at aa'nduk a'nuk, it aakumi inanebunu ambik inomaawi nggwok aakumi Ket mendek, Nggiragati mendek, Amori mendek, Kanan mendek, Perit mendek, Kewi mendek, Yebut mendek, inanebunu 7 aret 2kineenggime pinagage kenok, kit nen tebenogo piinet nogo logonet, Ninom yogop aret eeko logowok o, yinuk, kinom wone koonogo pugwi, ambi abuwa nen teppugwi, eeriyak mondok mage o. Ata, ineebe abok aret inenggaawak lek eerogo piyaamunggup o.

3-4Kit nen it wogonakwi, it nen kit wokkinakwi, eeko logorak mage o. Kinapuri nen it komologwe inanebunu alik mendek wogonakwi iinok, it komologwe nen, Ninom ninagugi alut eeri nawok o, yorogwe iinok, Aliku ALA mbo punuk, inom eerit namenggaarak paga at Aliku ALA anini mi'nage logomenggerik, kit kineebe mbet-mbet aret lek eerogo pinagagin me, kit kinapuri komologwe it inapuri wologwe wogorogwe, ndi, it inapurilogwe komologwe kit kinapuri wologwe nogo nen wogonakwi, eeko logorak mondok mage o.

5  Togop aret me, it aakumi ti eeppiyoorak nogo yi aret. Inagugi aanggo warogo wogogo menggam ogobakkigirik minogo piigwi, inagugiwak yebibit nogo yigirik-noonom eerogo piigwi, inagugi eyo arelen yinik menggerak nogo kalenak-pugunik eerogo piigwi, inagugi ogut eerak nogo tigitogon kani kunggwi, eerumunggup o. 6 Aakumi inanebunu lombok o nggween paga yime menggaarak abok aret wonogwe iigak, at Aliku kinogoba Ala nen kinalik aret iniki kundugu logobagip nduk, miirogo pinagareegerak me, kit at Aliku kinogoba Ala apuri ake leenak aret ogotik o.

7At Aliku ALA nen kinabuwa mba'nuk miikkinabeegerak nogo ti, yi aakumi ndi aakumi inanebunu nggwok mendek inenggela'me nen kit abu nggwok me nduk, miikkinabulik o. Ata, it inenggela'me nen kit kinanebunu abu mbuuluk lombok kiigak kwe, miikkinabeegerak. 8Togop aret kwe, at Aliku ALA nen kinabuwa mbake nagagerik, kinombomini wone abuk nggaruk togon kumbuk mbanogo yoragagerak nogo abeppunuk, aap o Metit mendek endagembogut Pirawun abu'me tebembinagago wonage me, at Aliku ALA eenggi omaawi paga Pirawun eenggime nen kinagap ndarogo wokkiren wundi wagagerak. 9 Togop aret me, at Aliku kinogoba Ala ti, at alik Ala aret kineenu a'nip o. Ndi, Ala yegetak mbeyok ariilik liirogon aret eeke menggerak me, it aakumi iniki at inom kunik lombok logonet, Yogop ee'nu ndogop ee'nu, yorage nogo nggirik-nggerok porogo logonet, eerit nogwe nogo inabuwa mba'nuk, wone abuk nggaruk togon inom koonogo pereegerak nogo kobak arigin lek aberak mban wonage kagak, yi aakumi ndi aakumi inombowologwe ndaganabit wundi namengga-namengga o ambi me aret ari nage logogin o. 10Togop aret eerigin kwe,

It aakumi at ineebi mbako menggaarak nogo perak,

Inayuk wurogo teppiiga'lek

Eeremenggaarak onggo ineebe mondok lek eerogo piige,

Ndi, it aakumi at ineebi mbako menggaarak nogo

Ineebe paga agabiti nen puk aga'lek

Eeremenggaarak onggo mbet-mbet aret inooke,

Eerigin o.

11Togop me, Yogop ee'nu ndogop ee'nu, wone inom, wone lengganak inom, eeko logorak wone yugu inom, an yogondak yokkirage yi, liirogon porogo logonet, eerit nogo logomunggup o,” yinuk, yoragagerak.

Wone liippunuk eekwi iinok, obeelom eeppiyoorak wone

12  Yorage nagagerik, ambinom yorage logonet, “Kit nen eeko logorak wone yugu yi, kiniki liippunuk mondok liirogon aret eerit nogo logomunggup kenok, at Aliku kinogoba Ala nen wone kumbuk mbanogo kinombomini yoragagerak nogo ndak-ndak kit kinabuwa mba'nuk, Yogop aret eeppinagagin o, yinuk, wone abuk nggaruk togon yokkiragagerak nogo aret eeppinagage logogin o.

13O kit logowam Ala nen, Wokkiraagin o, yinuk, kumbuk mbanogo kinombomini yoragagim ari namonggotak wonogwe me, Aliku ALA kinabuwa mbake, ale'nggen kinoba pinagage, kinanebunu nggwok eerogo pinagage, eeke logonet, kumi elege ndaganako menggam obeelom eerogo piige, gandum inom, eyo anggur inom, eyo tayitun inom, yi mendek ndi mendek yarumonggotak abok aret anggen ka'let-pa'let eerogo pinagage, ndi, kinaanggumi lembu-tapi inom, kambin-ndomba inom, inaagalogwe ambik agago pege, eeke logogin o. 14Kit kinogoba Ala nen obeelom eeppinagage ti kwak, it yi aakumi ndi aakumi inanebunu lombok nggween paga menggaarak yi, togop ambi eeppiyaagin lek kwe, kit perak, kumi-aap inom, kinaanggumi inom, ambi wubili arugun mondok lek o.

15Ndi, at Aliku ALA nen kit andi-pandi abok aret kinoba age kero, lek eerogo pege logogin o. Andi abu maluk at ambi oba agak eeke menggerak o Metit paga eeppiige kinigen kogogutak nogo mendek ambi kit kinoba pinagagin lek kwe, it aakumi ineebi kinombako menggaarak nogo perak, inoba piige logogin o. 

16It aakumi inanebunu lombok kit nen inoorumunggup nduk, at Aliku kinogoba Ala nen kit kineenggime pinagage kenok, kineebe aa'ndok mbanggolookwak, ambi abuwa yinuk teppiigak, it inagugiwak mendek alut eekak, eeko logorak mondok mage o. Ata, ineebe tigitogon aret inoorogo piyaamunggup o.

17Kit kiniki nen mbako logonet, Yi aakumi ndi aakumi ti, nit ninom ndak-ndak lek ineebe nggwok ambik aret me, nonggop agago mugogo wumbiyoorak? mbakwi kwe, 18it ineebe paga kit kinagabiti mbarugup o. At Aliku kinogoba Ala nen aap o Metit mendek inowe endagembogut Pirawun nogo inom, it aakumi o Metit mendek inom, eeppiyareegerak nogo abeko logonip o.

19At Aliku kinogoba Ala nen wokkiren wundi wage logonet, aakumi Metit mendek ti, anggon-panggon iya tit eeppiige, ineenu agak inagabiti aruwak nduk agago piige, tam warak mendek eeppiige, eenggi omaawi paga eeppiige, eenggi titik eeke kenok eeppiige, eeke kit kinigen abe nen kogogutak nogo o. Ti eereegerak pogom, at Aliku kinogoba Ala nen it aakumi inanebunu lombok kit kinagabiti mbakwi nogo abok aret ndak-ndak eerogo piyaagin o.

20Eeppiige kenok, at Aliku kinogoba Ala nen nggiin kundi ineyak andiigwi kombogonak inenggela'me nappiya woramenggerak nogo nen ineyak mbaninabit nogo logonet, it aakumi kit kiinok kole mbaganit kiraa'naremenggaarak nogo inom abok aret pup eerogo piinet nagun o. 21At Aliku kinogoba Ala omaawi ambik ayuk warak iya lombok menggerak nogo, kinenggela'me wonage me, it aakumi ti, ineebe paga kinaganak ndik-ndik eeriyak mage o. 22O time yi mendek ndi mendek inigen mbolok kwi eyonggaame mendek nen yagabit ari unggwi worookwak, at Aliku kinogoba Ala nen it aakumi ti, kit unde eekkolaawam time wonogwe kiigak, ambit nggigik eerogo wumbiige logogin me, kit nen ne ambit paga lek eerogo piyoorak mage o. 23Ata, at Aliku kinogoba Ala nen aakumi ti, kineenggime wokkiramenggerak ugun naga'nuk kobak aago nugu logonet, ineebe lek eekko'net nogo logogun o.

24Ndi, at Aliku ALA nen it inoweewi inendagembogut nogo abok aret wogoren kit kineenggime pinagi wage kenok, it yi awi ndi awi abok aret inendage toonak nogo o nggween paga yime ki logokwak mari eerogo abok aret pup eerogo inoorumunggup o. It ambi nen kit tebenogo pinagarak mondok meek aret o.

25  Ndi, it inagugi alut eeko menggaarak ogut ogobakkigirik nogo abok aret kani kunumunggup o. At Aliku kinogoba Ala nen kugiwak abu eebi mbake menggerak me, inagugi ogut ogobakkigirik paga mbuti perak-emas paga nabenak wonage nogo, kiniki uugwe mba'nuk waganggwi kiinok, ta'na pugu kwak kinenggaanok nggerenggolookwak, ambi woorak abu mage o. 26Kugiwak ogobakkigirik kani kuniyak ti mendek wonok kiname pi unggwogwe kiinok, kit ndak-ndak lek eerogo pinagukwak, ogole warak ti mendek ambi kiname pi ungguurak mage o. Ata, ti mendek ti, kani kuniyak ake aret me, Yi abu ogole warak me, nineebi o, yinuk, mbako logomunggup o,” yoragagerak.

Pelaareegerak 6:1-25

Wone lengganak aa'nduk eeko logorak yoragagerak wone

1-2Yorage nagagerik, Muta nen ambinom yorage logonet, “Kit o yime logonuk lek niyo Yoraran wunda nogo logomonggotik, o kit unde a'nuk logowam time wonogo logonet, kit inom, kinapuri inom, kinombowologwe ndaganabumonggotak inom, li a'nuk kanggwi, ndi, kangga'lek kineenik wonogwe paga at Aliku kinogoba Ala ayuk wuko logonet, Yogop ee'nu ndogop ee'nu, wone yugu inom, wone lengganak inom, eeko logorak wone yugu inom, an yokkiragi yi, liirogon aret eekwi, eeko logomunggup nduk, at Aliku kinogoba Ala nen, Liirogon mamuniret o, yo'negerak kenok, yokkirage agarik o.

3Togop aret me, kit nowe-nawot Iterali mendek yi wae! Kinaruk liirogon konenggo logonip o. At Aliku kinombomini inogoba Ala nen wone abuk nggaruk togon yokkiragagerak nogo ndak-ndak, kit o nggween anggiinu mili me, yilak amburu inom, nggiin amburu inom, niyo eneeri negen kila-kila wungge menggim wonage me time ari nanuk, yi wone ndi wone ambi kinoba aga'lek kineebe obeelom logonet, kinanebunu nggwok togon wigannarit nogo logobagip nduk, wone lengganak ti, liirogon eerit nogo logonu o.

4  Kit nowe-nawot aakumi Iterali mendek yi wae! Kinaruk liirogon konenggo logonip o. At Aliku ti, ambit aret o. Ndi, at Aliku nogo ti, ninogoba Ala aret. 5 Togop aret me, kiniki inom, kineebe inom, kinomaawi inom, abok aret at Aliku kinogoba Ala mban kiniki kunik eeko logonip o. 6 Ne yogondak an nen, Yogop ee'nu ndogop ee'nu, wone mamunggirage yi, abok aret liippunuk, waganggo logonip o. 7Waganggo logomonggotik, oome kwi'ndak logonet, endekem tu nogo logonet, yonggonggologo logonet, yabu eeko logonet, wone yi mban mbininggwi, kulinik-kalinik kinapuri mamuninakwi, eeko logomunggup o. 8Mamuninako logonet, aberak mban logowak nduk, ineenu agak keele negen ineenggi paga pugunogo pugwi, inenggaawak paga pugunogo pugwi, 9kinawi tungga eyo yinik ambe paga liiru mbanogo pugwi, kinaru unggwi wogo logowam abok aret liiru mbanogo pugwi, eerogo punu o,” yinuk, yoragagerak.

Wone yugu taganogo punuk, alik eerit nogwe iyo, aberiragagerak wone

10  Yorage nagagerik, ambi yorage logonet, “At Aliku kinogoba Ala nen kinombomini Abarakam inom, Itak inom, Yakup inom, O nggween wokkiraagin o, yinuk, wone abuk nggaruk togon yoragagim nogome o kota-kota nggwok ambik lombok wurik wonage me, kit nen ambi wukwi, 11kinawi logowam time yi mendek ndi mendek obeelom mendek apit yagabit aago wonage me, kit nen ambi pati unggwoge, niyo nenggak yuurak nggween abu kabunik wonage me, kit nen ambi kabunggologwe, ndi, eyo anggur inom, eyo tayitun inom, abu yarak wonage me, kit nen ambi yakwi, eerumunggup lek abu aago wonage me nogome wokkiren pinagi namenggerak wonogo logonet, yi mendek ndi mendek nonggo logomonggotik, ndonggoppinagage kenok, 12kit o Metit paga inayeloman eeppinagago wonogwe me at Aliku ALA nen wokkiren wundi wagagerak nogo oba mari eerogo pukwak liippogo logomunggup o.

13  Kit nen at Aliku kinogoba Ala mban ayuk wuko logonet, at mban alut eekwi, at mban endage paga kumbuk mbanggwi, eeko logomunggup o. 

14-15At Aliku kinogoba Ala kinenggela'me wonage nogo, at alik aret kagak obaane'me ambi mippunuk, ayuk wukwi kiinok, eebi mbake logonet, anini kinoba pinagage, o nggween paga yime nen kineebe mondok lek eerogo pinagage, eerukwak, it aakumi inanebunu alik mendek kinom logowam time Ala mugurok nogwe obaane'me it inagugi eeko menggaarak nogo, kit kinom eeko logorak mondok mage o. 16 Kit o Mata nen at Aliku kinogoba Ala abut mbaneegutak nogo kokwak, yogondak at abut mbanuwok nduk, togop ambi eeriyak mondok mage o. 

17Ndi, at Aliku kinogoba Ala nen, Yogop ee'nu ndogop ee'nu, wone yugu inom, eeko logorak wone inom, wone lengganak inom, yokkiragagerak nogo mban nggirik-nggerok porogo logonet, eerit nogo logonu.

18At Aliku ALA nen kinombomini yorage logonet, Kinanggween wokkiraagin o, yinuk, kumbuk mbanogo yoragagim nogome unggwi nogo logomonggotik, unde eeppatinuk logonet, yi wone ndi wone ambi kinoba aga'lek kineebe obeelom mban logomunggup nduk, at Aliku ALA enegen kagak nano mendek ambi eeko logonet abet mban eekwi, abu obeelom eekwi, eeko logomunggup o. 

19At Aliku ALA nen, An togop eerigin o, yinuk, yereegerak nogo ndak-ndak eerit nage kagak, kit kinom wim mbanak monggotak nogo mugogo wumbiyaamunggup o.

20Ndi, o peebi ndime kinapuri ndarak nen kin wokkiigo logonet, Nonggop nduk at Aliku ninogoba Ala nen, Yogop ee'nu ndogop ee'nu, wone yugu inom, wone lengganak inom, eeko logorak wone yugu inom, liirogon mugurok nogo logonu o, yinuk, yokkiragagerak mbakop? Yokkirogwe iinok, 21kit nen kinapuri yorogo logonet, O maan togon aap Pirawun nen o Metit paga ayeloman eerogo tebembinaninuk wonage me, at Aliku ALA omaawi ambik nogo paga wo'niren wundi wage logonet, 22nit ninigen niigak, eerubok inagabiti warak mendek nggwok lombok inaganak wariyak mendek aakumi Metit mendek inom, Pirawun inom, inom menggaarak abok aret inom, inoba eeppiyareegerak kenok, mugurok nogo monggoorak o. 23Ndi, ninombomini nggween, Wokkiraagin o, yinuk, abuk nggaruk togon kumbuk mbanogo yoragagim yime pinani woroorak nduk, o Metit nen wo'niren wundi wagagerak me, 24nit yogondak op wonogwe yi kokwak, nineenik logonet, niniki ugun tayenak obeelom logowok nduk, at Aliku ALA nen ari logonet, Naliku kinogoba Ala an nayuk wukwi, wone lengganogo yokkiragagirak nogo abok aret eekwi, eeko logonip o, yinuk, yo'niragagerak o. 25Ndi, at nen yo'niragagerak ndak-ndak at Aliku ninogoba Ala enggaanom paga eeko logorak wone yo'niragagerak yi abok aret, mondok liippunuk, eekwi niinok, nit aap obeelom aret ninombake logogin o, yinuk, yorogo logomunggup o,” yoragagerak.