Eerubok mendek ambi wurin nappi wagagerak wone
1Ti'nuk, at Aliku ALA nen Muta yoge, “An aakumi Metit mendek inenggela'me ineenu agak eerubok mendek eerikit nduk, at Pirawun inom, at awuri inom wone koongga inom, iniki omaawi agago piigirak nogo ti, 2it aakumi Metit mendek nen, Nit ninomaawi meek aret kagi, mbaruwak nduk, at Ala nen ineenu agak eerubok mendek yogop eeppiige nagagerak o, yinuk, kapuri-kombowologwe mbininogo yorage, ndi, Naliku an ALA kineenu ogwe, eeko logomunggup nduk, eeke me, Pirawun yori nak o,” yinuk, nappereegerak.
3Nappege mbareegi, Muta Karun imbirak Pirawun owagam nogo nogogwaarik, at yogo logonet, “Aakumi Iberani inogoba Aliku Ala nen ari logonet, At Pirawun wogoppake logonet, eewa yaga'lek ti, ne mande logonuk, an nabu'me iniki tebeppatinuk logogin o? An napuri aakumi Iterali mendek ti, nalut eeri nawak nduk teppiyaawak o. 4Ndi, teppiyoorak eebi mbake kenok, an nen ko'lu aret wurin iname nappi woraagin o. 5Nappi woraminggirak paga o nggween yi etenggen kuuri'lek eeppunuk wonogwe me, aakumi nen nggween ambi inigen kaagun mondok lek o. Mayu kumulinggen aa'nduk wambi wage logonet, eyo-kale inom, yi mendek ndi mendek yabume yarak inom, yigirogo pega'lek eegu mbuuluk teppereegerak nogo, wurin ti'nen mondok pup eerogo nenet nogo logogun o. 6Ndi, ombomini-ogobamini o nggween paga yime maan nda'nogogwaarak kuli nen nok yogondak wonogwe kuli yi paga, yogop ambi eeke kogo logolik mendek yogondak mban aret wurin ninggilu-punggulu eeke logonet, at ame inom, awuri inom wone koongga nogo iname inom, aakumi Metit we ugun mendek iname inom, apit aret wurin mban enete kuuri'lek ari unggwi woraagun, yegerak o,” yo'nuk, Pirawun mbo punuk iniyokan wundi wogogwaarak.
7Wundi wogwe iigak, aap Pirawun awuri inom wone koongga nogo nen Pirawun yogwi, “Pagi wariyak keele pugu mengga kwak, ne mande paga aap yi nen keele yilunogo pinaninuk logogin o. O Metit yime abu maluk agaarak wonage yi, kenegen kaga'lek agandik ya? At Aliku inogoba Ala nogo alut eeri nawak nduk teppiyet o.”
8Yogo nogogwaarik, Muta Karun imbirak iniyokan woraawak nduk, wiirogogwaarak nogo mbareegwa, at Pirawun nen it yorage, “At Aliku kinogoba Ala alut eeri noorak op aret me, it taamini mban nagun o?”
9Yorage mbareegi, at Muta nen, “Nit aap tawe kumi tawe inom, kumi-aap inanggok inom, ninapurilogwe wologwe-komologwe inom, ndi, Aliku ALA alut eeko logonet, laago nggwok lariyak me, ninaanggumi kambin-ndomba inom, tapi inom, apit aret wogoren wundi nagun o.”
10Yoge mbareegi, at Pirawun nen, “Togop kenok, Aliku ALA kinom namunggup o.” Ari nagagerik, ti'nuk, iniki yungguppunuk yorage logonet, “Kinakuwi-kinapurilogwe apit aret kinom noorak, yokkirage neenok ti, kiniki alik eeriyak koonit nookwak me, 11noorak abu lek o. Ata, Nit Aliku ALA alut eeri nawi o, yinuk, yo'nogo nogotak nogo ti, aap mban aret eeri nawak o,” yinuk, yorage nagagerik, Muta Karun imbirak, pelenogo wumbiya wagagerak.
12Pelenogo wumbiya wagagerak wogo mbareegwa, Aliku ALA nen Muta yoge, “O mayu kumulinggen wambeegerak paga yi mendek ndi mendek yabume yarak yigirogo pega'lek ando teppereegerak ki wonage nogo ti, wurin nen ninggilu-punggulu agan nggween enete kuuri'lek ari wogo logonet, lelenogo nenet nawak nduk, keenggi o Metit paga titik eerogo nippu o.”
13Yoge mbareegi, at Muta nen waanggun paga o Metit time titik eerogo nippege mbareegi, at Aliku ALA nen o wiya oonegen lagi wage menggim pa'nggwe nen nappi wagagerak me, o liingge paga inom, oonikiya paga inom, oonebu ari tit kagak, o weege mbareegi, wurin apit aret wogoren piya wagagerak. 14 Wurin nogo o Metit ilin-unggut apit aret yagabit aago ninggirik wonogogwaarak. Wurin ti eereegerak ndak-ndak maan nen togop ambi eerulik me peebi togon togop ambi eerigin lek o. Ata, ne ambit ti mban aret eereegerak. 15O Metit paga wurin nogo nggween etenggen kuuri'lek o apit aago kwak logonet, yi mendek ndi mendek yabume yarak wonage nogo inom, eyo-kale anggen yugu inom, mayu kumulinggen wangge logonet, eegu teppereegerak nogo wurin nen ineyak liinik-leenok agago nenet nogo nogogwaarak me, o Metit time eyo-kale yi mendek ndi mendek engga mili ambi teppuulik apit aret lelenogo nenet nogo nogogwaarak.
16Nenet nogwe iinok, Pirawun nen Karun Muta imbirak mbet-mbet woraawak nduk, wiiragagerak nogo mbareegwa, it yorage logonet, “At Aliku kinogoba Ala inom, kit inom, maluk lombok eeppinagagirak me, 17yogondak maluk eekirak yi kunduk lek eerogo paninuk, aaninggin nen aakumi kanggwi yi, lek aruwak nduk, at Aliku kinogoba Ala yo'nip o.”
18Yorage mbareegi, at Muta nen Pirawun teppunuk, Aliku ALA yori wage mbareegi, 19Aliku ALA nen o wiya oonegen kilu yi nage menggim pa'nggwe nen nappi wagagerak mondok omaawi nabuninuk warit wage logonet, wurin nogo apit aret kabereren niyo nggwok yenggenak Laut Merah inikime wuppiya nagagerak. Wuppiya nagagerak me, wurin nogo o Metit paga ambiriluk ambi logolik mondok lek aret ogogwaarak. 20Mondok lek ogogwaarak kwe, at Aliku ALA nen Pirawun iniki omaawi eerogo pege mbareegi, it aakumi Iterali nogo nawak nduk, teppiyoolik mondok ogogumbuk aret puk agagerak.
Eerubok mendek ambi o Metit paga o apit agagerak wone
21Ti'nuk, at Aliku ALA nen Muta yoge logonet, “O Metit time o apit lombok aremenggerak paga aakumi Metit mendek inigen yu'nduk agan nogo logowak nduk, keenggi mbogut paga titik eerogo nippu o.” 22 Yoge mbareegi, Muta nogo eenggi mbogut paga titik eerogo nippege mbareegi, o Metit nogome abok aret o apit agago pereegerak wonage kagak, nogo kenagan yereegwaarak. 23Nogo kenagan yereegwaarak ti, it aakumi nen inigen iigwi, iname nen endekem wundi nogwe, eeka'lek aret wonogwe iigak kwe, it aakumi Iterali wonogwe me perak, o eya aret wonagagerak.
24Togop wonage mbareegi, at Pirawun nen Muta wiireegerak nage mbareegi, yoge logonet, “Kit kinakuwi-kinapuri kinom abok aret Aliku ALA alut eeri noorak op aret kwe, kinaanggumi kambin-ndomba inom, tapi inom, ti perak, yime teppiinok, namunggup o.”
25-26Yoge mbareegi, at Muta nen Pirawun yoge, “Togop yo'niragandak kwe, lek o! Nit ninaanggumi ambiriluk ambi teppunuk, nagun mondok lek o. Abok aret wogoren nogo logomonggoorik, taati nen mban leenogo punuk, ando Aliku ALA alut eeko logonet, ake warogo wogoriyak me, at Aliku ninogoba Ala ake warogo wogogwi, ando ake kani kunggwi, eeri noorak me, nappinanu o.”
27Yoreegerak kwe, Aliku ALA nen Pirawun iniki omaawi eerogo pereegerak me, at Pirawun nen it Iterali mendek nogo nawak nduk, teppiyoorak eebi mbake nagagerik, 28Muta yoge logonet, “Kat kenggaawak keyoorak abu neebi me, wundi nak o! Ndi, peebi nen nowagam wage keenok, mondok koorigin o.”
29Yoge mbareegi, at Muta nen Pirawun yoge, “Wone ti abet aret yagandak me, an peebi nen kat kowagam woraagin mondok lek o,” yinuk, yoreegerak.
Tidak ada komentar:
Posting Komentar