ALA UNDE 10

  

Narap Abiku imbirak inooreegerak wone

1At Aliku ALA nen yoraga'lek kagak, ne ambi paga aap Karun apuri Narap Abiku imbirak nen Ala aga'ni nogo paga lek iniki mba'nuk nen inalitak lombok inaga'ninggen ndoongga nogo waganogo kani kunik ndoonggwi, kani kunggwi iinok, obari abe kaga nogo mendek obaga pugwi, ee'nuk, wonok Aliku ALA enggaanom paga ake kani kuni unggwogo mbareegwa, 2Aliku ALA nen kani kunik inoba wuppi wagagerak paga mondok yoguk togon eerogo piige mbareegi, Ala enggaanom awooliya wurik tungga paga taati aret kambeegwaarak. 3Kanggo mbareegwa, at Muta nen Karun yoge, “At Aliku ALA nen ari logonet,

It aakumi abok an ninom kunik logokit nduk,

Nowagam wogo logonet kenok,

An mondok kikak nakeelik nalik leenak lombok minggirak inigen neegwi,

Ndi, it aakumi Iterali mendek abok aret

An mondok tiyanak neego logonet, nayuk wukwi,

Eeruwak nduk,

Eeppiyaagin o,

yinuk, yereegerak nogo ti, yogobi eerukwak nduk, yereegerak o.” Ari mbareegi, aap Karun nogo oone ambi yaga'lek puk aret agagerak.

4Puk age mbareegi, at Muta nen Karun ogobaluk Utiyen apuri wologwe Mitayen Elatapan imbirak wiiragagerak wogo mbareegwa, yorage logonet, “Kit kinoreewi kanggaarak Ala awooliya wurik mage menggim tu unggwogo menggam wonogwe yi, wogoren yagat endekem nggwe time piya nanip o.” 5Yorage mbareegi, at Muta nen yoragagerak nogo ndak-ndak aret aap mbere kanggaarak nogo inayum akem agi yirika nggorek nogo mban yirik iigak, wogoren yagat endekem time piya nogogwaarak.

6Piya nogo mbareegwa, at Muta nen Karun inom, apuri Eleyatat Itamat imbirak inom, yorage logonet, “Kit togop aret kanggwi, ndi, Ala apuri kuwak aago Iterali nogo Aliku ALA nen anini inoba piige, eerukwak, aap kanggaarak ti paga kiniki wakkologo logonet, kinabetagi nibinogo pakwi, kineeruwak piinogo teppugwi, eeriyak mage o. Ata, kit kinoreewi aakumi Iterali ti perak, Aliku ALA nen kani paga inookerak ti paga inaleenggu maako logorak op aret o. 7Kit perak, Aliku ALA ake leenak logowak nduk amburu kilirogo piigo mengga kwak amburu kinoba kilippinagagirak wonogwe me, kit kinoorukwak, Ala ninom lambungge menggim awooliya wurik tungga'nggi paga yime mban aret logonip o,” yorage mbareegi, it nogo Muta yoragagerak nogo ndak-ndak aret eereegwaarak.

Aap Ala unde nen amburu kumili aganaka mendek noorak mage wone

8Ti'nuk, at Aliku ALA nen aap Karun nogo yoge logonet, 9“Kat kapurilogwe kinom kinoorukwak, niyo anggur amburu ilik, amburu kumili aganake menggerak nogo mendek a, neenok, an ninom lambungge minggim nawooliya wurik me time unggwi noorak mondok mage o. Wone lengganogo yokkirage yi nogo ti, kapuri-kombowologwe nda'narit nogo logogun kinom mondok eeko logorak wone ti aret. 10Kit nen eraambe liippogo logonet, Ambi yi Ala ake eekak yuurak leenak kagi. Ambi yi we ugun eekak yuurak ake kagi. Ambi eeriyak mage aret kagi. Ndi, ambi eeriyak op aret kagi, mba'nuk, liippogo logonip o. 11It aakumi Iterali ineenu aruwak nduk, Naliku ALA wone lengganogo Muta yoreegirak nogo abok aret kapuri kinom nen aakumi Iterali mendek mamunirogo logomunggup o,” yinuk, yoreegerak.

Ala ake pugu ando aap Ala unde wogorogo logorak wone

12  Yoge mbareegi, at Muta nen aap Karun inom, at apuri Ala nen ineenik teppiyareegerak Eleyatat Itamat imbirak inom, yorage logonet, “Yi mendek ndi mendek Aliku ALA ake pugu kani kunggo logonet, gandum anggen yigirik inom Ala ake pugwi nogo, ando ndiinnage kenok, abu leenak mage lombok me, piiruwak nduk ragi inom pega'lek kagak, worarogo punuk, ake kani kunggo menggam eraaninu taati nen nonggo logomunggup o. 13Yi mendek ndi mendek at Aliku ALA ake pugu kani kunggo logonet, ando ndiinnage kenok ti, Aap an neebe unde wogorage logowak o, yinuk, Ala nen yo'nireegerak nogo ndak-ndak kat kapuri kinom kinamendek aret me, waganogo o alik leenak lombok menggim time nen mban nonggo logomunggup o.

14  Ti aret kwe, aakumi Iterali nen Ala inom lambunik logowak nduk ake warogo wogogwi ape uruwak inom, aawi kinik inom, Yi Kaliku ALA kake o, yinuk, titik eerogo punuk, pugwi nogo ti, kat kapuri wologwe-komologwe kinom nonggo logomunggup nduk, koonogo pugu aret me, o ti nenggak yuurak nduk, leenogo pugume nogome nen mban nonggo logomunggup o. 15Amok leenak kani kuniyak wonok wogo logonet, aawi kinik Ala ake puurak nogo inom, ape uruwak Ala kaawak nduk, titik iriyak nogo inom, lambumbunuk wonok wogo logomenggaarik, amok kani kumbunuk, aawi kinik inom, ape uruwak inom, Yi Kaliku ALA kake o, yinuk, titik nugu logomenggaarik, Aap an neebe unde wogorogo logowak o, yinuk, Aliku ALA nen yereegerak nogo ndak-ndak aawi inom, ape uruwak inom, Ala titik ogo logomonggotik, nonggo logomunggup o.”

16Yorage nagagerik, at Muta nen inomaluk lek eerogo piyoorak nduk, warogo Ala ake wogoriyak kambin ngguunok nogo kwaareegerak mendek, kambin nogo muk kani kuneegwaarak mbareegi, Karun apuri Eleyatat Itamat imbirak inoorulik teppiyareegerak nogo mberirage logonet, 17 “Ake pugu ti, it aakumi Iterali mendek inomaluk lek eerogo piinok, Aliku ALA inom lambunik logowak nduk, nggami aanggo wakwi kwak warogo at ake pugu abu mage lombok me, yinuk, wokkiragaarak kagak, nanonduk kit nen inomaluk lek eeppiyoorak kambin ti, Ala awooliya wurik oonggu'me yime nen noolik, kani kumbogotak? 

18Kambin amiya ti, Ala awooliya wurik mage menggim yime wonok ungguulik me, an yokkiragarak ndak-ndak kit nen Ala awooliya wurik mage menggim yime nen noorak me eekotak o.”   19Yoge mbareegi, Karun nen Muta yoge, “Ne yi paga aakumi Iterali inomaluk lek eerogo puwak nduk Aliku ALA ake warogo wogogwi, ake warogo kani kunggwi, eekaarak nogo ti op eekaarak kagak kwe, eeriyak kagak, an alik eekirak yi, koongga'lek neegak, ake pugu yi nanetak nen, Aliku ALA inikilom nomba'netak mbaken?” 20Yoge mbareegi, Muta nen wone ti konengge nagagerik, “Op aret yigi,” mba'nuk, puk agagerak.

ALA UNDE 9

  

It aap Ala unde nen ineyabu eeko logorak wareneegwaarak wone

1Karun apuri inom mippiigwi iigak, nogo 7 yippunuk, ko'lu ti paga Muta nen Karun apuri inom, aakumi Iterali inoweewi inom, wiiragagerak wogo mbareegwa, 2Muta nen Karun yoge logonet, “Kat kalik komaluk lek eerogo pagawak nduk, kaanggumi inawinde-inobaande eerak lek amuni mbanak kero tapi ngguunok awooluk ambi wagangge, ndomba ngguunok warogo kani kuniyak ake ambi wagangge, eeke logomenggendik, at Aliku ALA enggaanom paga ake pi mok o. 3-4Pi wage logomenggendik, it aakumi Iterali mendek yoroorak nogo yi aret.

O yogondak at Aliku ALA nigiya wambi woraagin me, inomaluk lek eerogo piyaawak nduk, Aliku ALA ake warogo puurak kambin ngguunok ambi waganggwi, Aliku ALA ake warogo kani kuniyak tapi aagaluk ambi inom, ndomba ambi inom, tahun ambit eerak inawinde-inobaande eerak lek amuni mbanak kero waganggwi, ndi, Ala inom lambunik logowak nduk, ake warogo puurak tapi ambi inom, ndomba ngguunok ambi inom, waganggwi, ee'nuk, Ala enggaanom paga ake warogo wogogo logonet, gandum anggen yigirik amburu paga amok mbanogo worarak nogo inom aret ake pi woraawak o,” yinuk, yoreegerak.

5Yoreegerak nogo yorage mbareegi, it aakumi Iterali nogo Muta nen, “Yogop eeruwak o,” yoragagerak nogo ndak-ndak aret wonok Ala inom lambungge menggim awooliya wurik me taa'nogo pi wogo nogogwaarik, Ala apuri wonogwe nogo abok aret Aliku ALA enggaanom paga taati mi'ndak wonogwe iigak, 6Muta nen yorage logonet, “Yi eekwi yi, Aliku ALA nen, An mondok tiyanak lombok minggirak inigen neyaawak nduk, aakumi Iterali, Yogop eeruwak o, yegerak kenok, eeko ogoorik o.”

7  Yorage nagagerik, Karun yoge logonet, “Komaluk mbo puwak nduk, wariyak wonok wagandak inom, Aliku ALA ake warogo kani kuniyak nduk wonok wagandak inom, Ala nen yegerak nogo ndak-ndak kat inom, kapuri inom, kinomaluk lek eerogo punuk, Ala kinom lambunik logomunggup nduk, aa'nduk nggami aanggo wakwi kwak warogo Ala wogoge, ndi, ti'nuk, it aakumi inomaluk mbo puwak nduk, wariyak wonok wagaarak nogo inomaluk lek eerogo punuk, Ala inom lambunik logowak nduk, nggami aanggo wakwi kwak warogo Ala wogoge, eerenok nduk, Ala ake warogo kani kunggo menggam time nak o.”

8Yoge mbareegi, Karun nogo kani kunggo menggam time nage nagagerik, at alik omaluk lek eerogo puwak nduk, tapi aagaluk nogo warogo pege mbareegi, 9at apuri nen tapi amiya nogo Karun wogogo mbareegwa, amiya nogo eenggi paga waganogo kani kunggo menggam owak mippugu irip-irip to ari wonage nogo paga labunogo punuk, amiya apit nogo kani kunggo menggam abu'me kilirogo pereegerak. 10Pege nagagerik, at Aliku ALA nen Muta yoreegerak nogo ndak-ndak aret omaluk lek eerogo puwak nduk, tapi warak amok inom, apenggen inom, ogogun paga nabenak ape inom, waganogo kani kunggo menggam kani kungge nagagerik, 11eebe mbanak inom, agabolo inom, ooliya owa'nagat wurik endekem nggwe time kani kuni wundeegerak.

12Ti eeke nagagerik, Ala ake warogo kani kuniyak wonok wogogwaarak nogo, Karun nen wake mbareegi, at apuri nen amiya nogo at Karun wogogo mbareegwa, Karun nen amiya nogo kani kunggo menggam irip aru-ogwe, ambe agi-ogu, eyo nabenak paga abok aret werenogo pit nagagerak. 13Pit nage mbareegi, at apuri nen ake warak kani kuniyak eebe inom, anobak inom, ndegen-ndegen eerogo wogogo mbareegwa, kani kunggo menggam nogome kani kuneegerak. 14Kuneegerak kani awo nengge me, aanagale inom, aawi-obaak kinik inom, niyo paga koorogo punuk, inom aret kani kumbereegerak.

15Kani kumbege nagagerik, aakumi Iterali inake wariyak kambin wonok wogogwaarak nogo Karun iri wogo mbareegwa, wagangge nagagerik, kambin aa'nduk eereegerak togop ndak-ndak aret aakumi Iterali inomaluk lek eerogo puwak nduk warogo Ala ake pereegerak.

16Pege nagagerik, warogo kani kuniyak ake wonok wogogwaarak nogo, warogo punuk eeriyak wone yugu nogo ndak-ndak aret eerogo punuk, 17gandum anggen yigirik ake pugwi nogo eenggime kabulogo wagangge nagagerik, kuubondendok kani kunggo menggam kambin pereegwam taa'nogo inom aret pege mbareegi, kani nenggegerak.

18  Kani nengge mbareegi, it aakumi Ala inom lambunik logowak nduk ake warogo wogoriyak tapi inom, ndomba inom, at Karun nen warogo pege mbareegi, at apuri nen amiya nogo at Karun wogogo mbareegwa, Karun nen amiya nogo kani kunggo menggam irip aru-ogwe, ambe agi-ogu, eyo nabenak paga abok aret werenogo pereegerak kwe, 19tapi-ndomba ngguunok ageewak amok inom, aan paga mendek amok inom, apenggen imbirak inom, ogogun paga nabenak ape inom, amok abok aret nogo perak, 20waganogo tapi-ndomba ape uruwak nogo paga lumbege nagagerik, amok mban waganogo kani kunggo menggam kani kumbereegerak kwe, 21ape uruwak inom, aawi abe'nggan kinik inom, Muta yoreegerak nogo ndak-ndak aap Karun wagangge nagagerik, “Yi Kaliku ALA kake o,” yinuk, titik eerogo Aliku ALA wogoreegerak.

22  Wogoge nagagerik, aakumi inomaluk mbo puwak nduk, Ala ake warogo wogogwi, Ala ake warogo kani kunggwi, Ala inom lambunik logowak nduk, ake warogo wogogwi, eekwi nogo abok aret eeke nagagerik, eenggi imbirak aakumi Iterali inanobak paga tebenogo piinok, ale'nggen inoba piige nagagerik, puk agagerak.

23Puk age mbareegi, Ala inom lambungge menggim awooliya wurik me nogome Muta Karun imbirak unggwi nogo nogogwaarik, wundi woraanuk, aakumi Iterali nogo inale'nggen inoba piigo mbareegwa, at Aliku ALA nen abu tiyanak lombok eya kwindagala eerak wage 24enggela'me nen kani omoonuk wunuk agan wundi wage logonet, ake warak kani nawak nduk kani kunggo menggam pugu nogo inom, amok leenak pugu nogo inom, abok aret ne ambit wunuk togon nengge it aakumi nogo inigen kogo nogogwaarik, inale'nggen nen keekok yogo nogogwaarik, inendobanggun yindumbunuk, alut eereegwaarak.